Sulmi mbi Ukrainë dhe dora e zgjatur e Putinit

Pasojat që sjell pushtimi rus tek fqinjët, tashmë anëtarë të NATO, dhe deri tek ne, në Ballkanin Perëndimor. Si nisi rrethimi i Kievit dhe cilat janë skenarët në vijim Në orët e para të mëngjesit të 24 shkurtit, kur bota ishte ende në gjumë, Kievi u zgjua nga sirenat e luftës. Forcat ruse kishin kapërcyer kufirin duke nisur pushtimin e Ukrainës. Televizionet, gazetat dhe rrjetet sociale u mbushën me skenat tronditëse, bombardime, shkatërrim, por edhe heroizëm. Diplomacia dështoi, një luftë sapo kishte shpërthyer në zemër të Europës. Tre ditë më parë, presidenti rus Vladimir Putin njohu pavarësinë e dy krahinave separatiste pro-ruse Donetsk dhe Luhansk. Pushtimin e Ukrainës ai e njoftoi përmes një fjalimi plot mllef dhe të pavërteta historike, që dukej se më tepër sesa popullit rus, i drejtohej Perëndimit për t'i treguar arsyet që sipas tij justifikonin pushtimin e një shteti sovran dhe të pavarur. Ditët që pasuan treguan se plani për pushtimin e Ukrainës ishte mirëmenduar, dhe gjunjëzimi i Kievit duhet të kryhej shpejt, brenda dy ditëve të para. Por siç historia ka treguar, ndonjëherë planet e kalkuluara mirë, rezultojnë të jenë ato më të gabuarat. Ushtria ruse u përball me një rezistencë të pashembullt, në qendër të saj, presidenti Volodomyr Zelensky i cili me fjalimet e tij motivuese, ngriti peshë zemrat e popullit dhe ushtrisë ukrainase: "Liria ka një çmim, dhe jemi gati ta paguajmë". Por përtej optimizmit, teksa dhjetra tanke ruse raportoheshin të shkatërruara në rrugët e Ukrainës e qindra ushtarë kapeshin peng apo dezertonin, Zelensky më shumë se një herë përmes video-regjistrimeve të famshme "selfie" ku i lutej për ndihmë ushtarake liderëve perëndimorë, paralajmëroi se Putin nuk ka ndërmend të ndalet në Ukrainë. Një deklaratë e tillë nuk është jashtë realitetit të një presidenti si Putin, që ndonëse krejtësisht i shkëputur nga realiteti, synon më tepër se aq, paralajmërojnë ekspertët dhe politikanët perëndimorë. Ai kërkon të rikthejë lavdinë e Bashkimit Sovjetik, kërkon të rivendosë influencën ruse në ato rajone ku vlerëson se Bashkimi Europian i ka lënë në harresë apo aty ku SHBA i duket e dobësuar. "Nëse Ukraina nuk ekziston më, radha do t'i vijë Lituanisë, Letonisë, Estonisë, Gjeorgjisë e Polonisë. Atëherë rusët do të ecin deri sa përpara t'u dalë para Muri i Berlinit", kështu u shpreh presidenti Zelensky, duke i kërkuar gazetarëve që qëndronin pranë tij, ta mbanin mend mirë këtë deklaratë. E ndërsa në Ukrainë janë shfaqur varret masive, për të mbuluar ata mijëra civilë të vrarë nga bombardimet e ushtrisë ruse, deklarata e Zelensky-t nis të ketë më tepër kuptim. Putin s'ka ndërmend të ndalet, as para gjakut të të moshuarve, grave dhe fëmijëve të pafajshëm. Kievi qendron akoma Kievi është shndërruar në një fortesë. Rrethuar nga artileria e rëndë ruse thuajse nga të gjitha drejtimet, po përgatitet t'i rezistojë një ofensive të ashpër dhe të pamëshirshme. Nëse kryeqyteti bie, do të rrëzohet heroikisht si një gur dominoje që do të zërë poshtë thirrjet për ndihmë drejtuar shteteve perëndimore dhe do të heshtë shpresën për liri të një populli të tërë. Por në të njëjtën kohë do të shkaktojë një tronditje për "gurët" e tjerë në këtë rajon, të parat janë shtetet baltike. Një skenar të ngjashëm e paralajmëroi edhe i dërguari i përhershëm i Shqipërisë në OKB, Ferit Hoxha. "Nëse Rusia ia del në Ukrainë, nuk do të ndalojë aty. Do të kërkojë më tepër. Siç na ka treguar historia, agresioni funksionon si një drogë", tha Hoxha teksa pretendimet e Rusisë për laboratorë biologjikë në Ukrainë i quajti si "disinformacion". Por ekspertët e sigurisë në Perëndim paralajmërojnë se Putin mund të humbasë durimin, nëse tentativa e tij për të vendosur në Kiev një qeveri kukull vonon, ai mund t'i drejtohet metodave barbare si përdorimi i armëve të ndaluara kimike. Politikanët druhen se për të hequr vëmendjen nga Ukraina, Putin mund të aplikojë një tjetër taktikë, atë të nxitjes së konflikteve në vendet e ish-Bashkimit Sovjetik, në Ballkanin Perendimor apo në të dyja rajonet njëkohësisht. Pse permendet Kosova? I izoluar nga sanksionet e forta perendimore dhe me një ekonomi që po i shembet para këmbëve, Putin mund të tërheqë fijet e Kremlinit të lidhura me Beogradin dhe Republikën