POLICËT e lënë rrugëve: Pa bukë, të pasiguruar e pa shtesë page jashtë orarit

Policë që na mbrojnë nga kriminelët me orë e pa orë. Qeveria nxjerr ligje e vendime, por uniformat blu, janë shtresa më e diskriminuar e shoqërisë: Policët e rolit bazë nuk trajtohen me vakte ushqimore siç përcakton ligji; as nuk janë paisur me polica sigurimi për jetën; kush është vrarë në krye të detyrës nuk ka marrë një banesë falas siç përcaktohet në vendime e mbi të gjitha, janë me mijëra që janë larguar nga detyra dhe janë derdhur dyerve të gjykatave. Si do vejë halli i policisë? Fëmijët qanin në njërën prej dhomave, ndërsa Elvira vraponte sa andej këndej për të ndihmuar të shoqin, oficer i policisë që u brof menjëherë nga krevati pa vënë gjumë në sy, pasi celulari tringëlliu fort. Zilen e lë të lartë, se ka merak nëse telefoni bie e nuk e dëgjon për shkak të gjumit të thellë. Në anën tjetër të telefonit, shefi i Komisariatit e urdhëronte të ishte menjëherë në rrugë: Ka ndodhur një ngjarje e rëndë. Arbeni, prej 23 vitesh me uniformat blu është si urgjenca, me orar e pa orar për familjen. Uniforma e tij e policisë nuk ishte bërë gati ende. Nuk kishin pasur kohë. Ndaj bashkëshortja u detyrua të linte fëmijët duke qarë e të ndihmonte të shoqin të vishej e të vraponte për në punë. Aty e pret errësira e ngjarjes, ashtu siç e ka pritur me qindra herë, në shi, pluhur, vapë përvëluese, kërcënime gjithfarësh, e deri në ankthin e çdominutshëm se ai dhe kolegët e tij mund të kenë të njëjtin fat siç ka viktima e ngjarjes për të cilën vrapon drejt saj. Por ndërsa del me nxitim, ai e di se e ka mbyllur orarin e punës përgjatë ditës. Po ngjarja nuk pyet për orar pune të policit. Ai duhet të jetë aty, orë e pa orë, paguar e papaguar, sepse e di tashmë se prej më shumë se 8 vitesh paga e tij nuk ndryshon më. Aq, 500 mijë lekë të vjetra do të marrë, edhe sikur të punojë gjithë muajin 24 orë me 24. Po ngjarja nuk pyet për rregulla, grada, orë suplemnetare të papaguara, apo të rregulluara kundër tyre as për hile hartuesi ligjesh. Arbeni mendon se krimi duhet luftuar pavarësisht diskriminimit që i bëhet në gradë dhe në përditshmërinë e tij të mungesës së madhe për të parë fëmijët duke u rritur. Përvoja i ka rritur përkushtimin dhe nxitimin, por jo favorizimin nga shteti e për pasojë ai tashmë e di se çdo orë shtesë në punë është e papaguar për të përveçse është i bindur në domosdoshmërinë e pranisë së tij në atë ngjarje. Arbeni konsiderohet polic i rolit bazë. Ai mban gradën inspektor. Atë gradë ka prej vitesh e po aq pagë ka prej vitesh. Po me atë pagë ka edhe djaloshin e turnit që sapo ka dalë nga shkolla, sepse ligji i policisë i ka njëtrajtësuar. Ai nuk pezmatohet për djaloshin e ri, por për vitet që ka mbi kurriz në organizatën e policisë dhe që vijon të trajtohet njësoj pa iu shtuar asnjë qindarkë, pa pritur të rritet në gradë, e aq më pak t`i thuhet se ka ardhur momenti të kesh përfitime nga puna prej më shumë se dy dekadash. *** Po çfarë ka ndodhur vërtet me policinë në vendin tonë? Përse nuk iu rritet paga policëve që kalojnë 10, 20 apo 30 vite punë? “News Bomb” kërkoi përgjigje për këtë kategori efektivësh, që përbëjnë shumicën e policisë sonë në tërësi. U njoh me ligjin e ndryshuar, me mungesën e nxjerrjes së akteve prej vitesh dhe me heshtjen e efektivëve të rolit bazë për ta ndryshuar fatin e tyre. Gjendja aktuale e Rolit Bazë (Inspektorëve) Për Policinë