Hemoragjia e BLUZAVE të BARDHA

Anemik dhe i pafinancuar, sistemi shëndetësor shqiptar po përballet me një tkurrje drastike të personelit mjekësor si pasojë e emigracionit. Në tre vitet e fundit pranë “Urdhrit të Mjekut”, rreth 500 mjekë kanë tërhequr “certifikatën e sjelljes së mirë” një dokument kyç për të ushtruar profesionin në vendin ku shkon, ndërsa pranë “Urdhrit të Infermierit” ky dokument është tërhequr nga 2 mijë infermirë. Aktualisht Shqipëria renditet ndër vendet e rajonit që ka më pak mjekë për banorë

Ai është shumë i ri në moshë, por lodhja, vështirësitë, bredhja me orë të tëra nga një familje në tjetrën, nga njëri fshat te tjetri, në shi e në borë, dimër apo verë, kur ka rënë dielli pas pllajave, apo kur ngrihet nga lindja tek prek lehtshëm shpatet e larta, i kanë shtuar disa vite jetë në pamjen e tij fizike.

Në fund, duhet të gjejë kohën të kthehet te vatra familjare, ku e presin dy prindërit, që e shohin si dritën e syve në atë fshat të braktisur tanimë prej të rinjve. Thuajse ka mbetur i vetëm, si i fundit i mojkanëve në atë zonë të thellë të Tropojës, në Lekbibaj.