Një ndeshje për kornizë, 30 mijë tifozë, qindra sponsor, miliona sy nga “Air Albania”

Data shënonte 3 dhjetor i vitit 2020. Koha kishte kaluar pa kuptuar dhe 1 vit më parë, stadiumi “Air Albania” ishte inaguruar me ndeshjen kundër Francës. Në Federatën Shqiptare të Futbollit prisnin me kërshëri përgjigjen nga UEFA. Ishte e treta herë radhazi që ishte tentuar të fitohej bileta për të organizuar finalen e Conference League. Të gjithë ishin skeptikë, veç presidentit Duka, i cili e dinte mjaft mirë përpjekjen e madhe që kishte bërë FSHF-ja duke lobuar sistematikisht për të marrë të drejtën për organizimin e kësaj ndeshje. Ishte ditë e enjte. Ajo pasdite do ta mbahet mend gjatë nga të gjithë sportdashësit shqiptarë e veçanërisht nga stafi i Federatës Shqiptare të Futbollit. Nga UEFA vjen drita jeshile. Komiteti Ekzekutiv i UEFA-s kishte fiksuar stadiumin “Air Albania”, si impiantin që do të priste finalen e Conference League. Ngjarje historike për vendin tonë që padyshim nuk mund të kalonte pa një falënderim nga presidenti Duka.

“Kjo është një ngjarje e rëndësishme për futbollin, Tiranën dhe Shqipërinë! Për këtë duhet të ndihemi të gjithë krenarë. Është gjithashtu edhe një dhuratë e çmuar për Shqipërinë dhe shqiptarët, që më në fund mund të gëzojnë pas shumë peripecish të kaluara, që nga tërmeti e deri te pandemia Covid-19 që po përjetojmë. Urojmë që ky lajm t’i hapë rrugën lajmeve të tjera pozitive për shqiptarët. Dua të falënderoj administratën e FSHF-së për plotësimin e qindra formularëve, pyetësorëve dhe dosjeve për aplikimin, duke treguar profesionalizëm, seriozitet dhe përkushtim e duke bindur anëtarët e KE-së. Dëshiroj që t’i falënderoj të gjithë ata që besuan te ne. Por kjo është një ditë e madhe për të gjithë. Dëshiroj që të falënderoj me këtë rast, drejtuesit dhe anëtarët e Komitetit Ekzekutiv të UEFA-s, për mbështetjen dhe besimin që na dhanë”, shkruhej ndër të tjera në rreshtat e presidentit Duka.

“Project leader”, presidenti DUKA “gradon” Kejdi Tomorrin

Kejdi Tomorri është prej vitesh pjesë e administratës së Federatës Shqiptare të Futbollit. Pas dritës jeshile nga UEFA për finalen e UECL, presidenti Duka nisi menjëherë nga puna. Edhe pse data që do zhvillohet është 25 maji, kreu i FSHF-së kërkon të jetë gjithmonë një hap para në kohë. Kësisoj vendos që Kejdi Tomorri do të jetë ai që do të drejtojë dhe sistemojë gjithë punën për këtë sfidë të rëndësishme për Shqipërinë. Zyrtari i FSHF-së është i lumtur dhe këtë s’e fsheh teksa shprehet:

“Roli si project leader duket si diçka shumë e madhe, por nga ana tjetër do realisht shumë punë. Është shumë e vështirë t’i organizosh të gjithë bashkë, t’i bësh të gjithë bashkë për vendim unanim. Megjithatë si çdo tjetër në jetë ka sfidat e veta dhe kënaqësitë e veta“.