Srpska, duke tentuar të ndezë një tjetër vatër konflikti për të sfiduar perëndimin, këtë herë në Ballkan. Kosovën, Putin e përmendi gjatë takimit që pati me kancelarin gjerman Olaf Scholz një javë para luftës në Ukrainë, duke u ankuar se NATO kishte nisur një luftë në Europë me bombardimin e Serbisë në vitin 1999. Por Scholz iu përgjigj duke i thënë se ndërhyrja e NATO-s ishte bërë për të ndaluar gjenocidin, duke nënkuptuar masakrat e ushtrisë serbe ndaj shqiptarëve të Kosovës. Krahasimi që Putin i bën shpesh Kosovës me Krimenë e aneksuar në 2014-ën nga Rusia çalon për disa arsye. Ukraina nuk kreu kurrë një genocid ndaj popullsisë në Krime, ndërsa gadishulli iu bashkua Rusisë përmes një referendumi të mbajtur vetëm dy ditë pas pushtimit. Pavarësia e Kosovës sot njihet nga mbi 100 shtete ndërsa Krimea njihet si pjesë e Rusisë vetëm nga disa shtete si Bjellorusia, Siria, Kamboxhia dhe të tjera si këto. Një deklaratë të fortë për Kosovën dhe bombardimet e NATO-s në Serbi, Vladimir Putin e bëri në vitin 2016, në 2014-ën gjatë pushtimit dhe aneksimit të Krimesë, Putin e kishte përmendur disa herë Kosovën. "Bombardimi i Beogradit ishte një ndërhyrje jashtë çdo norme dhe rregulli të ligjit ndërkombëtar. SHBA e bëri në mënyrë të njëanshme. Ju folët për Krimenë. Çfarë ka Krimea? S'është asgjë në lidhje me atë çka bëtë në Jugosllavi", do të deklaronte Putin në atë kohë. Në fakt, Rusia ka një këndvështrim krej të ndryshëm për atë çka ndodhi në Ballkanin Perëndimor, ku sipas teksteve të historisë ruse, ishte SHBA, NATO dhe disa shtete europiane ato që shfrytëzuan dobësitë e Rusisë post-sovjetike për të shkatërruar aleatin e tyre, Serbinë. Por që prej fillimit të pushtimit të Ukrainës, Putin e ka përmendur Kosovën disa herë në javë, kjo ka shkaktuar shqetësim te politikanët Ballkanit Perëndimor, në ato shtete që i kanë sytë nga Bashkimi Europian dhe NATO. Destabilizimi i Ballkanit Perëndimor mund të jetë në këndvështrimin e Putin i lehtë për t'u arritur nëse ai ushtron presion ndaj dy aleatëve të tij të afërt, Milorad Dodik, anëtari serb i Presidencës së Bosnjes dhe Hercegovinës dhe presidentit serb Aleksandër Vuçiç. Në tre raste, pas nisjes së luftës në Ukrainë, Putin dhe ministri i Jashtëm rus Sergei Lavrov janë munduar të përfshijnë Shqipërinë, Kosovën dhe Kroacinë, duke akuzuar në mungesë të plotë të provave se mercenarë nga këto dy shtete i janë bashkuar luftës kundër ushtrisë ruse. "Ne po shohim gjithnjë e më tepër ardhjen e mercenarëve nga vendet e treta, veçanërisht nga Kosova, Shqipëria dhe Kroacia. Militantë nga Kosova dhe xhihadistë me përvojë luftarake në Siri", u shpreh Putin gjatë një bisede telefonike me kancelarin gjerman Scholz. Këtyre akuzave iu përgjigjën presidenti Ilir Meta, ministrja e Jashtme Olta Xhaçka si dhe politikanë të lartë në Kosovë, duke i quajtur të pavërteta. Kryeministri i Kosovës, Albin Kurti ka ngritur i pari alarmin, kur gjatë disa intervistave në gazeta ndërkombëtare është shprehur se "Rusia ka gjasa ta përhapë konfrontimin me Perëndimin, duke i bërë presion Serbisë për të minuar pavarësinë e Kosovës dhe shteteve të tjera të Ballkanit Perëndimor.” Sot Serbia është i vetmi shtet në Europë që ka refuzuar të vendosë sanksione ndaj Rusisë. Por përveç kësaj, u bë vendi i parë dhe i vetëm në botë, që mbajti protesta masive në mbështetje të pushtimit rus të Ukrainës. Megjithatë në Asamblenë e Përgjithshme të OKB, Serbia votoi për rezolutën që dënoi agresionin rus në Ukrainë. Vuçiç deklaroi atë ditë se "trysnia mbi Serbinë do të rritet në ditët në vijim". "Serbia është në situatë të vështirë dhe sot më pak se kurrë ka mirëkuptim për pozicionin e saj”, tha Vuçiç, i cili me qëndrimin e tij të dyfishtë ngjalli jo pak pakënaqësi mes politikanëve të Bashkimit Europian. Ekstremistët serbë duket se janë gati, dhe kanë tentuar tashmë të nxisin konflikte ndëretnike, duke e bërë këtë përmes disa metodave siç është edhe fabrikimi i sulmeve ndaj popullatës serbe në Kosovë, për të fajësuar më pas shqiptarët. Tre incidente janë shënuar në veri të Kosovës që prej nisjes së pushtimit rus të Ukrainës. Në Mitrovicë, në dy tabela rrugore është shfaqur i pikturuar simboli "Z". Kjo shkronjë është kthyer tashmë në një simbol të pushtimit rus të Ukrainës. Vetëm disa ditë më pas, në murret e tre banesave të serbëve