Tigri nxjerr dhëmbët, drejton gishtin drejt Veliajt

Afera e plehrave po qelb rilindjen, dhe bashkëpunëtori më i ngushtë i Kryeministrit, Arben Ahmetaj është arratisur, pasi u shpall në kërkim nga SPAK. Nga ekzili, tigri po nxjerr dhëmbët, dhe po drejton gishtin drejt Erjon Veliajt. Një përmbledhje e dosjes së bujshme, dhe pse radhën e ka Inceneratori i Tiranës. Tigri i ka shpëtuar kafazit për momentin, duke qënë se të premten e 7 korrikut ai është larguar nga Shqipëria, dhe pas shumë spekullimeve, është marrë vesh se gjendet në Mbretërinë e Bashkuar, siç pohojnë avokatët e tij, për çështje personale. Një javë pasi është fotografuar në një pikë kalimi kufitar, Parlamenti votoi me unanimitet kërkesën e SPAK, për arrestimin e ish-zëvendëskryeministrit, i cili akuzohet për korrupsion, fshehje pasurie dhe pastrim parash. Afera e incineratorëve po zë poshtë vetes gjithnjë e më shumë zyrtarë të lartë, dhe besohet se të tjerë dinjitarë do të përballen me drejtësinë. Por çfarë mbetet së fundmi një nuancë dukshëm e veçantë nga gjithë kjo tollovi e zullum me miliona euro, është armiqësia mes Ahmentajt dhe Erjon Veliajt. Edhe pse i është shmangur drejtësisë, duke u “arratisur”, Ahmetaj nuk ka heshtur. Në një reagim të gjatë në rrjetet sociale, pas seancës në Kuvend ku u dha autorizimi nga deputetët unanimisht, për ndalimin e tij, Ahmetaj përpos një analizë të gjërë ku shpallet si viktimë politike e luftës brenda partisë së tij, përpos se merr meritat për rindërtimin, pandeminë, digjitalizimin e shërbimeve, dhe madje edhe për dy satelitët që kemi sot mbi jonosferë, duke mos i dhënë asnjë kredit Edi Ramës, ish-numri 2 i qeverisë nuk harron të tregojë gishtin nga kryebashkiaku i Tiranës. Veliaj në fakt, deri tani nuk është paraqitur në SPAK për këtë çështje, edhe pse incieneratori i Tiranës është pjesë e aferës në hetim, edhe pse me emrin dhe firmën e tij, ka kërkuar nisjen e kësaj procedure. BIRN ka zbuluar (nëpërmjet dosjes hetimore dhe kërkesës së SPAK drejtuar Kuvendit, plot 320 faqe) se është Veliaj iniciatori i kësaj sipërmarrjeje koncesionare për metropolin, dhe se kjo gjendet në dokumentat hetimore të Prokurorisë së Posaçme. Aty është pikërisht edhe momenti i lavdisë së Aarben Ahmetajt. I cili, rezulton se ka refuzuar 3 herë në vitin 2016 si ministër i Financave këtë projekt të kërkuar nga Veliaj. Ashtu si edhe Shkëlqim Cani më parë, Ahmetaj nuk ka mbështetur këtë nismë, për rrisqet që sillte në buxhetin e shtetit. Por këmbëngulja nga Veliaj ka qënë e pasosur. Kur më në fund, kryebashkiaku ka thënë se është pikërisht pushteti i tij vendor që do të marë përsipër barrën financiare, atëherë është çelur drita jeshile në qeveri. Dhe si gjithnjë, edhe pas inceneratorit të Tiranës, janë të përhershimit, Zoto e Mertiri. Sikundër në rastin e djegësve të Elbasanit dhe Fierit, edhe për Tiranën, janë pikërisht këta dy shtetas të shpallur në kërkim nga drejtësia, që kanë hartuar shkresat e kanë kordinuar pas perdes, të gjithë letërkëmbinin në qeveri, derisa u mundësua aprovimi. Në reagimin e tij në Facebook, Ahmetaj thotë se shpreson që të dalin në dritë edhe të vërteta të tjera, si ajo që ka publikuar BIRN. Pra, ai sugjeron që të ketë më shumë dritë e transparencë lidhur me implikimin e Erjon Veliajt. Në fakt, në dosjen hetimore të SPAK, që revista Neësbomb e disponon, në një fashikull, rezulton se një prej drejtorëve më të rëndësishëm të Bashkisë dhe një prej njerëzve më besnikë të Veliajt, krahu i tij i djathtë, merr drafte nga Klodian Zoto, Mirel Mërtiri e stafi i tyre, dhe kryen pastaj cirkuidin administrativ me to, duke i shndërruar në shkresa zyrtare. Ky zbulim është mëse i mjaftueshëm që Erjon Veliaj të humbë qetësinë. Gazetarja, autore e shkrimit tek BIRN, Ola Xama ka marrë kërcënime direkte prej tij. Dhe sakaq, çështja është ndërkombëtarizuar. Për herë të dytë brenda pak muajsh, (pasi linçoi gjatë fushatës dy faqe on line, si Lolita dhe JOQ) organizata të rëndësishme europiane që mbrojnë lirinë e shprehjes dhe gazetarët, i tërheqin veshin kryebashkiakut, dhe dënojnë aktet e tij të shantazhit. EFJ, Qendra Europiane për Lirinë e Shtypit dhe Medias, ECPMF, dhe Safe Journalist