IGLI CARA, durrsaku që do të ngrejë në fron Dyrrahun

Ka vetëm 4 ditë që festoi ditëlindjen e 54-rt, por nuk ka shumë kohë në dispozicion për të fikur qirinjtë e tortës. E ka lënë këtë proces të ndodhë në 14 maj, një ditë pas zgjedhjeve lokale ku vetë ai konkurron për të qenë kryetar i bashkisë së Durrësit. Igli Cara, durrsaku biokimist i shkencave të natyrës, që në fillimet e veta studentore kishte dhe ka pasion politikën meqë është një ndër studentët e dhjetorit ’90. Mik i jashtëzakonshëm me Sokol Olldashin, shok udhëtimi politik me të, mësoi shumë nga eksperienca politike e Kolit, angazhimi publik i gazetarit të dikurshëm që e kujton me mall, e pasioni i komunikimit me njerëzit. Sot ai e ka të qartë se arma e tij më e fortë për të fituar Durrësin, mbetet komunikimi me qytetarët. A do të arrijë Igli Cara, baba i dy fëmijëve (një djali dhe një vajze) që modelin e vet familjar, të qëndrueshëm dhe energjik, ta përcjellë edhe tek njerëzit, duke u kërkuar votën dhe duke i bindur ata që të besojnë tek projekti dhe vizioni i tij? Në këtë intervistë për Newsbomb.al, ish-deputeti i Kuvendit në dy legjislatura e ish-kryetari i PD së Durrësit thotë se demokratët folën me votë kur e zgjodhën në mënyrë plebishitare për primaret. Tani, u mbetet radha qytetarëve të Durrësit, që sipas Iglit, janë duke vuajtur ditë pas dite indiferentizmin e qeverisjes vendore dhe qendrore, anipse, nga krahu tjetër, deputeti me të cilin përballet është vetë Edi Rama. Por Igli e sheh kët garë si formulat që ka mësuar tek Shkencat e Natyrës: është momenti që të përzihen të gjithë komponentët e duhur për të sjellë freskinë dhe energjinë për qytetin. Dhe këto elementë janë shumë: mjafton të gjesh dozën e duhur. Igli e di shumë qartë këtë gjë, se veç eksperiencës së bankave të shkollës, ka tanimë energjinë dhe vizionin e një administratori të suksesshëm që nuk do ta lërë në baltë. Slogani “Për qytetarinë durrsake”, shkon përtej rregullimeve në makiazh të qytetit. Sepse Igli që në krye të herës thotë se do të duhet shumë punë në ditën e parë kur ai të jetë kryetar bashkie: më së pari ta ngrejë në fronin e mbretëreshës Durrësin turistik që e kanë ulur nga froni papërgjegjshmëria e strukturave lokale dhe korrupsioni galopant i qeverisë duke orientuar projektet në drejtime të tjera. Sepse Igli nuk mendon se megaafera e portit të Durrësit është për qytetin bregdetar. Ajo është thjesht një zhvatje e pronës së durrësakëve për të përfituar pushtetarët e korruptuar. Në këtë rrugë i janë bashkuar të gjitha forcat politike. Ka përballë vetëm PS e korruptuar sipas tij dhe ia numëron gafat: mbi të gjitha: tërmeti i dytë i vjedhjeve të shkaktuara pas tërmetit fizik që vrau qytetin. Ndaj merr guximin e thotë: Bashkë me durrësakët do tia dalim! “Durrësi ka nevojë për ndryshim, Durrësi ka nevojë t’i kthehet qytetarëve dhe qytetarisë”. Me këtë slogan u paraqitët ditën që shpallët kandidaturën për “primaret”. Përtej këtij vizioni, çfarë pritet t’u ofroni ju durrësakëve? Ndryshimi i qeverisjes në pushtetin lokal dhe në atë qëndror, është emergjencë kombëtare dhe për këtë, besoj jemi të gjithë dakord. Duket se jemi kthyer pas në kohë, pas 33 vitesh, situata na paraqitet e njëjtë si në vitet ’90, kur rrëzuam komunizmin e po frynte një erë e re demokracie. Regjimi i Edi Ramës është sot po aq i rrezikshëm sa dhe regjimi komunist, madje mund të themi që në disa drejtime është dhe më keq, është një regjim autokrat, antikombëtar, mafioz dhe druaj shumë, më kriminal se ai i Hoxhës. Gjithshka duket e