HUBMËSI, Si u fundos anija e Lulzim Bashës, 17 vite pas aktivizimit në politikë

Si u fundos anija e Lulzim Bashës, 17 vite pas aktivizimit në politikë. Vetmia e madhe, dhe rezistenca për të mos lëshuar karrigen e Kryetarit. Detaje të panjohura nga mbledhjet me tension e grushta. Një raport i plotë i revistës Newsbomb për zhvillimet dramatike në Partinë Demokratike Nuk dihet ende fati i asaj karrigeje plastike që Lulzim Basha hodhi në ajër në Durrës në javën e fundit të shkurtit, një gjest simbolik revolte, por e sigurtë është se ai është ngjitur keqazi pas poltronit të tij, aq sa po e çon habinë e njerëzve në nivele të panjohura më parë. Me lëvizjen kalorsiake në qytetin bregdetar për të cilën u kujdes të ishte live në sytë e publikut, Basha ka sjellë një shembull të ri të paradoksit. Sepse po bën krejt të kundërtën e asaj që kumtoi. 47 vjeçari që hyri në politikë në vitin 2005 si një yll në ngjitje, që na tregoi të gjithëve anën e tij europiane, ka harruar papritur se çfarë është përgjegjësia. Ndoshta edhe e ka mësuar dhe e ka dhënë provim si student i Utrechtit në Holandë, por nuk i kujtohet më. Ka humbur kontaktin me botën, dhe qëndron deri në marrëzi në katin e dytë të selisë së PD, aty ku shkruhet Kryetari. Pasi mori mesazhin nga shqiptarët se nuk e duan t’i qeverisë, me 25 prill të vitit të kaluar, ai vijoi të furnizohet me të tilla njoftime. Së fundmi, me 6 mars, me zgjedhje të organizuara nga KQZ, zyrtarisht demokratët i thanë të largohet. Mirëpo, ai, me gjithë predikimet për reflektim e gadishmëri për çdo zgjidhje, në asnjë çast deri mes të Marsit, nuk e ndërmori hapin që po ja kërkojnë të gjithë. Ndoshta sot largimi i Bashës është një prej gjërave që gëzon konsensusin më të madh publik në vend. Gjithnjë e më vetëm Tanimë Bashës i kanë ngelur shumë pak mbështetës. Ata me të vërtetë numërohen me gishtat e dorës. Fortesa kryesore, Grupi Parlamentar i ra. Vetëm 4 deputetë duket se janë në anën e tij. Edhe ata flasin për një hap pas, dhe janë Enkeleid Alibeaj, Jorida Tabaku, Oriola Pampuri dhe Gazment Bardhi. Shumica kanë kërkuar largimin e menjëhershëm, madje me tone të larta, në mbledhje maratonë që rrotullohen rreth të njëjtit togfjalësh, “jep dorëheqjen”, pa prodhuar më tej ndonjë moment politik, të paktën deri ditët e fundit. Ata i kanë kërkuar të ikë. Me thellimin e debatit, mund të shkohet deri tek një vendim për shkarkimin e tij si anëtar i Grupit Parlamentar. Ky padyshim do të ishte një knock-out, i parikuperueshëm. Por, sërish, skeptikët kanë nisur të besojnë se ai mund të vijojë të qendrojë. Nuk ikën, thonë vëzhguesit e mprehtë të ngjarjeve në PD. Kryetarët e degëve, ishulli i fundit Janë pikërisht kryetarët e degëve të PD në Tiranë dhe në rrethe që po mbajnë me oksigjen një lider tashmë të rrënuar. Në takimet që janë shpeshtuar kohët e fundit, ata i kërkojnë të qendrojë. Madje, janë hedhur në sulme të forta ndaj të tjerëve, duke fajësuar kryesisht deputetët për rezultatin turpërues të 6 marsit. Krerët e degëve, për të cilët mund të thuhet se nuk përfaqësojnë më shumë se veten e tyre, pasi strukturat u kanë ikur me kohë, nuk kanë ndonjë tezë politike, dhe nuk e mbështesin këtë qendrim në ndonjë argument. Gjasat janë se ata mund të kenë atë shkëndijë në kokë, që erdhi momenti i tyre, dhe kërkojnë të mbajnë selinë dhe logon, me Bashën në krye. Mirëpo, se ku do t’i çonte ky rrugëtim, kur tanimë është konfirmuar kuota pak më shumë se 10 përqind e PD, ata duket se refuzojnë ta shqyrtojnë. Me emrin domethënës, Kolegji i Kryetarëve, ky duket se po kthehet në ishullin e fundit për të mbajtur në këmbë Lulzim Bashën. Mbledhje të mërzitshme me tone të larta dhe hedhje shigjetash të helmëta ndaj deputetëve, zgjasin deri në mesnatë. Goditja e 6 marsit Që Sali Berisha me kandidatët e tij të regjistruar në siglën Shtëpia e Lirisë, do të merrte më shumë vota se Lulzim Basha, në zgjedhjet e pjesëshme lokale të 6 marsit, në 6 bashki, kjo pritej. Madje ishte bindje, dhe nuk qenë shumë të nevojshme në këtë rast ato sondazhe që dolën. Por, disa mendonin dhe besonin se sidoqë të jetë, me logon zyrtare të PD, kandidatët e Bashës të paktën do të konkuronin do të ishin në lojë. Por doli një dramë elektorale. Sali Berisha, mori Bashkinë e Shkodrës, dhe në total gati 3 herë më shumë vota. Sali Berisha - 61 mijë e 178 vota, ose 69.7% Lulzim Basha – 26 mijë e 662 vota, ose 30.3% Totali i votave të djathta – 87 mijë e 840 vota. Ndërsa, sa i takon përqindjes referuar rezultatit me gjithë pjesëmarrësit në zgjedhje, ku sërish triumfoi me lehtësi PS e cila gjendet në vitin e 9-të të qeverisjes, Berisha rezulton në kuotën e rreth 30 përqind, ndërsa Basha në 13%. Sigurisht, vetëm kjo shifër do të mjaftonte për të mbyllur të gjitha debatet e për ta detyruar Kryetarin e PD të jepje dorëheqjen. Kjo shifër tregon pamundësinë absolute që ka Basha jo vetëm për të ardhur ndonjëherë në pushtet, por edhe për ta mbajtur