e Shtetit hartohen ligje nga një herë në vit. Në ndonjë kohë të ngutshme, kur Policia duhet më tepër, si në kohë krizash apo revoltash, qeverive iu ndodh të ndërhyjnë në ligjet e tyre për ta, edhe dy herë në vit. Por rrallë ndodh të merren vendime dhe të nxirren akte. Vendimet merren, hidhen nëpër fletore zyrtare dhe flenë aty. Askush nuk kujtohet për kategorinë bazë. As ata vetë, për veten e tyre. Nuk regaojnë përveçe iu qahen njerëzve të besueshëm, familjarëve të vet e ndoshta flasin me sho-shoqin se pse bëjnë dekada në polici e janë me të njëjtën pagë? Pse një student, që sapo mbaron Akademinë del me të njëjtën gradë siç e kanë ata? Pse nuk trajtohen me vaktin e ushqimit siç trajtohen pjesa e skuadrave të përcaktuara si elitë? Që vazhdojnë të marrin urbanin në orët e vona të kthehen nëpër shtëpitë e tyre pasi e kanë të pamundur me pagën e tyre të kenë edhe një biçikletë e jo më makinë? Policia e rolit bazë, me gradë thuajse të unifikuar prej shumë e shumë vitesh punë, kap diku shifrën e më shumë se 50 përqind të organizatës së policisë. Janë rreth 6 mijë forca policore që janë me të njëjtën gradë e për pasojë janë me të njëjtën pagë. Ligji për gradat ka ndryshuar që në 2014, është ndërhyrë në të, në 2017, me idenë për të hyrë në fuqi në 2018, por që sot e asaj dite qeveria nuk i ka nxjerrë aktet. “News Boomb” u kthye te ky ligj për të hasur shqetësimin e madh të mbi 4 mijë punonjësve të Policisë të cilët, sipas Shoqatës së Policisë, janë me gradën më të ulët, atë të Inspektorit. Mungesa e akteve, që qeveria me gjasë i ka lënë enkas pa nxjerrë, ka bërë që ky numër efektivësh të trajtohen njësoj me të rinjtë që hyjnë në punë sapo dalin nga bankat e shkollës. Por duke iu referuar këtij ligji, hasen edhe 4 probleme të tjera, madhore, për të cilat, në fakt, jo pak herë qeveritë mburren se i kanë zgjidhur sa herë iu duhet një imazh për t`ia servirur publikut. Dhe përveç gradave, që i bie pagat, policia e këtij niveli ka të parregulluar sigurimin e jetës, vaktin ushqimor, marrjen e kredisë me kufi të përcaktuar jo më të lartë se 3 përqind dhe shtëpitë falas për familjarët e punonjësve të Policisë që bien në krye të detyrës! Pika e fundit, është gjithëpërfshirëse, pasi fati i keq nuk bie në bazë grade të përcaktuara nga qeveritë dhe hartuesit e ligjeve që më shumë janë sanksione për ta sesa të drejta! Mos implementimi i gradave Që prej 1 janarit të vitit 2018, janë 4 mijë efektivë policie të cilëve shteti iu detyrohet për shtesë page për gradat e paimplementuara. Ky fakt ka dëmtuar buxhetin familjar të tyre, ndonëse ata nuk kanë bërë asnjë reagim, përveç ankesës me bazë ligjore që ka deleguar kreu i Shoqatës, Sadedin Fishta, i cili ka vendosur të ngre padi kundër qeverisë për mosnxjerrjen e akteve që rregullon dy gradat që i përkasin këtij roli. Këtu përjashtohen të rinjtë! Sipas tij, në gradën Inspektor qeveria ka rrumbullakosur rreth 6 mijë efektivë, por 4 mijë prej tyre, me anë të ligjit përfitojnë gradat e përcaktuara; Inspektor i II dhe Inspektor i I. Konkretisht për Inspektor të dytë janë rreth 2200 punonjës dhe për gradën Inspektor i I, janë 1800. Këta nuk kanë përfituar këto grada për shkak të mosnxjerrjes së akteve sipas parashikimit ligjor të vendimit, marrë në marsin e vitit 2017 ku thuhej se do të hynte në fuqi me 1 janar të vitit 2018! Sipas Fishtës shtesa në këto dy grada është 6 mijë lekë për kategorinë e Inspektorit