Hola Albania! Melias Hotels mbërrin në Shqipëri, destinacion pushimesh i pazbuluar

Hola muchacho, Hola Chico! Muy Caliente! La belleza del Sol! Paella!...E pse këto fjalë spanjisht? Prisni dhe dy vite dhe spanjishtja do të jetë gjuhë e turizmit shqiptar. Grupi lider i resorteve të pushimeve më i rëndësishëm në botë dhe më i madhi në Spanjë, Melia Hotels International, erdhi në Shqipëri. Ashtu pa bujë, në një punë që ka filluar 4 vite më parë dhe që po finalizohet këtë vit, me marrëveshjet e firmosura nga grupi Melia me 7 struktura hoteliere të rëndësishme në vendin tonë. Në Shqipëri, shprehja “Shtëpia është e Zotit dhe e Mikut” është bërë mëse e zakonshme kur flitet me të huajt. Por ama, në bisedë me CEO-n 51 vjeçar të grupit spanjoll Melia, të duket, se kemi si vende Shqipëria dhe Spanja, më shumë të përbashkëta sesa gjëra të ndryshme dhe ai ndihet si në shtëpi. Gabriel Escarrer Jaume, është sot miliarderi më i famshëm spanjoll, pas “pasurisë e përkushtimit për punën” që e trashëgoi nga i ati. Tek hotelet “Melia” puna në grup, si një familje e madhe është shumë e fortë. Kështu trajtojnë edhe marrëdhëniet me bashkëpunëtorët e tyre kudo në botë, sikurse Gabriel tregon në revistën Neësbomb.al për ardhjen këtu të rrjetit të hoteleve turistike më të famshme në botë. Por edhe Shqipëria është një vend mesdhetar, sikurse Spanja; madje-madje, në demokraci, hapja e tregut televiziv, solli kaq shumë telenovela spanjolle a meksikane, sa shumica e shqiptarëve filluan ta kuptojnë e flasin sadopak gjuhën; e fjalë të bukura, t’i përfshinin në zhargonin e përditshëm. Mandej, plazhet ndjellëse spanjolle kanë qenë për shumë vjet destinacion për pushuesit shqiptar. Gabriel Escarrer tregon në intervistën për Neësbomb.al se në vizitën e tij të parë në vend, Shqipëria me bregdetin e vet në Adriatik e Jon i pëlqeu shumë. Dhe do të jetë një destinacion për miliona e miliona pushues që qarkullojnë në rrjetin e hoteleve Melia nga mbarë bota. Por puna, sipas Gabriel do të përqëndrohet pikërisht te stafet shqiptare që do të marrin trajnimin e duhur edhe nga personeli më i kualifikuar i kompanisë. Platformat online e-Melia do të jenë një mundësi tjetër trajnimi dhe edukimi për stafet shqiptare. Jo vetëm kaq, por krerët më të lartë të pushtetit qendror e vendor, pas takimit që patën me gjithë bordin drejtues të Melias Hotels, do të kenë mundësi të shohin konkretisht se çdo të bëhet. Për ne, mjafton të presim dhe ca kohë, që të shijojmë. Sa më shumë investime të huaja në vend, aq më i sigurt do të jetë edhe biznesi shqiptar. E kështu, do ecin paralelisht në sfidën e mundimshme e të parealizuar deri tani për turizmin e mesëm e elitar. Gabriel mendon dhe shpreson, se kjo do të bëhet e Shqipëria do të jetë një destinacion jo vetëm për vendet e rajonit, por edhe për tregun e turizmit ballkanas, evropian e ndërkontinental. Escarrer ju falenderojmë shumë për këtë intervistë ! Me një numër prej 350 hotelesh në 40 vende, Melia Hotels International është lider në resortet e hoteleve në botë dhe grupi më i madh në industrinë e turizmit në Spanjë. Si Shqipëria ashtu dhe Spanja janë vende Mesdhetare. A është kjo një ndër arsyet përse keni zgjedhur Shqipërinë si një vend për të zhvilluar biznesin më tej? Ne mbajmë një rekord historik prej 65 vitesh në rrjetin e hoteleve të relaksit dhe mbetemi akoma një ndër kompanitë kryesore turistike ndërkombëtare. Si i tillë, ne gjithmonë kemi pasur prioritet rritjen në destinacionet kryesore të pushimeve, duke u përqendruar në atë që ne e quajmë "boshti i pushimeve", i cili përfshin vendet nga bregu meksikan i Paqësorit, Karaibet, zona e Mesdheut - duke përfshirë veriun e Afrikës dhe Ishujt Kanarie - vendet e Lindjes së Mesme dhe vendet e Azisë Juglindore. Për sa i përket Shqipërisë, ne mendojmë se vendi është destinacioni i fundit i pazbuluar i pushimeve në Evropë, dhe ai ndërthur të gjithë përbërësit për ta bërë destinacionin tërheqës dhe konkurrues, dhe përveç kësaj, ne kemi parë një angazhim serioz të sektorit publik dhe privat ndaj turizmit ndërkombëtar, që është kyç për ndërtimin e një historie të re suksesi në Mesdhe, ashtu siç ndodhi shumë vite më parë me vendet e tjera evropiane. Me aq sa njihni vendin tonë keni krijuar një perceptim tuajin, për popullin shqiptar, motin, ushqimin, kulturën tonë? A mendoni se është një vend interesant për të tërhequr turistët dhe vizitorët? Megjithëse shpresoj ta njoh më mirë në një të ardhme të afërt, me sa kam parë dhe përjetuar, Shqipëria ka një gastronomi shumë mesdhetare, shumë interesante, bazuar mbi produktet tona tradicionale nga bujqësia dhe deti, por edhe të frymëzuar nga Mesdheu më lindor. Njerëzit janë të afërt, të dashur dhe fisnikë, dhe kjo është gjithashtu shumë e rëndësishme për të ndërtuar një industri turistike solide. Përsa i përket gjeografisë dhe motit, ju keni një rivierë të mrekullueshme dhe brigje mbresëlënëse në Adriatik dhe Jon, që nuk janë akoma aq të shfrytëzuara. Para disa javëve, ju dhe një delegacion i nivelit të lartë të Melia-s vizituat partnerët dhe hotelet tuaja në Shqipëri si Melia San Pietro Resort, Sol Tropical Resort, Gran Melia Tirana (ndërtesa Eyes of Tirana). Sa e rëndësishme është për ju që të mbani të njëjtat standarde të MHI-së në të gjitha hotelet tuaja? A jeni të lumtur pas vizitës në terren? Isha jashtëzakonisht i lumtur për vizitën tonë në Shqipëri, sepse jo vetëm që kishin të gjitha vendndodhje të jashtëzakonshme, por dhe për shkak të cilësisë së produkteve dhe projekteve arkitektonike dhe ndërtimore. Zhvillimi në ditët e sotme është një avantazh konkurrues për vendin tuaj, sepse të gjithë kemi mësuar shumë mbi sesi duhet të jetë një model i balancuar dhe i përgjegjshëm turistik. Bashkëpunëtorët tanë të parë në vend, “Concord Investments Group” janë në fazën e fundit të punimeve të hotelit spektakolar Melia San Pietro që vërteton vizionin e qartë që në fillim të këtij bashkëpunimi dhe të prezencës tonë në Shqipëri. Ndërkohë që “Sol Tropical” tashmë ka hapur dyert dhe po mirëpret klientët e parë tanët në vend me standartet e brand-eve tona. Një tjetër investim serioz dhe bashkëkohor që vitin e ardhshëm do të jetë në menaxhim të plotë nga Melia. Falenderoj për besimin që familja Dulaku pati me ne dhe u them që realisht janë duke bërë një punë të jashtëzakonshme me këtë projekt. Më duhet të them se pas marrëveshjeve tona të fundit, ne do të operojmë hotele të 5 markave tona në Shqipëri: 2 hotele “Filiale të Meliás”, në Berat dhe Tiranë, 1 hotel Meliá Collection në Dhërmi, 2 hotele Sol, në Durrës dhe në plazhin e Karpenit, 1 Meliá në Durrës dhe 1 Gran Meliá në Tiranë. Kjo bën një hyrje perfekte në vend për kompaninë tonë, dhe sigurisht, ne përpiqemi të ruajmë standardet e markës kudo që shkojmë, megjithëse në të gjitha rastet përfshijmë një "lidhje të veçantë" ose detaj me destinacionin, i cili është në përputhje me vendosjen e një dizajni, shërbimi dhe përjeton standarde të përbashkëta. Jeni optimist për projektet e reja si Melia Collection Hotel Altea në Dhërmi, Sol FAFA Golem dhe Hotel