HISTORIA E GRUAS SHQIPTARE/ Nga perçja te teatri, nga malet tek vota

Gruaja shqiptare si pronare skllevërish në antikitet, në skllave e kanunit të Lek Dukagjinit! Në fillim të shekullit të XX doli dekreti për heqjen e perçeve, më vonë kërkoi të punësohej në shtet. Çfarë shkruan shtypi i kohës për vajzat e para të teatrove. Martesa përrallore në Durrës e vajzës së deputetit. Nga skenat e teatrove drejt luftës e më vonë, për herë të parë me votë në zgjedhjet e 1945 – një rrugëtim me emancipimin e grave shqiptare

Historia e Shqipërisë është e lidhur ngushtë me historinë e rolit të femrës shqiptare. Uljet e ngritjet e saj, hijet e shkëlqimet, shtypjen e mohimit të të drejtave, me pjesëmarrejen në luftë e në kuvende burrash e të tjera ngjarje.

Në kohë e epoka të ndryshme, shumë gra shqiptare kanë thyer Tabu edhe pse në kushtet e një varfërie paditurie të tejskajshme. Duke filluar nga Mbretëresha Teuta, Donika Kastrioti, Bubulina, Elena Gjika, motrat Qiriazi, Marigo Posion, Shote Galicën, Musine Kokalarin, Tefta Tashko Koçon e artiste të ndryshme amatore që u ngjitën për herë të parë në skenat teatrale të vendit, për të ardhur tek ato qindra femra partizane që luftuan maleve për lirinë e Atdheut gjatë LIIB. Roli i gruas në shoqërinë shqiptare ka ndryshuar ndër vite e dekada, ndikuar kjo nga faktorët historikë dhe ekonomikë në të cilat ka kaluar Shqipëria.