të II, që presupozohet që e përfitojnë të gjithë ata punonjës që kanë mbi 10 vjet punë dhe diku te 8.7 mijë lekë të kategorisë së Inspektorit të parë që e përfitojnë automatikisht punonjësit që kanë më shumë se 15 vjet punë. Sipas tij, paditë kanë mbërritur deri në Gjykatën e Lartë, por ata për shkak “stoku” dhe ndërhyrjesh, e kanë lënë aty dosjen të pa marrë në shqyrtim. “Kam ngritur katër çështje që lidhen me punonjësit e policisë në gjykata. Shkalla e parë dhe Apeli më nxjerrin bishta duke më konsideruar të paligjshëm sa herë ngre padi, ndërsa në Gjykatën e Lartë ndalohen shqyrtimet. Ata pretendojnë se bëhet fjalë për pamundësi trupe për të gjykuar çështjet e panumërta që kanë, por harrojnë se ato para që ua kanë mbajtur prej katër vitesh 4 mijë punonjësve të policisë do t`i paguajnë një ditë. Për to ka një vendim që e kanë nxjerrë vetë dhe nuk janë pak, po janë katër vite. Paçka se bëhet fjalë për një shifër qesharake parash, nëse do u jepej çdo muaj, kur të mblidhen në fund, apo nga ndonjë gjykatë ndërkombëtare, shifra do të rritet sepse do të rriten edhe elementët e kërkesë-padisë sonë”! Ai shpjegon se në gradën e Inspektorit, përfshihen tashmë edhe ata që kanë më pak se 10 vjet punë, duke bërë kështu unifikimin e gradës për të gjithë atë kategori që janë 15 vjet e poshtë punë në Organizatën e Policisë së Shtetit. Është neni 143 që sipas vendimit, rregullon nxjerrjen e akteve brenda 6 muajve nga botimi në fletoren zyrtare. Shtëpitë falas Sipas kreut të Shoqatës së Policisë ekzsiton një vendim qeverie i marrë në vitin 2014 i cili flet konkretisht për këtë përfitim që do të kenë familjarët e punonjësit të policisë që bie në krye të detyrës. Ai thotë se ata përfitojnë banesë falas nga shteti në kohën kur nuk e kanë një të tillë, por nuk ka ndodhur në asnjë rast. Në fakt duke iu referuar atij ligji, shihet qartë neni 75, pika ç, e ndryshuar, ku përcaktohet me emërtim të posaçëm: Trajtimi i familjarëve të punonjësve të policisë që humbin jetën për shkak të detyrës. Në këtë nen thuhet se: Kur punonjësi i policisë humb jetën për shkak të detyrës familjarët përfitojnë; ndihmë të menjëhershme financiare deri në 10 paga mujore sipas pagës së muajit të fundit; Pension familjar suplementar në masën 100 për qind të pagës mujore sipas rendit kalendarik të shërbimit pavarësisht nga periudha e sigurimit; Rimbursim në masën 100 për qind të bursës së studimit për fëmijët në institucionet shtetërore; Banesë falas për bashkëshorten/in kur janë të pastrehë! Fishta tregon se asnjë nga familjarët e punonjësve të rënë në krye të detyrës nuk kanë marrë këtë përfitim që bie në vendimin e nxjerrë 8 vjet më parë dhe se nuk dihet nëse do ta marrin ndonjëherë. Ai tregon se qeveritë mjaftohen me homazhet dhe dhënien e 10 pagave mujore për familjen dhe më pas harrohen duke mos u kujtuar kurrë më për familjet e tyre veç se kur iu duhen për të rregulluar imazhet e tyre publike. Sigurimi i jetës “Qeveria nuk e ka mbajtur fjalën për sigurinë e jetës së policëve dhe për më tepër mungon ligji për të përcaktuar rregullat e përfitimit të siguracionit të jetës”, thotë kryetari i Sindikatës së Punonjësve të Policisë së Shtetit, Sadedin Fishta. Ai ndalet te struktura me rrezikshmërinë më të lartë, te reparti RENEA, punonjësit e të cilit, përballen drejtpërdrejtë me krimin. Edhe këta nuk kanë siguracion për jetën. Tenderi për sigurimin e jetës së Policisë së Shtetit