Tomori affiliated by Melia (Berat), Hotel Eliza affiliated by Melia (Tiranë)? Mendoj se janë produkte të mahnitshme, secili në stilin e tij të ndryshëm; ndërsa Hotel Tomori si filial i Meliá dhe Eliza si filial i Meliá do të jenë dy shembuj të përsosur të hoteleve "bleisure" (me anë të cilës ne kuptojmë një hotel të fokusuar si në biznes ashtu edhe në argëtim, një formulë "për argëtimin urban" që kërkohet gjithnjë e më shumë në shumicën e qyteteve të njohura në mbarë botën, dhe që synojmë t'i prezantojmë në Shqipëri). Nga ana tjetër, Sol Fafa Golem do të jetë eksponenti i përsosur i mikpritjes gjatë pushimeve, në të cilin ne ende besojmë fort, megjithëse përfshin një propozim të rinovuar dhe më me vlerë, sepse hotelet e relaksit në ditët e sotme duhet të ofrojnë shumë më tepër se “diell dhe plazh”, nëse ata duan të jenë konkurrues dhe të suksesshëm në planin afatgjatë. Përveç kësaj, do të operohet nga grupi “Fafa”, operator me shumë eksperiencë në destinacionet resorte shqiptare. Prania juaj në Shqipëri është në zonat më të rëndësishme turistike: në bregdet-Melia San Pietro Resort, Sol Tropical Resort në Durrës; në jug të Shqipërisë - Hotel Altea Melia Collection në Dhërmi; në qendër të Tiranës - Hotel Gran Melia në godinën Eyes of Tirana; hoteli i qytetit - Hotel Eliza filial i Melia; Hotel Tomori Filial i Melia, në qytetin e Beratit (Trashëgimi Botërore e UNESCO-s); bregdeti i Kavajës - Sol FAFA Golem; A është pjesë e strategjisë së Melias që të ketë një prani të madhe në vende të ndryshme të rëndësishme të vendit? A do të kemi më shumë surpriza në të ardhmen e afërt? Siç e përmenda, ne jemi një kompani hoteliere globale e lindur si një kompani resortesh, dhe ne jemi ende një nga kompanitë lider në këtë aspekt, kështu që fokusi ynë strategjik është gjithmonë, me përparësi, në zonat turistike dhe në ato qytete turistike ku njerëzit presin gjithnjë e më shumë një eksperiencë “bleisure” (kombinimi i biznesit dhe argëtimit në kohën e lirë), duke filluar nga kryeqyteti, Tirana. Ka gjithnjë e më shumë destinacione që shfaqen në bregdet dhe më në brendësi të vendit, pasi ky është një vend për t'u zbuluar, nga pikëpamja turistike. Do të doja të thoja se ne besojmë në potencialin dhe atributet e Shqipërisë për t'u bërë një destinacion kryesor në Mesdhe dhe për këtë arsye, ne do të kërkojmë mundësi rritjeje që plotësojnë kërkesat tona për cilësinë dhe standardet e markave tona. Me një vijë bregdetare prej 420 km, Shqipëria pati më shumë se 6 milionë vizitorë në 2019. Vende të ndryshme kanë targete të ndryshme dha falë 7 brand-eve tona, do të jemi të aftë të rritemi gradualisht, duke parë edhe kërkesat e çdo lokaliteti dhe gjithmonë krah për krah me partnerët tanë lokalë. Në 65 vitet e historisë sonë kemi qënë pjesmarrës në zhvillimet turistike në shumë destinacione dhe Shqipëria do të ketë nevojë për struktura hoteliere të nivelit të lartë (first class hotels), të menaxhuara nga brand-et lokale dhe mbi të gjitha, nga brand-et ndërkombëtare. Ndërkohë që nuk duhet të harrojmë destinacionet në zonat urbane dhe rritjen e biznesit të turizmit. Meliá Hotels International do të donte të ishte një partner i besueshëm për të gjithë pronarët dhe zhvilluesit e hoteleve në Shqipëri që pajtohen me pritshmëritë tona, dhe sinqerisht, mendoj se do të ketë shumë më shumë mundësi për më shumë njoftime rritjeje në vendin tuaj të mrekullueshëm, në një të ardhme të afërt. Ne jemi padyshim të interesuar të zgjerojmë portofolin tonë në Rivierën Shqiptare dhe do të analizojmë