në veri të Kosovës u shfaqën të pikturuara me sprajt shkronjat "UQK", mesa duket një tentativë provokimi nga vetë serbët por e ekzekutuar keq në drejtshkrim. Incidenti i tretë, megjithëse i ndaluar në kohë nga autoritetet policore të Kosovës, ishte edhe më serioz. Tre shtetas serbë nga Nishi u kapën gjatë tentativës për të blerë disa emblema të UÇK-së dhe uniforma ushtarake në një dyqan në Kosovë. Plani dyshohet të ketë qenë inskenimi i një sulmi ndaj serbëve për të fajësuar më pas shqiptarët e Kosovës. Ministrja e Drejtësisë së Kosovës, Albulena Haxhiu deklaroi se një prej serbëve të shoqëruar kishte patur komunikime të shpeshta me shërbimin sekret serb dhe Rusinë. "Njëri prej personave të shoqëruar në polici, ka komunikime të shumta me persona nga Federata e Rusisë dhe individë të strukturave të Agjencisë Serbe të Inteligjencës. Kanë mjaftuar këto informacione për të rritur dyshimin se personat në fjalë, do të përgatisin një aktivitet që të cënojë sigurinë dhe t’i shtonte tensionet në Kosovë", deklaroi ministrja Haxhiu. Kjo situatë kritike i ka shtyrë krerët e politikës në Prishtinë të kërkojnë anëtarësimin sa më të shpejtë të vendit në NATO. Turqia ishte shteti i parë që shprehu publikisht mbështetjen për ta parë Kosovën në Organizatën e Traktatit të Atlantikut të Veriut. Shtetet anëtare të NATO-s gëzojnë sot një mbrojtje më të fortë ndaj sulmeve ruse, përfshi shtetet baltike dhe Poloninë. Presidenti amerikan Joe Biden, vazhdimisht ka përsëritur se sulmi ndaj një shteti anëtar të NATO-s, do të ishte sulm ndaj të gjithë Aleancës, që në situatën aktuale do të nënkuptonte përfshirjen e 30 shteteve në luftë direkte me Rusinë, apo nisjen e Luftës së Tretë Botërore. Serbia, fuqi baruti Serbia ka shpenzuar rreth 1 miliard dollarë për fuqizimin e ushtrisë gjatë viteve të fundit, më shumë se të gjitha shtetet e Ballkanit Perëndimor të marra së bashku. Vetëm gjatë muajit janar Serbia bleu ngarkesën më të fundit të armëve anti-tank nga Rusia, e cila pak kohë më parë i kishte dhënë ushtrisë serbe 30 tanke dhe 30 auto-blinda dhe 10 avionë MiG-29, prej të cilëve 4 nga Bjellorusia. Gjatë paradave ushtarake në Beograd, një traditë e lënë në harresë nga shtetet perëndimore, Vuçiç ka thënë se "shpreson që ushtria serbe të përdoret për qëllime mbrojtjeje", deklarata që nuk i qetëson aspak tensionet në rajon dhe Europë, e parë në kontekstin kur Vladimir Putin këmbëngulte se nuk kishte në plan të pushtonte Ukrainën, vetëm një ditë para se ta bënte një gjë të tillë. Në këto rrethana, më të kërcënuar se shqiptarët e Kosovës ndjehen boshnjakët. Anëtari boshnjak i presidencës tre palëshe të Bosnje dhe Hercegovinës, Shefik Xhaferoviç, paralajmëron se vendi i tij është i kërcënuar nga ndërhyrjet ruse. Ai thotë se anëari serb i presidencës, Milorad Dodik, i cili ka lidhje të ngushta me Kremlinin, mund ta shfrytëzojë këtë situatë teksa sytë e botës janë në Ukrainë. "Dodik inkurajohet në sjelljen e tij nga Rusia, e cila është gjithmonë e gatshme të destabilizojë BE-në dhe NATO-n", tha Xhaferoviç duke shtuar se "shtetet perëndimore duhet ta konsiderojnë më seriozisht situatën dhe të angazhohen më fuqishëm në Bosnje-Hercegovinë dhe të gjithë rajonin". Sipas liderit boshnjak "këto janë ditë të zeza për Europën dhe mbarë botën". Në 24 shkurt, ditën që Rusia nisi pushtimin e Ukrainës, Bashkimi Europian dhe NATO vendosën të shtojnë numrin e trupave paqeruajtëse në Bosnje dhe Hercegovinë nga 500 në 1,100 persona. Zyrtarët perëndimorë thanë se përforcimi nuk kishte lidhje me situatën në Ukrainë, por nga përkeqësimi i përgjithshëm i sigurisë globale, shkaktuar edhe nga ndikimi i Rusisë në rajonin e Ballkanit, veçanërisht në zonat me shumicë serbe si Republika Srpska, por edhe në Malin e Zi dhe Serbi. Teksa Europa po përballet me një situatë të re dhe të rrezikshme të sigurisë, politikanët bëjnë thirrje për angazhim më serioz të BE-së në Ballkanin Perëndimor, veçanërisht në ato shtete që nuk janë pjesë e aleancës së NATO-s, siç është Kosova. Shqipëria dhe Maqedonia e Veriut duhet të insistojnë në përshpejtimin e rrugës së negociatave drejt anëtarësimit të BE, ndërsa ekspertët shprehen se kontinenti tashmë duhet të mendojë për gjetjen e zgjidhjeve, që të plotësojë nevojat energjitike por edhe ushqimore për më shumë se 700 milionë banorët e saj.