duhej bërë që në 1 mars të vitit 2015. “Edhe pse sigurimi i jetës është i parashikuar në ligjin e ri të Policisë, ende nuk është bërë asgjë. Premtimi i Qeverisë se efektivët e Policisë, por në veçanti forcat speciale RENEA do të pajisen me siguracion jete, duket se është mbajtur vetëm në letër”, shprehet Fishta. Në nenin 71 të ligjit “Për Policinë e Shtetit”, thuhet se punonjësi i Policisë përfiton sigurim jete, sipas rregullave të përcaktuara me vendim të Këshillit të Ministrave. Por këtu qëndron edhe problemi. Mungesa e një VKMje për të përcaktuar rregullat e përfitimit të siguracionit të jetës, ka bërë që deri më sot të gjithë punonjësit e Policisë të jenë të pasiguruar. Kreu i Sindikatës thotë: “ Çdo punonjës Policie që dëmtohet, ose vritet për shkak të detyrës ose në detyrë, duhet të ketë edhe një kontratë sigurimi. Qeveria duhet të parashikojë fondin. Duhet të kishte parashikuar që më 1 mars të para 7 viteve, të bënte tenderin se cila kompani do ta merrte përsipër sigurimin e punonjësve të Policisë. Absolutisht asnjë punonjës Policie nuk ka siguracion jete, pra për ndonjë dëmtim”. Fishta është i bindur që ky nen është lënë enkas në duart e një VKM-je që punonjësit e policisë të mos kenë mundësinë ta kërkojnë në sektorin drejtues, pasi lahen duart duke iu thënë se kjo bazohet në vendim qeveria që ende nuk ka dalë dhe as nuk dihet se kur do të dalë. Përfitimi i kredisë së butë Janë dy nenet që pretendohet se rregullojnë një moment kyç në jetën e punonjësve të Policisë. Bëhet fjalë për “E drejta për përfitim të kredisë me interes të butë” dhe “Kompensimi për strehim”. Në ligj përcaktohet se Punonjësi i policisë përfiton kredi për strehim me një interes në masën 3 për qind, rimbursimi i interesave ndërpritet kur punonjësi i policisë largohet ose përjashtohet dhe se kriteret përcaktohen me vendim të Këshillit të Ministrave. Në ligj thuhet se kur punonjësi i policisë, emërohet ose transferohet jashtë vendbanimit të tij të përhershëm brenda dhe jashtë vendit u paguhet qiraja e banesës kur nuk i sigurohet ajo, kriteret dhe masa e përfitimit të pagesës së qirasë përcaktohet me vendim të Këshillit të Ministrave. “ Edhe këtu - thotë Fishta -qeveria nuk ka marrë asnjë masë për ta implementuar ligjin me akte, pasi punonjësit e policisë nuk e kanë përfituar sot e asaj dite këtë kredi për shkak të mosnxjerrjes së akteve nënligjor e”. Vakti ushqimor Fishta tregon se e ka paditur Qeverinë që në vitin 2016 për ndarjen selektive që i është bërë policisë për trajtimin me vakt ose tre vakte ushqimi në ditë. Prej 6 vitesh ai thotë që padia e tij rri në gjykata për shkak se nuk merren në shqyrtim. Duke iu referuar të dhënave të tenderimit që daton këtë vit mësohet se Ministra e Brendshme e asaj kohe bëri prokurim vetëm për RENEA-n dhe FNSH-në për vakt ushqimor. Sindikata e Policisë ngriti padi kundër qeverisë për ushqimin e policëve të thjeshtë. Bëhej fjalë për një tender me vlerë rreth 18 miliardë lekë, ku u përfshinë përveç këtyre dy reparteve edhe Akadamia dhe punonjësit e policisë së Burgjeve. Në padi sindikata pretendon se të paktën një vakt duhet ta përfitojnë mbi 10 mijë punonjës të kësaj organizate, që në fakt nuk e morën kurrë dhe jo vetëm vaktin po as kompensimin për mungesën e këtij vakti. Që atëherë e deri aktualisht, me përjashtim të Forcave Speciale, atyre të Ndërhyrjes së Shpejtë, si dhe Qendra e Formimit Policor në Sauk, të