degraduar. Shikoni qeverinë dhe qeverisjen e tyre, “one man shoë” dhe fasadë facebook-u dhe instagram-i… Pjesa tjetër, pa personalitet, pa përgjegjshmërinë e duhur publike dhe qytetare; skandale të mëdha dhe njëri pas tjetrit; kriminalitet i orkestruar; korrupsion marramendës; pasuri kombëtare të rrënuara e më pas të grabitura; vota e cënuar nga paraja kriminale që politika lëviz dhe për t’i vënë kapakun, më e rënda – shpopullimi i vendit. Por të kthehemi tek Durrësi më konkretisht, si është sot në vështrimin tuaj dhe të demokratëve që ju përfaqësojnë? Në vite ka humbur shumë nga identiteti i tij. U ndërtua në këto vite mbi gjurmët e trashëgimisë historike; u ndërtua në Kodër – Vilë, teksa historia e zhvillimit urban të qytetit na mësonte krejt ndryshe; u ndërtua ku na doli shesh e ku mundësisht të hidhej sa më shumë beton, u ndërtua sipas skicave të piktorit; ndërtuam velierën për të fshehur Torrën, shkulëm shatërvanin për pllakat e Rilindjes Urbane, humbëm plazhin historik të shqiptarëve, për betonin dhe nuk përfundon këtu. Ata që drejtojnë Bashkinë e Durrësit në këto 10 vitet e fundit, kanë qenë të kënaqur “të humbnin” garën e turizmit me Vlorën e Jugun. Mjafton që “lartmadhëria” të ishte i kënaqur, e kjo ndjehet jo vetëm në investimet që shkonin e shkojnë në Vlorë, por dhe në gjëra më të vogla si heshtja ndaj mediave që me urdhër godisnin turizmin e plazhet e Durrësit. Por Durrësi ka fituar dhe fiton çdo garë, për shkak të qytetarisë, dhe kur bëhet fjalë për turizmin. “Durrësi për qytetarët dhe qytetarinë”. Ky do të jetë lajtmotivi dhe kryefjala e asaj çka dua të bëj dhe të projektit që dëshiroj të sjell për qytetin tim. Projekt që do e ndaj ditë pas dite me durrsakët, të rinj dhe të vjetër, duke besuar shumë në qytetarinë e tyre dhe në ndihmën e Zotit për t’ja dalë të gjithë bashkë. Të kontribuosh për qytetin ku jeni lindur dhe rritur është ambicje shumë pozitive. Kush ju mbështeti më shumë në marrjen e vendimit për të kandiduar për kryetar bashkie? A keni patur ndonjë moment mëdyshje e hezitimi? Kam lindur në Durrës, jam rritur në rrugicat e tij, gjithçka që shënon jetën time lidhet me Durrësin dhe përtej mundësive që jeta krijon, do mbetem durrsak i përjetshëm. Të punosh për qytetin tënd, për ndryshimin pozitiv të tij, për transformimin e tij që ka në qendër qytetarinë, zhvillimin ekonomik e social; të synosh për të ndërtuar një perspektive lokale, kombëtare, rajonale dhe pse jo europiane të qytetit do të ishte një dëshirë a ëndërr për çdo qytetar të mirë në këtë vend, besoj shumë të jem një prej tyre. Hera herës, ne mendojmë që me vitet që ikin shterojnë energjitë tona pozitive, por Durrësi me bekimin që i ka fal Zoti dhe natyra ta jep mundësinë të gjenerosh pozitivitet e shpresë. Vendimi për të kandiduar për kryetar bashkie në zgjedhjet e 14 Majit nuk erdhi në një ditë, por përmes një procesi ku shumë e rëndësishme ka qenë mbështetja nga familja dhe miqtë e mi, qytetarët e Durrësit, demokratët dhe opozitarët e regjimit në Durrës e më gjerë, dhe natyrisht dëshira e shpresa në atë që duhet të bëj e të ndryshoj. Krahas mbështetjes nga demokratët e Durrësit, duket që emri juaj gjen mbështejen e fortë të LZHK, PR, BD, PDIU, PBDNJ, PAA, Nismës Thurje dhe sigurisht PL dhe Ilir Metës. Çfarë i bën t’ju mbështesin kaq fort dhe publikisht? Angazhimi im në politikë është i hershëm. Jam student i “Dhjetorit ‘90” dhe pjesëmarrës në grevën e urisë së studentëve. Ky moment përcaktoi për fat, apo rastësi, 30 vitet e ardhshme të jetës sime. Nga viti 