opozitën. Lulzim Basha është munduar që në krye që ta reduktojë rolin e kësaj përballjeje zgjedhore. Ai u përfshi direkt në fushatë vetëm javën e fundit, dhe më tej, pasi peshorja anoi dukshëm nga Berisha, i ka cilësuar ato si kurth. Dhe e paprecedentë kjo, duke qenë se çdo kryetar opozite kudo në botë, edhe kur nuk ka zgjedhje sado të vogla e të pjesëshme, i kërkon dhe i provokon ato. Debate dhe grushta Në mbledhjen e Grupit Parlamentar të 12 marsit, kishte shumë tension. Tanimë, largimin e Bashës e kërkojnë edhe ata që kanë qenë mbështetësit e tij më të njohur. Një prej tyre, Ervin Salianji. Ai është përplasur fort verbalisht me deputeten Oriola Pampuri, e vetmja që vijon ende të mbrojë me energji kryetarin dhe që kërkon që ai të qendrojë. Duket se kjo ka sjellë reagimin e ashpër të Salianjit dhe gjakrat janë nxehur shumë. Është dashur ndërhyrja e Bashës, i cili e ka marrë nga krahët Salianjin për ta nxjerrë jashtë sallës në një përpjekje për ta qetësuar. Por në këtë e sipër, është shfaqur aty, militantja tashmë e njohur, Violeta, e cila ka shkarkuar një të djathtë të fortë në fytyrën e Ervinit. Eshtë futur Basha në mes që sherri të mos përshkallëzohej edhe më keq. Grida Duma e ka shprehur revoltën duke u ngritur në këmbë, duke përplasur fort tavolinën dhe duke thyer një gotë. Por nuk ka mbaruar gjithçka aty. Familjarët e Pampurit që kanë mësuar për incidentin, kanë vrapuar në seli, në kërkim të Salianjit. E gjitha kjo flet për një situatë të paprecedent, të turpshme, në godinën e partisë që solli demokracinë, dhe që e qeverisi vendin për 13 vite në këto 3 dekada. Basha nuk mund të rezistojë gjatë Nëse sot që ka dalë revista në treg, ai vijon të jetë ende kryetar i Partisë Demokratike, ky do të ishte lajm. Të gjitha kuturisjet duket se janë për të fituar kohë. Po kohë për çfarë? Cila është zgjidhja që ka ai në mendje, kur thotë i hapur për secilën. Me zhvillimet e fundit, Lulzim Basha nuk është në rrethanat për të vendosur kushte. Sepse artikulimet e tij bëjnë të ditur se ai mëton të marrë me vete edhe Sali Berishën. Nëse do të kishte me vete Grupin Parlamentar, Këshillin Kombëtar, apo forume të tjera, ndoshta Lulzim Basha do të mund të imponohej në ndonjë negociatë me Sali Berishën. Të cilin, për herë të parë duket se po e konsideron. Pas 9 shtatorit, gjithnjë e më shumë e cilësonte atë dhe përkrahësit e tij, si një pakicë të zhurmshme dhe të dhunshme. Kjo veçanërisht pas 8 janarit, kur ndodhi dhuna e palavdishme në selinë e PD. Mirëpo, kohët e fundit, Basha ka nisur të flasë për 3 pjesë që duhen bërë bashkë. Një pjesë supozohet që është ai, tjetra Grupi Parlamentar tanimë jashtë kontrollit të tij, por edhe i paatashuar me Berishën, dhe pjesa e tretë, ajo e liderit historik. Në këto kushte, gjithkush beson se Basha nuk do të mund të rezistojë gjatë. Ai tanimë është bërë subjekt talljeje dhe qesëndie në çdo ambjent ku flitet për politikë. Dhe po ashtu, frymëzimi më i madh i atyre që prodhojnë meme. Vendimi i Gjykatës Brenda muajit pritet vendimi i Gjykatës së Tiranës, një moment që me gjasë do t’i jepte fund të gjithë kësaj tollovie. Çështja është në dorën e gjyqtarit Agron Zhukri. Njerëzit e Berishës kanë shumë besim se vendimi do të jetë në favor të tyre. Bëhet fjalë për njohjen ose jo të Kuvendit të 11 dhjetorit, ku delegatët e Kuvendit të thirrur nga lideri historik, morën vendimin për shkarkimin e Bashës. Një vendim i Gjykatës që e njeh këtë Kuvend, i jep fund të gjitha hamendësimeve, dhe rezistencës së Lulzim Bashës për të qendruar akoma. Ata që janë marrë me përgaditjen e dosjes, i thanë revistës Newsbomb, se do të ishte shumë e vështirë për çdo gjyqtar të merrte një verdikt tjetër. Sipas tyre, janë materiale voluminoze që vërtetojnë me emër me mbiemër, me dokument identifikimi, me foto dhe me video, dhe me nënshkrim, që provojnë se kanë qënë prezent delegatët e duhur të Kuvendit, për ta mbledhur e për ta marrë atë vendim që u mor. Amerikanët, ku? Ambasada amerikane, dhe sidomos zonja Kim, i dhanë mbështetjen e plotë Lulzim Bashës në sfidën e 6 marsit. Përfaqësuesja e Uashingtonit u shpreh hapur një javë para zgjedhjeve se kandidatët e mbështetur nga personi non-grata, (Sali Berisha) nuk duheshin votuar. Nuk munguan edhe ndërhyrjet nga përtej oqeanit, të zotit Escobar. Ishin qartazi në krah të Bashës. Kjo mesa duket i jepte shpresë kreut të PD se do të dilte me rezultat të mirë. Mirëpo, ndodhi ajo që ndodhi. Prej 6 marsit, kur Berisha duket se sfidoi hapur edhe triumfoi edhe mbi Ambasadën Amerikane, zonja Kim nuk ka bërë asnjë deklaratë. Akti i tyre për ta larguar Berishën nga politika, duket se nuk u pranua nga qytetarët, e veçanërisht nga demokratët. Fitorja e Bashkisë së Shkodrës nga lideri historik, jo vetëm e rifuti Berishën në skenë, por me gjasë i ka dhënë edhe më shumë energji për të ndjekur kursin që ai ka shpallur, që është marrja e drejtimit të PD dhe rikthimi në pushtet.