mundësitë në më shumë vende, sepse po kërkojmë mundësi për t'u bërë një operator hotelerie lider në Shqipëri, së bashku me partnerët më të mirë të mundshëm që na kanë besuar investimet e tyre dhe zhvillimet turistike. Cila është ambicia juaj në rajon? A po planifikoni të zgjeroheni në Kosovë, Serbi dhe në Maqedoninë e Veriut në të ardhmen e afërt (në Mal të Zi jeni aktualisht i pranishëm)? A është rajoni i Ballkanit një rajon interesant për biznesin tuaj? Rajoni i Ballkanit po bëhet gjithnjë e më interesant për kompaninë tonë dhe strategjia jonë e rritjes në vitet e fundit pasqyron këtë interes. Megjithëse është e vërtetë që fokusi ynë i pushimeve të relaksit në rajonin e Mesdheut i bën Kroacinë, Malin e Zi dhe Shqipërinë prioritetet tona kryesore. Ne shohim potencial në destinacionet kryesore të Rajonit të Ballkanit, si në sektorin urban ashtu edhe në atë të pushimeve të relaksit. Çfarë standardesh me një vlerë të shtuar do të sjellë MHI në Shqipëri (trajnimi i stafit, kultura e ushqimit dhe pijeve, shërbimet, etj)? Ndoshta disa produkte spanjolle për shembull (jamon, queso i vino)? Në përvojën tonë më shumë se 65-vjeçare si hotelierë, ka diçka që ne e dimë shumë mirë: ekipet dhe kolegët tanë janë ata që n’a çojnë drejt përsosmërisë në sektorin e mikpritjes. Duke qenë të vetëdijshëm sesa i rëndësishëm është talenti, edhe më shumë kur duam të ofrojmë shërbime të standardeve të larta, ne u japim punonjësve tanë mundësinë të përmirësojnë karrierën e tyre me kurse trajnimi dhe programe zhvillimi. Ne kemi eMeliá – platformën tonë të mësimit online – në të cilën ata, jo vetëm që do të trajnohen për rolin e tyre, por gjithashtu do të jenë në gjendje të mësojnë gjuhë, njohuri dixhitale ose njohuritë kryesore, për shembull. Sigurisht, punonjësit tanë të rinj në Shqipëri gjithashtu do të mësojnë dhe do të përfshihen në vlerat tona koorporative: afërsia, përsosmëria, profesioni i shërbimit dhe novacioni. Ne dëshirojmë që klientët tanë të përjetojnë, në hotelet tona, ngrohtësinë e kulturës dhe mikpritjes spanjolle. Kjo është diçka që mund të shihet edhe në dyqanet F&B të hotelit tonë, ku na pëlqen të kombinojmë gastronominë më të mirë lokale me produkte tipike spanjolle si vaj ulliri, verë, djathë ose proshutë iberike. Ndër pikat e forta të Meliá Hotels International janë ofrimi i përhershëm i produkteve të klasit të parë, strategjia jonë F&B (e ushqimit dhe e pijeve) dhe konceptet tona të ndryshme të kuzhinës që ne jemi të kënaqur t'i sjellim në Shqipëri. Prani a juaj në tregun shqiptar nënkupton se do të kemi më shumë vizitorë të rrjetit Melia nga Spanja, Portugalia, Britania e Madhe dhe Gjermania? Këta turistë aktualisht mungojnë në Shqipëri… Një ndër avantazhet e mëdha të të qënurit operator hotelerie global është se ne kemi një Program Besnikërie (MeliaReëards), me mbi 14 milionë anëtarë në mbarë botën, shumë prej të cilëve janë udhëtarë të shpeshtë që duan të udhëtojnë nëpër botë duke vizituar hotelet tona, kështu që sinqerisht shpresoj që prania ndihmon për të “nxitur” udhëtimet nga tregjet tona kryesore burimore, drejt Shqipërisë. Përveç kësaj, ne kemi një aktivitet shumë të fortë marketingu dhe në rrjetet sociale, që ka të ngjarë të mbështesë reputacionin e vendit si destinacion turistik. Pra, po, mund të them se do të jemi në gjendje të rrisim ardhjet nga tregje si Anglia, Gjermania dhe vende të tjera evropiane që na kanë besuar për pushimet e tyre për më shumë se 60 vjet. A do të inkurajojë prania e MHI-së partnerët tuaj të biznesit