2007 e deri më sot, angazhimi në jetën politike ka qenë publik përmes disa garave dhe fitoreve, që nisin në 2007 me Këshillin Bashkiak të Durrësit, Kryetar i PD së Durrësit, deputet i dy legjislaturave, për të vijuar më pas me një garë të fortë e vështirë të vitit 2021, ku modestisht mund të them që isha kandidati më i votuar i Durrësit nga opozita, për të ardhur në garën për kryetar PD më 2022 dhe në garën për primaret. Garat nuk janë të lehta, por janë ato që shënojnë jetën e një personi që debuton e kontribuon në politikë, që krijojnë vetbesimin, rrjetëzojnë marrëdhëniet dhe bashkojnë rreth teje njerëzit që të besojnë dhe që janë shumë të gatshëm të të mbështesin në këtë sfidë. Nga natyra, i pranoj njerëzit me mendimet e kundërshtitë e tyre. ‘Eshtë pragmatizëm’ mund të mendojë dikush nga ju. Mund të jetë kështu, por mund të jetë dhe ndryshe. Përpiqem të ndërtoj marrëdhënie që t’i rezistojnë kohës, përpiqem të shoh çfarë mund të bëjmë së bashku, shoh pozitiven përgjithësisht në ngjarjet dhe njerëzit, e përpiqem të ndërtoj ura bashkëpunimi. Opozita ka nevojë, më shumë se kurrë, të ketë dakordësi rreth personit që mbledh më shumë vota. Unë i jam falenderues e mirënjohës demokratëve që më votuan në primare, por dhe të gjithë partive të krahut opozitar me spektër shumë të gjerë që mbështesin kandidaturën time pa asnjë droje. Ju hyni tek miqtë e ngushtë të Sokol Olldashit, a duket që përmes kandidimit tuaj mbahet gjallë në PD fryma e tij mes demokratëve në Durrës e përtej tij? Përgjithësisht kur flitet për Sokolin, përpiqem të jem i rezervuar, për shkak të shumë emocioneve që figura e tij përcjell, të respektit që demokratët ruajnë për të dhe për mirënjohjen për forcën dhe karakterin e një burri e miku të rrallë si ai. Koli ka përcaktuar shumë në jetën time politike, fryma e një lideri si ai jep ende dritë në punët e përpjekjet tona, intuita dhe largpamësia e tij mbeten të pazëvendësueshme brenda PD-së, por ndoshta dhe në politikën shqiptare dhe duket që ai vit i mbrapshtë 2013, rrokullusi fate, jo vetëm personale, por dhe të Shqipërisë. Koli na sheh të gjithëve, shpresoj shumë në bekimin e tij për të fituar Durrësin këtë herë. Durrësi është një nga qytetet strategjike për zhvillimin e Shqipërisë, shumë i rëndësishëm për turizmin dhe transportin, dhe prej muajsh i përfshirë në debatin për Portin, ndërtimet e Alabar dhe Dubain e Ballkanit. Ju jeni shprehur e keni mbajtur qëndrim publik në lidhje me këtë çështje. Pse e kundërshtoni kaq fort? Çështja e Portit të Durrësit është mega-afera e fundit e kësaj qeverie, shumë më e madhe se afera inceneratorëve, ajo e rindërtimit dhe e koncensioneve mafioze të kësaj qeverie. Ajo çka kam theksuar në të gjitha daljet e mia publike, është që projekti i Marinës vjen pa garë, pa dëgjesa publike, pa transparencë dhe në thelbin e vet merr pasurinë kombëtare dhe ja bën dhuratë Alabarit për përfitime të aksionerëve Rama – Alabar & Kompani. Pra, merr tokën e Portit aktual dhe e vendos në funksion të këtij projekti. Besoj ju ka rënë rruga në Durrës dhe keni parë që në Zyrat e Autoritetit Portual Durrës, me pamje nga rruga, është ngritur ‘Zyra e Shitjes’ së apartamenteve imagjinare, që shiten ndërkohë që firma s’ka marrë ende lejen e ndërtimit! E gjithë shitblerja është një akt mafioz dhe në shkelje të hapur të ligjit. Ju e kuptoni që skema e funksionimit në këtë rast, është skemë e pastër piramidale, me bekimin e qeverisë. Mbledhin paratë e qytetarëve dhe fimave, për të nisur ndërtimin. Megaafera vijon më tej, porti