gjithë punonjësit e policisë në shkallë vendi, që nga viti 2008 nuk janë trajtuar. Sipas përllogaritjeve për një punonjës, shuma për trajtimin ushqimor arrin 7000 (shtatë mijë) lekë në muaj. Numri i punonjësve që nuk trajtohen është mijëra vetë. Aktualisht, sipas kreut të Sindikatës së Policisë, qeveria i detyrohet të paktën 420 mijë lekë çdo punonjësi të policisë që nuk trajtohen sipas VKM-së. Në padinë e dërguar në gjykatë, sindikata shprehet se mosveprimi i palës së paditur, duke mos ekzekutuar VKM-në përkatëse dhe urdhrin e nxjerrë nga ana e tyre, përbën shkelje ligjore të përcaktuara në ligj. Problemet shtesë... në vend të pagave shtesë Kështu, punonjësit e policisë, kryesisht të rolit bazë janë të parregulluar prej më shumë se një dekade për të gjitha të drejtat e tyre. Ata i drejtohen vetëm sindikatës për të mundësuar ngritjen e zërit, por ata nuk kanë mundur të ngrihen si zë shqetësues deri sa ta detyrojnë Qeverinë tua plotësojë kushtet. Sipas Fishtës hartuesit e ligjeve i bëjnë enkas vonesat, duke ndërhyrë herë pas here në ligj duke i ç`orinetuar dhe duke mos i lënë të ngrenë asnjëherë krye përballë eprorëve të tyre. Por përveç këtyre pikave, që prekin drejtpërdrejt buxhetin dhe sigurinë e efektivëve të policisë janë edhe një mori problematikash të tjera që kanë dalë ndër vite me këtë organizatë. Janë transferimet dhe largimet me patëdrejtë nga puna. Qeveria ka ndërhyrë në fundin e vitit që lamë pas me një VKM për të rregulluar lëvizjen e punonjësve të policisë për në administratë dhe rikthimin e tyre në detyrë. Në fakt ai vendim më shumë u nxor për të justifikuar emërimin e ish-kryepolicit të vendit, Ardi Veliu për në postin e zëvendësministrit, duke bërë të mundur kështu edhe ekuivalencën e pagës në bazë të gradës që kishte mbajtur drejtori i Përgjithshëm i Policisë. Në vendim përcaktohet se grada e një punonjësi policie shkëmbehet si pagë edhe në pozicione të tjera në administratë, kur lëvizja bëhet si nevojë institucionale, ndërkohë që përcaktohet edhe rikthimi me të njëjtën gradë në polici, por, gjithnjë me një “por”, do të jetë një komision rivlerësimi që do të vendos nëse ky punonjës policie vlen të kthehet sërish në pozicionin që ka patur. Një problem madhor, të cilit qeveria dhe hartuesit e vendimeve i shmangen dhe që do të ketë pasojë për xhepin e shqiptarëve është edhe largimi i punonjësve të policisë nga puna. Janë me dhjetëra gjyqe të fituara nga ana e ish-drejtuesve të sektorëve të ndryshëm të cilët kanë fituar të drejtën të rikthehen në të njëjtin nivel grade që kanë qenë në momentin që janë larguar. Mirëpo, duke qenë se të drejtën për gjetjen e vendit të punës një të rikthyeri e ka Drejtori i Përgjithshëm i Policisë, ai e delegon punonjësin që ka fituar gjyqin në sektorin që ka qenë. Por ndodh që drejtuesi aktual i atij sektori është në gradë më të ulët se sa i rikthyeri, ai nuk mund ta marrë në punë këtë punonjës ose i duhet që automatikisht të ulet në gradë ose t`i lëshojë karrigen e tij. Ngërçi nuk dihet se si do të zgjidhet, ndërkohë që janë me dhjetëra drejtues dhe deri me gradën e komisarit që e kanë fituar gjyqin dhe nuk janë stabilizuar ende. Megjithatë, mbase, pak më vonë, kur qeveria do ta kuptojë se paditë mund të shkojnë edhe në Gjykata Ndërkombëtare, do të ndërmarrë një VKM tjetër që do të rregullojë pas disa vitesh këtë marrëdhenie, nëse ata nuk dalin në pension, shumë prej të cilavë janë në