për të investuar në vendin tonë? Jam i sigurt se hyrja jonë e fortë në vend do të rrisë më shumë ndërgjegjësimin për Shqipërinë si një vend potencial për të investuar. Kontaktet e para kanë filluar nga partnerët tanë. Gjatë vizitës suaj në Shqipëri, keni pasur disa takime të rëndësishme me z. Edi Rama, Kryeministër; Znj. Mirela Kumbaro, Ministre e Turizmit dhe z. Erion Veliaj, Kryetar i Bashkisë së Tiranës. Cili është mendimi juaj për bashkëpunimin mes sektorit privat dhe publik? Çfarë mesazhi u shkëmbye gjatë këtyre takimeve? A është industria e turizmit një nga prioritetet e ekonomisë shqiptare? Pas takimit me kryeministrin dhe Autoritetet e tjera në Shqipëri dhe Tiranë, jam më se i lumtur të arrij në konkluzionin se ata ndajnë vizionin tonë për potencialin për turizmin dhe jam jashtëzakonisht mirënjohës për besimin që të gjithë i kanë dhënë kompanisë tonë për të ecur përpara në zhvillimin e turizmit. Ne folëm se si turizmi është një motor i rëndësishëm ekonomik dhe fuqia e tij për të ndihmuar punësimin, barazinë sociale dhe për të çuar prosperitetin drejt destinacioneve, dhe ishim shumë të kënaqur kur pamë që edhe ata e shohin atë në këtë mënyrë; por folëm edhe për turizmin e qëndrueshëm, sepse në ditët e sotme, turizmi duhet të jetë i përgjegjshëm dhe i qëndrueshëm, dhe Meliá ka qenë, përgjatë 3 viteve të fundit rradhazi, një grup me vazhdimësinë më të qëndrueshme në Evropë. Ndaj ne do të donim të ndihmonim Qeverinë shqiptare drejt kësaj rruge. Pak javë më parë, BE çeli negociatat e anëtarësimit me Shqipërinë. Sipas jush, a do të ndikojë kjo çështje në tregun shqiptar, për ta bërë atë më të qëndrueshëm dhe të sigurt për tërheqjen e investimeve të huaja. Absolutisht që po; Bashkimi Evropian do të ketë ndikim pozitiv për Shqipërinë dhe anëtarësimi i Shqipërisë do të jetë i mirë për Bashkimin Evropian. Ka qenë një shtytës për zhvillimin ekonomik dhe social dhe i kushton rëndësi dhe prioritet të madh industrisë evropiane të turizmit. Mirësevjen Shqipëri në Europë! MHI-ja u themelua nga babai juaj, z. Gabriel Escarrer Julia i cili botoi librin: Jeta ime (Libri i Historisë së Melia) gjatë viteve të pandemisë! A është ai ende duke kontribuar në MHI? Përshëndetje të veçanta nga revista jonë për të! Faleminderit Anila! Babai im është unik, dhe ai ka qenë gjithmonë një qenie njerëzore e mahnitshme, i cili e filloi kompaninë e tij me pothuajse asnjë studim dhe burime ekonomike, por me një dëshirë të jashtëzakonshme për të "pushtuar botën" dhe për të krijuar një kompani të mirë për familjen e tij, për brezat e ardhshëm dhe për njerëzimin. Jeta e tij dhe ndërtimi i ndërmarrjes, kaluan në paralelizëm me historinë e turizmit në Evropë dhe ai ishte gjithashtu një nga pionierët e turizmit të relaksit në destinacione si Karaibet apo Bali. Prandaj, leximi i biografisë së tij është gjithmonë frymëzues dhe edukativ, dhe jam shumë i lumtur që ai më në fund gjeti kohën për të shkruar Kujtimet, ndërkohë që shfrytëzoi situatën e pandemisë. Unë gjithmonë i kam vlerësuar shumë këshillat e babait tim dhe vizionin e tij për biznesin, kështu që jam i lumtur të përgjigjem se PO, ai ende po kontribuon në Kompani, si kryetar joekzekutiv, dhe të jesh në gjendje të mbështetesh tek ai është një nder dhe një privilegj për të gjithë ne. Ëndërr apo Realitet? Njihuni me hotelet elitë të turizmit MELIA në Shqipëri Ëndrra të përkund, kurse realiteti të zgjon. Eshtë një shprehje e bukur spanjolle që ka më shumë vlerë ndërsa sheh projektin sesi grupi më i madh spanjoll i rrjetit