aktual do të duhet të zhvendoset në Porto Romano, si pjesa e pasagjerëve ashtu dhe e mallrave dhe Porti i ri do të ndërtohet me taksat tona. Kosto e ndërtimit të Portit të ri, arrin në një vlerë rreth 2 miliardë euro, të cilat dalin nga xhepat e shqiptarëve. Nuk ka mendje normale që mund ta rrekë këtë që duan të bëjnë. Shtuar këtu që do falin dhe taksën e infrastrukturës për Alabarin, pra plus 231 milionë Euro të tjera që i ikin qytetit dhe investimeve e shërbimeve në të, për biznesin kriminal Rama&co. Durrësi si Dubai do të thoni ju? Po pse jo Durrësi si Bari, Ancona, Rimini, Napoli, apo Trieste? Modele duhet të kemi këto të Italisë fqinjë, një nga vendet më të bukura dhe turistike të botës, dhe me të cilën na lidhin aq shumë gjëra. Durrësi është qytet me histori e trashëgimi, me bukuri natyrore dhe porta më e madhe e të gjithë shqiptarëve në Adriatik. Pse do të duhet të humbim identitetin për të qenë Dubai? Durrësi sikurse Tirana kanë një të përbashkët të frikshme: Betonizimin! Ndërkohë që në vendet e zhvilluara flitet për green city, për një sërë treguesish mjedisorë e sociale çfarë do të bëjë zoti Cara për të përmirësuar cilësinë e jetës së qytetarit durrsak? Kjo është një pyetje që ju e shtroni politikisht, por që zgjidhet duke dëgjuar e ndërtuar plane përmes ekspertëve të mjedisit e planifikimit urban, me të cilët kam qëndruar shpesh këto kohë për të diskutuar “Durrësin e së ardhmes”. Të shkosh në BE, do të thotë që të mësosh nga strategjitë e saj, do të thotë që duhet konceptuar e implementuar infrastruktura e gjelbër, përmes planifikimit hapësinor dhe zhvillimit territorial, duke mbrojtur dhe përmirësuar natyrën dhe proceset natyrore. Duhen ndërtuar ekosistemet si në mjediset urbane dhe në ato rurale dhe për këtë modelet janë. Europa i ka konceptuar dhe zbatuar tashmë. Një problem që përsëritet sa herë që bie shi me rrëmbim është përmbytja e shumë zonave në Durrës dhe për këtë duhet menduar për inkorporimin e infrastrukturës së gjelbër, ose thënë në gjuhën e ekpertëve “kopshtet e shiut” për ta zbutur këtë risk dhe për ta mbledhur e trajtuar ujin e shiut. Një element tjetër që duhet të jetë prioritet për Bashkinë, në kushtet e ndryshimeve domethënëse klimaterike, do të ishin sheshet dhe taracat e gjelbëruara. Turizmi në vijën bregdetare të Durrësit është zhvilluar përmes investimeve të privatëve, por sektori vuan sot nga disa problematika, të cilat një pjesë shkaktohen nga politikat qëndrore e lokale, një pjesë e rëndësishme nga keqmenaxhimi apo mos menaxhimi i pushtetit lokal. A keni ju një plan dhe vizion në këtë drejtim? Turizmi mbetet sektori më i rëndësishëm në Durrës dhe falë investimeve të privatëve, në vitet e fundit mund të themi që po shkojmë drejt standarteve të hoteleve me 3, 4 dhe 5 yje. Cilësia e shërbimit dhe standardi në Durrës, ashtu siç shprehen ekspertët e fushës, është nga më të mirat në vend, por kjo nuk mjafton. Specifikë për turizmin e Durrësit është që sezoni shtrihet më gjatë se kudo në vijën bregdetare të Shqipërisë dhe kjo për shkak të afërsisë me Tiranën, Kosovën përmes Rrugës së Kombit, por dhe me Maqedoninë e Veriut. Plazhi i Durrësit, duket se na mbledh të gjithë dhe përgjatë gjithë vitit, por ka ende shumë për të bërë, me qëllim rritjen e peshës së sektorit, të ardhurave për bizneset dhe sigurisht dhe të ardhurat për Bashkinë e qytetin. Durrësi ka nevojë për një ofertë turistike të qëndrueshme, e cila nuk fokusohet vetëm tek turizmi diell & det. Durrësi ka nevojë që në ofertën e tij turistike të përfshijë