“Mbreti i Betonit”, milionat e fituara nga tenderat publikë

Një histori si nëpër filma ajo e Anton Gjinajt ndaj të cilit SPAK pak javë më parë vuri sekuestron e pasurive. I dënuar në Spanjë për trafikimin e 50 kileve heroinë, Gjinaj, “u fsheh” në Shqipëri, ku krijoi kompaninë “Alesio 2014”. Opencorporates.al, zbulon me dhjetëra kontrata e miliona euro të përfituara nga buxheti i shtetit, nën hundën e SPAK, prokurorisë e policisë shqiptare si dhe drejtorisë së pastrimit të parave. Por si arriti Pashk Gjini alias Anton Gjinaj të ishte biznesmeni më i fuqishëm në Shqipëri?

Pasditja e 22 qershorit të vitit 2006 në qytetin Torreviejas të Provincës së Alicantes në juglindje të Spanjës, ishte e qetë dhe me shumë turistë. Atë pasdite skuadra e krimit të organizuar e policisë spanjolle ndërhyri në një servis makinash, që po vëzhgohej prej kohësh. Dyshohej se përdorej nga trafikantët e drogës.

Aty, policia i ndërpreu punën e ndërrimit të gomës një shtetasi shqiptar dhe ndihmësve të tij. Sylejman Shkalla së bashku me një tjetër shqiptar sapo kishin nxjerr disa pako të mbështjella me natriban, që rezultuan më vonë se ishte heroinë. Punonin të pashqetësuar në çmontimin e gomave për të nxjerrë prej tyre kutitë.