të hoteleve MELIA synon zgjerimin në Shqipëri. Prej vitesh po punojnë fuqishëm dhe projektet e para i kanë finalizuar me dy struktura madhështore. Melia San Pietro Hotel & Resort, vendosur në bregun e bukur të Gjirit të Lalzit, aty ku shkrihen se bashku bukuria e natyrës, afërsia me detin, komoditeti dhe rehatia si në shtëpi. Pushuesit, do të kenë një standart të shtuar përveç cilësisë së jashtëzakonshme të godinës. Sol Tropikal, është një tjetër destinacion i përzgjedhur nga Melia. Vendosur te resorti Tropikal në zonën e quajtur “Plepat”, një nyje lidhëse në qendër të Shqipërisë, vetëm pak kilometra larg aeroportit, afërsia me detin, por edhe afërsia me qytetet kryesore, Durrës e Tiranë, do të bëjnë Sol Tropikal- in vendin e duhur të pushimeve. Ndërkaq, MELIA nuk mbetet vetëm këtu. Janë pesë struktura të rëndësishme në Tiranë, Berat, Dhërmi, Kavajë, struktura hoteliere turistike me të cilat grupi i madh MELIA ka lidhur kontratat dhe shumë shpejt do të fillojë nga puna. Sol Fafa Golem, superprojekti që sjell Karpenin më afër Evropës Karpen në Golem, është një destinacion turistik i paeksploruar ende nga shqiptarët. Ndoshta, vetëm vendalinjtë. Këta të fundit thonë se perëndim dielli më të bukur se aty, nuk gjen. Por ja që grupi “Fafa” e ka zbuluar, dhe projektin ambicioz të tyre e përthithi menjëherë Melia Group. Kështu, në 86 mijë metra katrorë do të ngrihet resorti më i madh turistik, pjesë elitare e turizmit evropian dhe pritet të përfundojë në 2025. Sipas projektit, janë 460 dhoma në strukturën e re hoteliere që do ketë të gjitha standartet sipas grupit MELIA, në partneritet me FAFA. 2 restorante “all inclusive ala carte”; një sallë e madhe konferencash prej 500 vendesh, SPA dhe beach bar; me dhoma të mëdha ku më e vogla do të ketë 46 metra katrorë hapësirë dhe më e madhja, suitat presidenciale, 10 të tilla me 250 metra katrorë. Projekti gjigand, nga më të mëdhenjtë mes të cilëve është lidhur kontratë me Melia Group, do të mbajë emrin SOL FAFA GOLEM dhe stafi e shërbimet do të kryhen nga shqiptarët, por me standartet spanjolle. Turistët do të kenë kohë dhe mundësi të eksplorojnë edhe ambientet e përbashkëta të argëtimit, ndërsa familjet me fëmijë të vegjël do të kenë një vend të posaçëm argëtimi për vogëlushët. I gjithë projekti do të vëzhgohet nga afër për të qenë pjesë e elitës së turizmit shqiptar e evropian, falë edhe punës kolosale që ka bërë deri më tani, grupi hotelier Fafa në Shqipëri. Gran Melia Tirana Hotel në Eyes of Tirana Building Nuk ka sesi të mos shkojnë sytë në kryeqytet në Eyes of Tirana Building, një projekt spektakolar në qendër të Tiranës, investuar nga AMAAR Group që konsiderohet edhe pika 0 e Shqipërisë. Hoteli Gran Melia në këtë godinë, do të ketë 125 dhoma me standartet evropiane të Melias. Të gjithë turistët që do të akomodohen këtu, kanë mundësi të shijojnë dhe vizitojnë qendrën e madhe tregtare shumë moderne, një amfiteatër prej 400 vende, një sallë konferencash me 200 vende, apartamente luksi, zyra, bare, restorante dhe një pishinë panoramike që sheh nga sheshi “Skëndërbej” e gjitha transparente me xham. Si vlerë e shtuar, një kazino për të gjithë të apasionuarit e argëtimit. Turistët në këtë hotel mund të quhen të pakohë, pra në dimër e verë. Kjo edhe për shkak të komoditetit të madh që ofron ndërtesa në qendër të kryeqytetit të Shqipërisë dhe për shkak të të gjithë shërbimeve që ofrohen në të. Turistët e huaj, pse jo dhe vendas, do të gjejnë një mundësi të madhe argëtimi, duke shfrytëzuar jo vetëm kapacitetet