trashëgiminë kulturore e historike, monumentet natyrore, kulinarinë dhe ushqimet lokale, por mbi të gjitha ka nevojë për një pushtet lokal që merr përgjegjësitë që janë jo vetëm ligjore, por dhe politike dhe qytetare. Turizmi së pari, duhet konsideruar si e mirë publike, dhe për këtë shumë e rëndësishme është ndjenja e ndërlidhjes mes njëri-tjetrit, kohezion mes grupeve të interesit për të prodhuar sinergjinë e duhur. Turizmi ka nevojë që të bëhet, shumë më tepër se të mbështetet me fjalë, foto në facebook dhe hallakatje ministresh e kryetarësh bashkie. Ai ka nevojë si për vullnet politik, ashtu edhe për investime të cilat synojnë qëndrueshmërinë në këtë sektor. Për këtë arsye, rritja e niveleve të investimeve të gjelbra në turizëm, jo vetëm në hotele, por veçanërisht në projekte infrastrukturore me fuqinë për të arritur një qëndrueshmëri më të madhe dhe për të ofruar mundësi dhe jashtë vetë sektorit mbetet një prioritet. Ne do të na duhet të zbërthejmë qëllimin e madh, në qëllime të vogla të qarta; të ndërtojmë qasje në afatgjatë, përkundrejt qasje aksidentale të cilat shkaktuan jo pak dëme; të kontribuojmë aq sa mundemi për të ndërtuar një sektor me standarde. Mendoj që bashkia ka mundësinë por dhe forcën për të kontribuar në sektor përmes formimit të burimeve njerëzore, ngritja e një HUB-i që formon punonjësit e sektorit, është një objektivat që ne kemi vendosur në programin tonë; për të vijuar më pas me konceptimin, marketingun dhe brandimin e Durrësit si destinacion turistik, e për ta mbylllur me digjitalizimin. Por natyrisht, turizmi lidhet dhe me shumë elementë të tjerë, furnizimi me ujë, përpunimi i mbetjeve, pastrimi i qytetit dhe njësive adminsitrative të tij, pastrimi i vijës bregdetare e mbrotja e detit nga ndotja, trafiku në qytet, niveli i ndotjes akustike. Të gjitha këto janë detyra e para të bashkisë. Por kjo mund të bëhet vetëm nëse përdor punonjësit siç duhet dhe jo si patronazhistë të sistemit të vjedhjes së votës dhe të blerjes së saj. Durrësi është qyteti, por jo vetëm, cili do jetë vizioni juaj për njësitë e tjera administrative? Reforma territoriale e Ramës, ndryshoi shumë gjëra në administrimin e komunave që sot konsiderohen njësi administrative të Durrësit. Në thelbin e vet, ajo çka ndodhi ishte përkeqësimi i shumë shërbimeve për qytetarët. Në programin tim për këto njësi administrative, primare do të jetë delegimi i kompetencave dhe kthimi në territor i një pjese të shërbimeve. Nga ana tjetër, këto njësi administrative zhvillojnë ekonominë e vogël të fermave. Shumë e rëndësishme për ta, është ngritja e qendrave të grumbullimit të produkteve bujqësore dhe mbështetja në trasportin dhe shpërndarjen e tyre. Projekti i rindërtimit, duket që vijon me problematikat e veta, por mbetet një çështje sensitive për durrrsakët. Një qëndrim juaji për këtë çështje? Projekti i rindërtimit dështoi së bashku me njeriun që e drejtoi dhe shefin e tij të “madhërishëm”. Projekti i rindërtimit jo vetëm që u kthye në një gjiriz korrupsioni për ata që e drejtuan në bashkëpunim me Bashkinë e Durrësit, por dhe pas më shumë se 3 vitesh, nuk zgjidhi problemin e gjysmës së familjeve që kanë humbur shtëpinë. Projekti rindërtimit mban në vështirësi mbi 4.200 nxënës që vijojnë të mos kenë shkollën e tyre, dhe enden drejt turneve të dyta në shkolla të tjera prej afro 4 sezonesh. Fushata ka nisur shpejt, ju keni që në dhjetor që lëvizni në të gjithë Durrësin, a mund të ndani 3-5 problemet më të sensitive që ndeshni në çdo zonë? Për të qenë i