Mbesa e inxhinierit beratas të Harvardit që sfidoi Otranton me not

Historia e Eva Buzos për këdo mund të ketë pikëpyetje: Përse një juriste me pasaportë australiane kërkon të sfidojë me not gjithkënd që ka dashur të kalojë përtej detit! Eva Buzo na i tregon pa dorashka të gjitha pikëpyetjet që ne kemi, por mbi të gjitha, thjeshtësia që tregon e ka vendin e origjinës aty në Berat, tek njerëzit e dashur dhe punëtorë, të qetë e buzëqeshur, njerëz të komunikimit dhe dashurisë për të tjerët. Eva Buzo është padyshim një beratase “e lindur”, pavarësisht se vendlindjen e ka në Australi. Historia e origjinës së saj është mbresëlënëse, ashtu sikurse edhe vizita e saj në Shqipëri për herë të parë në 2014-ën, për të mos u shkëputur më në lidhje të vazhdueshme. E kushdo që ka kuriozitet për “avokaten e detit”, ne patjetër ju tregojmë se ajo mbërriti në limanin e saj të suksesit me sfida, por këtë e bëri në emër të sakrificës së qindra shqiptarëve që kanë humbur në thellësitë e kanalit të Otrantos.

Në brigjet e bregdetit shqiptar, ajo ishte zhytur në një det të thellë emocionesh, nëpër të cilat valët përplaseshin me një fuqi të jashtëzakonshme. Një histori njerëzore qëndron jo vetëm në thellësinë e Otrantos, por ndërtohet dhe qëndron si një urë që lidh dy kontinente. Është Eva Buzo, gruaja e papërtuar, që na tregon në një rrëfim enkas për revistën Newsbomb, se si dashuria për vendin dhe përkushtimi për një mision mund të kalojë çdo pengesë. E lindur dhe rritur në Australi, Eva e ka ndjerë gjithmonë Shqipërinë si pjesë të qenësishme të shpirtit të saj, përmes tregimeve dhe dashurisë së trashëguar nga gjyshi i saj shqiptar, një inxhinier i shkëlqyer që nuk reshti kurrë së foluri për vendlindjen e tij të dashur.