Ministrat rrogëtarë të Qeverisë

Kush ka kursyer miliona dhe kush është zhytur në borxhe në qeverinë Rama? Si janë rritur pasuritë e patundshme të zyrtarëve dhe çfarë tregojnë këto shifra për mënyrën se si menaxhohet pushteti? Në prag të zgjedhjeve, financat e kabinetit “Rama” zbulojnë prirje interesante. Disa shtojnë kursimet, të tjerë shesin prona apo marrin kredi të reja. Por çfarë tregojnë këto shifra? A reflektojnë ato një menaxhim të kujdesshëm financiar apo një përpjekje për të fshehur realitetin e vërtetë ekonomik? Kjo analizë sjell një panoramë të qartë mbi ekonominë e pushtetit, në një moment kur transparenca është më e rëndësishme se kurrë.

Ndërsa zgjedhjet afrohen, pasuria e ministrave të kabinetit Rama del në pah. Natyrshëm të gjithë mund të jenë kuriozë dhe të lindë pyetja: Kush janë milionerët dhe kush po mbytet në borxhe? 11 maji është gjithnjë e më pranë. Tensioni politik është i lartë, sondazhet janë të paqarta dhe gara për pushtet është në kulmin e saj. Në këtë realitet të trazuar, Newsbomb.al ka zhvendosur vëmendjen nga fushatat elektorale dhe është futur në një tjetër botë, atë të financave të ministrave të kabinetit qeveritar.