HUBMËSI, Si u fundos anija e Lulzim Bashës, 17 vite pas aktivizimit në politikë

Artikuj të ngjashëm Artikuj

Nano, beteja e një jete

Zonjat e “Prime Time”

Saga e dhimbjes e familjes MULLETI

LILI CINGU, KËMBËT QË VALLËZOJNË ENDE

Një “gjuetar goli” si Jasir Asani

Tigri nxjerr dhëmbët, drejton gishtin drejt Veliajt

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Tigri nxjerr dhëmbët, drejton gishtin drejt Veliajt

Gjiri i Kakomesë, “Bukuroshja” e braktisur bëhet gati për TURIZËM

MARK PALNIKAJ, INXHINIERI QË “ZHVARROS” ARKIVAT E VATIKANIT

Inva Mula: Unë sopranoja e parë shqiptare në skenat evropiane

Kombinimet e shtatorit dhe rikthimi në fëmijëri…

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

HUBMËSI, Si u fundos anija e Lulzim Bashës, 17 vite pas aktivizimit në politikë

Si u fundos anija e Lulzim Bashës, 17 vite pas aktivizimit në politikë. Vetmia e madhe, dhe rezistenca për të mos lëshuar karrigen e Kryetarit. Detaje të panjohura nga mbledhjet me tension e grushta. Një raport i plotë i revistës Newsbomb për zhvillimet dramatike në Partinë Demokratike

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?