“Mbështilluni me stil”

Dalngadalë pemët po fillojnë të “zhvishen” nga gjethet e fundit dhe ky është sinjali i natyrës, që të fillojmë ne të nxjerrim xhupat e pellushat. Është e gjitha në dorën tuaj për të përqafuar të mirat e kësaj stine, në të kundërt ditët e shkurta të dimrit që po vjen do ju duken të pafundme. Festat e nëntorit sjellin gëzim në çdo familje shqiptare dhe kombinimi me ngjyrat e flamurit kuqezi është i pashmangshëm… Por edhe një fustan ose kostum klasik i zi me aksesor asimetrik ngjyrë të kuqe, të jep atmosferën e festave të flamurit. Gjithashtu do të kemi shumë për të thënë për veshjet e festave teksa po afrohemi drejt dhjetorit, por sot fokusi është tek dukjet klasike dhe ato të përditshmet që do t’ju shoqërojnë me stil dhe ngrohtësi gjatë nëntorit dhe më gjerë. Mos harroni, përveç ngjyrave të tokës kemi edhe ngjyrën e gjelbër ushtarake. Veshjet e përditshme dominojnë me ngjyrën ushtarake, atë që në tone të ngjashme ne e quajmë edhe ngjyrë ulliri. Për këtë vjeshtë, pasarelat kanë propozuar xhaketat prej lëkure, fustanet mini, por edhe veshje të tjera me printe mbi një bazë ushtarake, pa lënë mënjanë palltot ushtarake për të cilat do të flasim pak më gjatë. FashionBomb ju njeh me disa kombinime që i bën temperaturat e ulëta “të papërfillshme” duke u mbështjellur me stil si francezët.

Pallto ushtarake