Sabri Hysa, një 13-vjeçar mbi kalë me Medalje Ari

Ai është një djalë tirons që ka një talent që pakkush në moshën e tij e ka: dashurinë për kuajt dhe trofetë që do të arrijë. Në Newsbomb.al e zgjodhëm Sabrin 13 vjeçar si personazh jo vetëm për talentin dhe përkushtimin, porse, ndryshe nga moshatarët e vet, është një djalë që shkëlqen me 10-ta në shkollë, ngre trofe të arta në fushën e blertë të futbollit, por që mendjen e ka gjithmonë te kali i tij i trofeve më të mëdha, Furtuna. Ndaj dhe Sabri do të duhet të jetë një model për bashkëmoshatarët e vet që preferojnë tabletin, ipad-in, iphone apo playstation. Do të na duhen më shumë fëmijë si ky djalosh me flokë të arta e sy bojqielli që po shkëlqen sot…për pak vite, do t’ia dëgjojmë edhe më shumë emrin.

Udhëtuam drejt Mulletit, kësaj here jo për të konsumuar kafen jashtë zhurmës së Tiranës, por për t’u njohur nga afër me vogëlushin Sabri Hysa, 13-vjeçarin me talent dhe ëndrra të mëdha. Para se të shkoja, bisedova me babain e tij, Altinin, për të caktuar vendin e takimit dhe përgjigjja e tij ishte “E ku më mirë se aty ku Sabri është i plotësuar”, pra, në pistën e hipizmit. Dhe nuk e kishte gabim! Në momentin që shkova pashë që Sabri entuziast ishte bërë gati. I veshur nga koka te këmbët, me flokët e arta që i tundeshin nën helmetë, çizmet, dhe gati për të treguar pasionin dhe triumfet e tij.