mosha të mesme e lart për shkak edhe të vjetërsisë në punë që kanë patur para shkëputjes së marrëdhënies. GRADAT Janë 4000 efektivë policie që shteti u detyrohet shtesë page për gradat e paimplementuara. Vendimi që hyri në fuqi në 1 janar 2018 nuk është shoqëruar me aktet përkatëse. Do të përfitonin shtesë page ata policë që kanë mbi 10 vjet punë, si Inspektorë të nivelit të dytë, dhe Inspektorët e parë, ata që kanë mbi 15 vite punë përfitojnë çdo muaj 8,700 lekë. Çështja e gradave endet dyerve të gjykatave dhe ka mbërritur në Gjykatën e Lartë, por aty nuk merret ende në shqyrtim për shkak të volumit të madh të dosjeve SIGURIMI I JETËS Policët janë të parët që vrapojnë drejt kriminelit, por këtë, disa e bëjnë me zemër në dorë, e disa me guximin prej budallai. Dhe pse ligji parashikon se ata duhet të kenë sigurim jete, kjo, gjendet e shkruar vetëm në letër. Pritet të dalë një VKM që kush e di se kush e mban peng dhe situata është e njëjtë që nga marsi i vitit 2015. Askush nuk ka sigurim jete, as policët e rolit bazë, as ato forcat më elitare që na nderojnë në stërvitje edhe në rang ndërkombëtar, si RENEA apo FNSH. Gjithçka varet prej një tenderi të parealizuar, se kush duhet të bëjë sigurimin e jetës së uniformave blu VAKTET USHQIMORE Policët punojnë orë e pa orë, nuk kanë kohë të shkojnë në shtëpitë e tyre. Qeveria, që nga viti 2008 duhet të kishte zgjidhur problemin e ushqimit të tyre. Përveç reparteve speciale, askush tjetër nuk përfiton trajtim ushqimor. Bëhet fjalë për një tender në vlerën e 18 miliardë lekëve. Sindikata e policisë pretendon se përfitimin e një vakti ushqimor duhet ta marrin të paktën 10.000 policë. Kjo rëndon financat e buxhetit, por VKM që ka dalë, nuk është zbatuar. Dhe kjo do të zgjidhet në gjykatë KREDITË PËR SHTËPI Ligji për Policinë e Shtetit, shumë i mirë në letër, por i pazbatuar në realitet. Në ligj përcaktohet qartë se policët duhet të marrin kredi të butë me interes 3 përqind, apo edhe kompensim për strehim. Ndërsa policët që vriten në krye të detyrës duhet të marrin banesë falas nga shteti kur nuk e kanë një të tillë. Kreu i Sindikatës së Policisë thotë se kjo nuk është zbatuar në asnjë rast, qoftë për banesat falas, qoftë për dhënien e kredive me interes 3%. Shkak për moszbatimin e ligjit, është mungesa e nxjerrjes së akteve nënligjore. Por edhe sa vite do të zgjasë një situatë e tillë?

POLICËT e lënë rrugëve: Pa bukë, të pasiguruar e pa shtesë page jashtë orarit

Nga Nikoleta Kovaçi

Artikuj të ngjashëm Artikuj

Plaku Gjerman i humbur në velierën e Karpenit

Ne mbushim 3 vite dhe kemi një dhuratë për ju!

ELBAR, BIRRA SHQIPTARE QE NA BEN KRENAR!

Përgjegjësia ndaj Panikut dhe Relata e Munguar

Mëkatarët e Kadaresë

“Gropa” 20 milionë euroshe e inceneratorit të Tiranës

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Inva Mula: Unë sopranoja e parë shqiptare në skenat evropiane

Bjeshkët që marrosën turistët: Nga më e bukura Zoj, tek Xhubleta

102 kontejnerët me ngarkesën e errët të maskuar nën hijen e portit

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Silvana Braçe ekonomistja që pushtoi Skenën e Festivaleve

Kapodistria, kush ishte Gjon Gjika, presidenti i parë i Greqisë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

POLICËT e lënë rrugëve: Pa bukë, të pasiguruar e pa shtesë page jashtë orarit

Nga Nikoleta Kovaçi

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?