Të pathënat e ekzekutimit të biznesmenit nga turisti-vrasës

500 mijë euro besohet të jenë dhënë për vrasjen e biznesmenit Ardian Nikulaj, por askush në Shqipëri nuk i kishte marrë paratë, edhe pse ka nga ata që kanë vrarë për 10 mijë euro. E quante mision të pamundur ekzekutimin e një prej personave më influentë në Lezhë, me një profil të trefishtë: sa lidhur me krimin, sa me biznesin e sa me politikën. Një portugez 28 vjeçar e 4 britanikë morën përsipër të kryenin krimin në një terren të panjohur si Shqipëria, e mbi të gjitha mes tyre një femër. Ndërsa porositësi shqiptar, që e donte këtë vrasje për hasmëri të nisura që në 1997 kur ai kishte qenë ende fëmijë, kishte bërë gati terrenin që të huajt të operonin me thjeshtësi. Ai madje-madje, ishte fejuar me një vajzë, që edhe atë ta përdorte për këtë qëllim. Por të gjithë bashkë, lanë aq shumë shenja, gjurmë, detaje, pakujdesi, sa u zbuluan në kohë rekord nga policia…

Me siguri askush nuk e kishte çuar në mendje se Ardian Nikulaj, një politikan vendor me shumë influencë në zonën e Lezhës, do të qëllohej “ditën për diell” në brendësi të lokalit të tij “Coral”, vend të cilin e konsideronte si një “fortesë” të paprekshme dhe me gjasë ndihej i sigurt për jetën e tij. Po ashtu me shumë siguri, askush nuk e kishte menduar se ekzekutori dhe ndihmësit e tij, që e eleminuan 51-vjeçarin, një personazh kontrovers, që ndërthurte tri botë: krimin, biznesin e politikën, ishin shtetas të huaj: një portugez e 4 shtetas britanikë.