Fashion BOMB

NË PRANGAT E MODËS

A nuk po e ndjeni edhe ju se trendet dhe stili po dominojnë botën më shumë se kurrë? Po dominojnë, jo vetëm mënyrën se si vishemi, por edhe trendet e dizajnit të shtëpive deri tek sjellja e njerëzve. Sot moda është e guximshme, duke reflektuar një gjeneratë që nuk ka frikë të shprehë lirisht mendimin, aq më pak ta shprehin këtë duke veshur çfarë duan. Moda sot nuk është vetëm veshje e trupit, është një esencë e personalitetit dhe besimit, dhe ky është lajm i mirë. Moda mund të ndryshojë nga një sekondë në tjetrën, madje ju them me bindje se deri në fund të shfletimit të faqeve në vazhdim, minimalisht 3 trende të reja janë përditësuar. Të jesh “përpara” modës, manifestohet si arritje, e të jesh shumë përpara mund të jetë po aq e keqe sa të jesh pas saj! Nëse jeni “shumë përpara” njerëzit do të mendojnë se ajo që vishni nuk është në modë, sepse nuk është ende! Prandaj mbani shënim, që mos të ndiheni kurrë si në garë: Trendet rikthehen. Mund të zgjidhni të jeni “përpara” në çdo kohë, duke ricikluar gardërobën çdo sezon. Mos u bëni prè e *fast fashion – modës së shpejtë. Me këtë nënkuptoj të shmangni bluzat me logo të dukshme dhe printe me kontraste të forta. Investoni në veshje pa kohë. Copa natyrale dhe ngjyra neutrale, që të japin mundësinë të luani e të krijoni pamje të reja, çdo ditë. Çfarë nënkuptoj me këto, i gjeni në rubrikat 10 MUST – 10 Produktet esenciale që nuk duhet t’i mungojnë gardërobës tuaj, dhe Trendet e muajit –që i kanë rezistuar kohës e më shumë gjasa do të vazhdojnë… Fashion Bomb është një dritare me sugjerimet më aktuale, e shpejtë, e drejtpërdrejtë dhe ndërsa moda bën punën e saj, ju inspirohuni në faqet në vazhdim, dhe zgjidhni me cilën nga alternativat do përkëdhelni veten këtë muaj. Sepse e meritoni apo jo?