Shqipëri – Serbi, bileta që s’ka çmim

“Ai ishte flamuri më i bukur në botë”, sa herë goglat vendosin Shqipërinë përballë Serbisë, ky refren zgjat shumë në kujtimet e të gjithëve. Është thirrje, kujtim dhe zemër që rreh më fort. Kësaj here, takimi i 7 qershorit në Arenën Kombëtare nuk është një ndeshje si gjithë të tjerat. Është kapitull më vete në një libër që shkruhet gjithmonë me tension, emocione dhe histori përtej fushës. Objektivi? Botërori 2026. Por, për të mbërritur në SHBA, rruga është ende e gjatë.

Miliona sy do të jenë të ngulur në Tiranë, edhe ata që s’do arrijnë të kenë një biletë në dorë. Sepse me Serbinë nuk luhet thjesht për fitoren, por për dinjitetin. Dhe këtë e di mirë kushdo që sot po përpiqet të sigurojë një vend në stadium, një vend që është kthyer në trofe më vete. Federata Shqiptare e Futbollit ka bërë lëvizjen e saj: filtrim strikt, siguri maksimale, skanim për çdo biletë. Një shah-mat për të gjithë ata që besuan se “bileta e nxehtë” do të merrej lehtë.