Kurthi i kredive! Shqiptarët e varfër të joshur nga fajdet

33 institucione financiare JO Banka që “rrjepin” popullin, licensohen nga Banka e Shqipërisë. Interesa të larta kredie deri në mbi 140% në vit, komisione të shtrenjta, penalitete të papërballueshme. Këto janë kostot e mbijetesës së një pjese të mirë të popullit shqiptar me të ardhura të ulta. Për të plotësuar pagat, ata detyrohen të marrin kredi të shpejta, por që ju kushtojnë shtrenjtë në para dhe kohë

Argesa është një e re e mirëkualifikuar, por me një pagë që nuk ia plotëson dot dëshirat. Verën që shkoi, ajo rezervoi pushimet në Greqi, por nuk kishte arritur të mblidhte para mjaftueshëm. Në rrjetin social facebook pa një reklamë të sponsorizuar për kredi pushimesh në një institucion mikrofinanciar, jo bankë. “Kisha një situatë të tillë që nuk mund të merrja kredi në bankë. Plus banka kërkon disa dokumenta, ka shumë burokraci dhe pritje. Mua më duheshin shpejt paratë. Për tre ditë nisesha me shoqet për Korfuz”, – shpjegon Argesa. Mori 60 mijë lekë për të plotësuar shumën e parave që i duheshin për pushime dhe nënshkroi kontratën për ta kthyer shumën e huazuar pas një muaji me interes zero si klient për herë të parë.