Netëork i kërkuan Veliajt që të ndalë sulmet ndaj gazetarëve profesionistë dhe të respektojë punën e tyre. 1 vit hetim, 320 faqe mbërrijnë në Kuvend Hetimi i thelluar i SPAK ndaj Ahmetajt lidhur me përfshirjen e tij tek afera e inceneratorëve, ka zgjatur 1 vit. Kjo pasi ishin dënuar ndërkohë, ish-ministri i Mjedisit Lefter Koka, dhe ish-sekretari i Përgjithshëm i këtij dikasteri, Alqi Ballko. Prokuroria speciale ka depozituar në Kuvend kërkesën për arrestimin e tij, duke argumentuar se Ahmetaj ka përfituar vila, para, favore nga arkitektët e kesaj sipërmarrjeje, Mërtiri dhe Zoto. Rezulton se janë pyetur me qindra dëshmitarë, përfshirë edhe roje e pastruese dhe shtetas të huaj, për të vërtetuar lidhjen e ish-zëvendëkryeministrit me vilën në Hamallaj, në Vala Mare. Pasuri që Ahmetaj e ka mohuar ta ketë marrë nga Zoto. Mirëpo SPAK ka zbuluar në kompjutetin e të shpallurit në kërkim detaje shumë kompromntuese. Si planimetrinë e shtëpisë, dhe madje edhe hollësi rreth mobilimit të saj. Të gjitha kosto të mbuluara prej pronarëve të inceneratorëve. Prokuroria ka provuar rolin e tij në procedurat e koncesionit dhe në material thuhet se, edhe pse stafi kundërshtonte, Ahmetaj nuk i kthente përgjigje zyrtare, por draft-shkresën ja kalonte Zotos dhe Mërtirit që bënin rregullimet dhe i rinisnin. Për të gjitha procedurat e 3 koncesioneve, Ahmetaj është shprehur dakord, edhe pse ato ishin në kundërshtim me ligjin, sipas SPAK. Prokuroria speciale ka zbuluar se këshilltarja e Ahmetaj ishte personi që përgatiste letrat në emër të Zotos. Një element tjetër që ka tërhequr vemendjen nga kjo dosje, lidhet me deponimin e anëtares së komisionit të koncesioneve, S.K, e cila është shprehur se këshilltari i Ahmetajt e ka kërkuar dhe i ka thënë se e do në takim Ministri. Dhe kur kjo specialiste, ka vajtur në zyrën e kreut të Ekonomisë, ky i ka thënë që ta shohë me pozitivitet e të mos e pengojë procedurën e inceneratorëve. S.K është ndjerë e trysnuar nga kjo ndërhyrje, dhe të tillë e ka quajtur edhe para prokurorëve të SPAK. Një detaj tronditës që tregon se çfarë është bërë me paratë e shqiptarëve në këtë aferë, shihet tek rasti i Elbasanit. Paradite, Zoto dhe Mërtiri kanë çuar tek Ahmetaj projektin për ndërtimin që shkonte 16 mln euro. SPAK ka zbuluar se po atë ditë, disa orë më vonë, për të njëjtin objekt, për të njëjtët zëra, ata kanë ridërguar një projekt të ri, me kosto 21.6 mln euro, pra 5.6 mln më shumë. Elegjia e lodhshme e Ramës Nuk ja ka qëlluar kësaj here Edi Rama që të nxjerrë përfitime në kurriz të një krize jo të vogël si kjo, teksa SPAK po ngushton lakun dhe hetimi i aferës së shekullit merr përditë e më shumë koka, e shkon gjithnjë e më afër tij. Në një elegji të shkruar e të lexuar me promter, kryeministri ju drejtua të premten pasdite popullit, teksa paradite Kuvendi kishte miratuar ndalimin për korrupsion të bashkëpunëtorit më të ngushtë të shefit të rilindjes prej të paktën një dekadë. Hera e parë që Rama shprehej, edhe pse prej pothuaj një jave kjo ishte tema që dominoi opinionin publik. Ashtu si edhe në raste të mëparshme, kryeministri nuk ka asgjë për t’u penduar, nuk ka asgjë për të reflektuar, nuk ka asnjë rezervë për këtë projekt që padyshim është sendërtuar me dakordësinë e tij, por ka si gjithnjë të gjithë bateritë e sulmit gati ndaj opozitës dhe zërave kritikë. Nëse ja ka dalë deri tani të menaxhojë zemëratën e bashkëpunëtorëve dhe ministrave të tij që janë pas hekurave për abuzim me detyrën, me Ahmetajn duket pak ndryshe situata. Tigri nuk ka ndërmend ta mbyllë gojën. Ai po flet, dhe premisat janë që të tregojë edhe më shumë. E kjo fshihet pas disa fjalive kyçe të reagimeve të tij. Kur thotë se do të kthehet, pasi e vërteta të marrë rrugë. E vërteta që merr rrugë, nënkupton se; nuk kemi parë gjë akoma.

Tigri nxjerr dhëmbët, drejton gishtin drejt Veliajt

Nga Newsbomb.al

Artikuj të ngjashëm Artikuj

Nano, beteja e një jete

Zonjat e “Prime Time”

Saga e dhimbjes e familjes MULLETI

LILI CINGU, KËMBËT QË VALLËZOJNË ENDE

Një “gjuetar goli” si Jasir Asani

MARK PALNIKAJ, INXHINIERI QË “ZHVARROS” ARKIVAT E VATIKANIT

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE