Marsi i grave të vrara… dhe një ftesë për SPAK

25 vjet histori krimesh ndaj grave dhe vajzave. Nga Eva Visha te Fildese Hafizi, kush janë gratë dhe vajzat që tronditën opinionin me fundin mizor të jetës së tyre. Marsi është muaji i tyre, por po aq, dhe shoqëria indiferente që bën gjithçka, për t’i harruar…

Çdo muaj mars na kujton gratë, betejat e tyre, revoltat dhe tentativat e vazhdueshme në emër të së drejtës. Është muaji i reflektimit në emër të gruas, lirisë dhe triumfit të saj. Por edhe muaji i kujtesës, në emër të asaj çka ka ndodhur me gruan, sidomos me gruan në vendin tonë! Duke i bërë sfidë me dashje harrimit, kërkojmë në dekadat tona dhe hasim historitë që i njohëm, i shkruajtëm, u përpoqëm të hedhim dritë mbi to, duke dashur të mos e lejojmë pluhurin e indiferencës, dashakeqësisë dhe të fuqisë së krimit t’ua mbulojë përjetësisht ikjen në mënyrën më mizore të mundshme. E në vendin tonë, njëkohësisht, në kohën tonë, për fatin e keq, janë shënuar me dhjetëra raste, ku gruaja përveçse viktimë dhune, edhe pas vdekjes së saj ka qenë viktimë përgojimi, anashkalimi, mohimi, tjetërsimi e në fund harrimi.

***