Lara e “artë”, Italiania kuqezi sjell në Shqipëri një trofe dëbore

Lara Colturi nuk i ka thënë “jo” një ftese nga Shqipëria për të marrë pasaporte kuqezi dhe për të garuar në sportin e Skive me flamurin shqiptar. Fatkeqësisht sapo mori këtë medalje është dëmtuar në ligamentin e këmbës së djathtë. Nuk e pritëm 16-vjeçaren këtu siç kemi bërë me kampionët e tjerë para saj. Si është e mundur që një vajzë italiane të dojë të garojë me flamurin shqiptar? Të gjitha këto, Lara dhe familja e saj i tregojnë për revistën “Newsbomb.al” pa asnjë hezitim.Në malet e Torinos është rritur mes dëborës. I pëlqen shumë shpejtësia, adrenalina është pjesë e jetës së saj. Është lindur në Itali dhe ka marrë gjithçka prej shtetit tonë fqinj. Jeta e saj është si një “puzzle”, por i mungonte pjesa kryesore. Titulli kampion do ta plotësonte. Me Italinë nuk po i jepej mundësia ta bënte.

Lara Colturi ishte e bindur në aftësitë e saj. Nëna ishte trajnere dhe e dinte që vajza do të arrinte në piedestal. Gjërat e bukura vijnë në momentin kur nuk e pret. E kjo ndodhi dhe me Larën. 16-vjeçarja mori një ftesë për të përfaqësuar Shqipërinë në kampionatin botëror të të rinjve në Austri. Në rrëfimin e saj ekskluziv për revistën Newsbomb.al, bukuroshja zbulon ëndrrat dhe ditën e suksesit të madh.