Sulmi mbi Ukrainë dhe dora e zgjatur e Putinit

Artikuj të ngjashëm Artikuj

“Non grata”? Tronditja amerikane për Shqipërinë

S.O.S. Bujqësia! Si po dështon qeveria, hipur lesës së qeve!

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Rinia e një diktatori që s’e donte artin

POLICËT e lënë rrugëve: Pa bukë, të pasiguruar e pa shtesë page jashtë orarit

HISTORIA E GRUAS SHQIPTARE/ Nga perçja te teatri, nga malet tek vota

Artikujt më të lexuar

POLICËT e lënë rrugëve: Pa bukë, të pasiguruar e pa shtesë page jashtë orarit

Zengjinet e qeverisë

Ori Nebiaj për politikën dhe filizat e reja të dashurisë

Grinta prej Grifshe e Gridës

VALENTINA DUKA: Gabimi më i madh në jetë kur i thashë “PO” Lulzim Bashës

Rinia e një diktatori që s’e donte artin

“Non grata”? Tronditja amerikane për Shqipërinë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Sulmi mbi Ukrainë dhe dora e zgjatur e Putinit

Pasojat që sjell pushtimi rus tek fqinjët, tashmë anëtarë të NATO, dhe deri tek ne, në Ballkanin Perëndimor. Si nisi rrethimi i Kievit dhe cilat janë skenarët në vijim

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?