sinqertë, raportet e mia më qytetarët nuk fillojnë e nuk mbarojnë brenda fushatës. Sa kohë jam në politikë, mendoj që ndërveprimi me qytetarët, dëgjimi i halleve dhe problemeve të tyre, mbetet pika ime më e fortë. Besoj se njoh mjaftueshëm hallet e tyre të përbashkta që nuk marrin zgjidhje prej vitesh nga Bashkia, nga pastrimi i lagjeve të qytetit, ndriçimi dhe gjelbërimi i tyre, tek mungesa e këndeve të lojrave të fëmijëve. Problematik për Durrësin qendër dhe njësitë e tjera administrative mbetet transporti urban i qytetarëve, pa menduar për politika që mund t’i vinin në ndihmë njerzëve në nevojë dhe pensionistëve. Fushata do jetë e ashpër për shumë arsye, për opozitën është çështje “jetë a vdekje” në një farë mënyre pas vendimit të Gjykatës së Apelit të datës 3 Mars. Për socialistët mbajtja më çdo formë e territoreve. Si do të qaseni ju zoti Cara duke menduar që përballë jush në këto zgjedhje është një grua? Fushata për zgjedhjet e 14 Majit do jetë e egër, jo vetëm për arsyet që ju shprehni më lart, por sepse demokracia është në rrezik, e keqja dhe marrëzia e pushtetit të Rilindjes së Ramës kanë çuar në instalimin e një regjimi që po rrënon të gjitha liritë e të drejtat dhe gjithçka të mirë që ky vend me shumë përpjekje, kishte mundur të ndërtonte. Regjimi i Ramës, i zhytur në korrupsion dhe në afera brenda e jashtë vendit, sigurisht që ndjen e mat përmes sondazheve urrejtjen dhe pakënaqësinë popullore, e keqja ka shkuar aty ku nuk mban më, vatrat familjare po zbrazen ditë pas dite, tryezat e qytetarëve janë gjithnjë e më të varfra, të rinjtë nëse qëndrojnë nuk mundin ta ndërtojnë dot jetën e familjen e tyre, pensionistët nuk mbyllin dot muajin pa ndihmën e fëmijëve të tyre. Pushteti Rilindjes, qëndror e lokal e masakroi këtë vend e popull, prandaj beteja ime nuk është me një grua, por me të gjithë bandën e pushtetit që e ngjiti në atë karrike. Sa besim keni që në këto zgjedhje vendore do të jetë populli ai që do të vendosë? Këto zgjedhje janë shumë të rëndësishme për fatin e demokracisë në vend dhe unë mendoj se shqiptarët e kanë kuptuar këtë gjë. Tashmë ne jemi koshientë që qeverisja e Ramës, ka renditur Shqipërinë baraz me vende që janë në luftë dhe në halle të mëdha të brendshme. Për varfërinë e emigracionin renditemi të parët, për korrupsionin po ashtu, për mungesën e lirisë së mediave, por besoj jemi të parët për papërgjeshmërinë dhe arrogancën e qeverisë dhe për instalimin e një regjimi antishqiptar në mes të Europës. Në këto 33 vite të përmbysjes së regjimit komunist, Shqipëria nuk ka qenë kurrë më e pashpresë se sot (përfshi dhe 97, kur për shumë nga ju digjej e humbte paratë). Ne në një mënyrë a tjetër durojmë, por fëmijët tanë kanë marrë e po marrin vendime të ikjes pa kthim. Shpopullimi i vendit është akti më antikombëtar që qeverisja e Ramës ka bërë në këto 10 vite. Detyrë e çdo qytetari në 14 Maj është të lërë mënjanë mërzinë, protestat nga facebook-u e instagram-i, shfryrjet e ankesat në kafenë poshtë shtëpisë dhe të shkojë të votojë. Vota e secilit prej nesh bën ndryshimin e madh. Ky ndryshim duhet të ndodhë, pavarësisht se këto janë zgjedhje për pushtetin vendor. Votoni më 14 Maj, për t’u bërë ju pjesë e ndryshimit në lagjen tuaj, njësinë tuaj administrative dhe në qytetin tuaj. -Zoti Cara, ju sapo prekët që një nga problemet më shqetësuese në rang kombëtar është ikja e të rinjve, përmasat e ikjes tashmë janë dramatike, a keni menduar si ju nesër në pozicionin e kryetarit të bashkisë mund të kontribuoni në uljen e këtij