Shqipëria, ku vend që s’gjen qetësi nga vetja dhe…”Bota”

Si u mbyll viti 2022? Çfarë solli për botën dhe rajonin e Ballkanit Perëndimor lufta në Ukrainë? Pse Bashkimi Evropian dhe SHBA-të mbështesin Shqipërinë pavarësisht skandaleve që nuk kanë të sosur? Një vështrim i përgjithshëm diplomatik për rajonin tonë pas efekteve të luftës në Ukrainë dhe ku duhet të drejtohet diplomacia e “munguar” shqiptare…

Viti 2022 që sapo u mbyll ishte padiskutim një nga vitet më të vështirë në politikën botërore që prej përfundimit të Luftës së Ftohtë. Agresioni Rus në Ukrainë, jo vetëm synoi të gjunjëzojë Ukrainën duke sjell një bilanc që sipas Zyrës së Komisionerit për të Drejta të Njeriut në OKB është diku tek 7000 të vrarë dhe 11100 të plagosur, nga të cilët 429 fëmijë të vrarë dhe 808 të plagosur; 17 millionë njerëz kanë kaluar kufirin dhe janë zhvendosur nga Ukraina gjatë kësaj lufte, ku qindra qytete janë rrënuar dhe numri i krimeve të luftës shtohet për ditë. Agresioni rus në Ukrainë ishte paralajmëruar që prej vitit 2014, kur Rusia ndërhyri dhunshëm në aneksimin e Krimesë. Në 2014-tën, Ukraina me ndihmën e perëndimit dhe protestave pro perëndimore të sheshit Maidan, i shpëtoi grushtit të organizuar nga Rusia me anë të Presidentit pro Rus Viktor Yanukovych dhe arriti të shtyjë agresionin rus për disa vite. Aneksimi i Krimesë në vitin 2014, ishte aneksimi i territorit më të madh që prej përfundimit të Luftës së Dytë Botërore, dhe vendosi një precedent të rrezikshëm në lidhje me sovranitetin e shteteve e vendosur kjo me aktin e Helsinkit dhe dokumenteve shoqëruese në vitin 1975, të cilët thonë se kufijtë shtetërorë duhet të jenë të pacënueshëm dhe nuk duhet të ndërrohen me forcë. Megjithatë, insistimi i NATO-s, BE-së dhe forcave pro-perëndimore në Ukrainë për të zgjeruar kufijtë e NATO-s dhe BE-së deri në lindje të Ukrainës dhe mos njohja nga ana e perëndimit e të ashtuquajturave Republika Autonome në zonën e Krimesë dhe në lindje të Ukrainës të cilën jo pak herë që prej 2014-tës Putini e krahasoi me Kosovën, mbeten arsyet kryesore të pushtimit rus të Ukrainës. Natyrisht, që me aneksimin e Krimesë, Rusia kërkoi kontroll mbi Detin e Zi, një ndër rrugëkalimet kryesore detare të tregëtisë botërore nga lindja në perëndim që prej kohëve të herëshme, por lufta në Ukrainë në vitin 2022 tregoi edhe sa i papërgatitur ishte Bashkimi European për t’i bërë ballë jo vetëm agresionit rus në kufijtë e tij lindorë por mbi të gjitha mungesës së disa prej produkteve-komoditeteve si gazi natyror dhe gjithçka tjetër që varej nga prodhimi rus dhe ukrainas, pas vendosjes së sanksioneve nga ana e perëndimit.

Shtetet e Bashkuara të Amerikës kanë shpenzuar që prej fillimit të luftës në shkurt 2022 dhe deri më sot 68 miliardë dollarë ndihma për Ukrainën, pa përfshirë këtu paketën shtesë prej 37.7 miliardë dollarë të aprovuar nga Presidenti Amerikan Biden,  ditë më parë gjatë vizitës së Presidentit Zelenski të Ukrainës në Washington. Shumë strategjistë të politikës së jashtme dhe çështjeve globale, nuk lënë pa kritikuar politikën perëndimore, SHBA -BE në lidhje me Ukrainën dhe papërgatitjen e Bashkimit European përballë një krize të tillë globale të shkaktuar nga kjo luftë, dhe shpesh herë tashmë lufta në Ukrainë po karakterizohet si përplasja perëndim Rusi ose sic thotë Kissinger “lufta e tretë botërore”.