fluksi? Para disa javësh, teksa me një grup të rinjsh diskutonim mbi integrimin evropian të Shqipërisë, më shkruan një gazetare që sot jeton e punon me familjen e saj në Itali. Mes të tjerave, më thoshte që Shqipëria e politika shqiptare nuk janë integruar, shqiptarët po, shumica kanë mundur të bëjnë një karrierë, të çojnë përpara familjen, fëmijët e tyre sigurisht tashmë ndjehen europianë, por gjithsesi i mungon lidhja me rrënjët e tyre. Ndërkohë që uroj më të mirën për shqiptarët kudo janë, situata e këtyre viteve të fundit në lidhje me emigracionin nuk ngjan me asnjë tjetër të periudhës së tranzicionit. Jemi në kushtet e një politike, që në heshtje ka vepruar në drejtim të shpopullimit të Shqipërisë. Ikja e shqiptarëve tashmë është e heshtur, tejet e dhimbshme, nuk ka shtëpi nga Veriu në Jug që nuk ka njeri në emigracion. Po të shihni me kujdes, pranë bar-kafeve të lagjeve ku jetojmë ka gjithnjë e më pak të rinj, kudo ka më pak të rinj, bizneset sot nuk arrijnë të plotësojnë nevojat e tyre për punonjës në pozicione krejt bazike, ndërkohë që profesionistët e rinj dhe të talentuar duket që e kanë gjetur e po e gjejnë vendin e tyre tjetërkund. Duket një ikje nga mungesa e shpresës dhe mungesa e dëshirës për të luftuar që gjërat të ndryshojnë. Ftesa ime për të rinjtë është që të bëhen pjesë e ndryshimit, të bashkohen në projektin që bën Durrësin qytet të qytetarisë dhe që do të nisë me kthimin e bashkisë tek qytetarët e saj. Të rinjtë do jenë propozuesit e politikave lokale për rininë, artin, kulturën, turizmin dhe ekonominë lokale e më gjerë. Të rinjtë do të kenë pjesëmarrjen e tyre në Këshillin Bashkiak dhe në drejtimin e drejtorive kryesore të Bashkisë, të rinjtë janë partnerët kryesorë të opozitës në këtë fushatë. Të rinjtë do të jenë misionarët tanë për shpëtimin e vendit. Besoj shumë që me përkrahjen e tyre do shkojmë përpara e do përpiqemi të ndryshohmë Shqipërinë. Si politikan padyshim keni shumë objektiva dhe sigurisht mund ta themi hapur edhe premtime. Por, pse duhet votuar Igli Cara si kryebashkiak i Durrësit në zgjedhjet e 14 Majit? Besoj që kjo pyetje tashmë e ka marrë përgjigjen. Igli Cara duhet votuar për ndryshimin, duhet votuar për një kontekst lokal që shkëputet nga bandat dhe mafia, për një perspektivë më të mirë lokale. Bashkinë duhet t’ja kthejmë qytetarëve dhe qytetarisë durrsake, le të jetë ky lajtmotini ynë. Duke ju falenderuar për kohën dhe angazhimin tuaj për këtë intervistë, besoj shumë që me bekimin e qytetarëve të Durrësit dhe Zotit do tia dalim me 14 Maj.

IGLI CARA, durrsaku që do të ngrejë në fron Dyrrahun

Nga Ilir Xhafaj

Artikuj të ngjashëm Artikuj

Mission Complete! Shqiponjat shtegtojnë në Gjermani

Ermal Dredha/ Vlora pret Kombëtaren t’i dorëzojë Flamurin

“Uno kryqzimo”, kush është lushnjari që bëri “Gol” me banderolën

Aurora Dibra nxjerr nga “Kutia e Errët” historinë tragjike të jetës së saj

Myfarete Laze, rrëfim për një kohë të ndaluar

Dëshmorët nën dhe bërtasin: NDAL, TOKË E LYER ME GJAK

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

“Krenaria e Kuçovës”, uzina e “shqiponjave” në qiell

Mario Ashiku, një dashuri, shanse të dyta dhe një jetë e jetuar bukur (si vetë ai)

Inva Mula: Unë sopranoja e parë shqiptare në skenat evropiane

Aldor Nini, grabitqari i artit shqiptar dhe fjalës së lirë

Nano, beteja e një jete

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

IGLI CARA, durrsaku që do të ngrejë në fron Dyrrahun

Nga Ilir Xhafaj

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?