e hotelit, por edhe atyre që ofron kryeqyteti shqiptar. Hotel Tomori, në Berat do të flasim edhe “spanjisht” Një nga qendrat më të lashta të Evropës Juglindore, e vlerësuar si një trashëgimni nga UNESCO, Berati, është një nga të përzgjedhurit e grupit MELIA. Kompania Tomori LTD, me një strukturë hoteliere të vendosur në qendër të qytetit, me 120 dhoma, është destinacioni ndryshe, vlerësuar nga grupi MELIA për bashkëpunim. Turistët që do të vijnë, përveçse do të njihen me qytetin e një mbi një dritareve, kanë mundësi të shijojnë bukuritë e rralla të zonës, kanionet e Osumit që të lënë pa frymë, rrugët e lagjes Mangalem, dhe mund të takohen edhe me banorët që jetojnë akoma brenda mureve mesjetare e u gëzohen pamjeve të minareve dhe kishave në qytetin e vlerësuar maksimalisht për bashkëjetesën fetare. Nuk është zgjedhur më kot Hotel Tomori nga grupi MELIA. Këtu turistët do të kenë mundësi të shikojnë komoditetin e dhomave me pesë yje. Hoteli, është ndërtuar në qendër të qytetit, me një lehtësi të madhe qarkullimi në këmbë, ndërkohë që brenda do të jetë ideuar si një oaz qetësie për turistët që do të lodhen nga shëtitjet në këmbë në qytet. Me dhoma të mëdha e të bollshme, bare e restorante ku kulinaria tradicionale do të ketë një vlerë të shtuar edhe atë spanjolle e evropiane, Hotel Tomori Affiliated by Melia, është destinacioni i nevojshëm për të pushuar qoftë edhe disa ditë. Melia Collection Dhërmi, destinacioni i paharruar i Rivierës Nëse vini në Shqipëri për pushime, dhe nëse nuk keni parë Dhërmiun, ndoshta nuk keni parë gjë nga Riviera e bukur shqiptare. Hotel Melia Collection, e ka vendodhjen në bregdetin e Jonit, në Gjilekë, Dhërmi. Zona njihet për cilësinë e spektakolare kristaline të ujit të detit dhe për motin e tipik mesdhetar. I ndërtuar me 142 dhoma, ndër të cilët, 6 vila luksoze, 106 dhoma dyshe, 16 dhoma Deluxe, 6 pishina Cabana dhe 8 suita, Melia Collection në Dhërmi mund të jetë vendi ideal për pushime. Sepse gjithë këtyre komoditeteve do t’u shtohet edhe argëtimi: me dy restorante, 1 casino, dhe për të rinjtë, që dëshirën e kanë buzë detit, dy Beach Bar do të plotësojë pasditet e tyre me perëndimin e diellit ndërsa fle n’anë deti. Më të apasionuarit, nuk do të harrojnë të kompopozojnë fotot e tyre për rrjetet sociale, ku pamjet nga ballkonet e hotelit vendosur buzë detit, të krijojnë përshtypjen se je duke fjetur mbi valët që përkëdhelin gurët e shkumbojnë a thua se i kanë hedhur një vello të bardhë peizazhit përreth. I njëjti grup investitorësh lidhen në kontratë “franchaise” për Elisa Hotel by Melia në Tiranë, në rrugën e Dibrës, vetëm 700 metra larg shtetit “Skënderbej”. Një strukturë hoteliere me 45 dhoma, prej të cilave 6 suita, por për pushuesit do të ketë edhe komoditete shtesë, duke përfshirë edhe SPA. Do të jetë një “urë e bukur lidhëse” për ata pushues që më vonë do të kenë dëshirë t’i drejtohen jugut të Shqipërisë.

Hola Albania! Melias Hotels mbërrin në Shqipëri, destinacion pushimesh i pazbuluar

Artikuj të ngjashëm Artikuj

102 kontejnerët me ngarkesën e errët të maskuar nën hijen e portit

Bjeshkët që marrosën turistët: Nga më e bukura Zoj, tek Xhubleta

Shqipëria 49’ nën lupën e CIA-s: Si t’i ndihmojmë grupet e rezistencës!

Silvana Braçe ekonomistja që pushtoi Skenën e Festivaleve

Ne mbushim 3 vite dhe kemi një dhuratë për ju!

51 ministrat që Edi Rama u bëri NDERIN E JETËS

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Inva Mula: Unë sopranoja e parë shqiptare në skenat evropiane

Bjeshkët që marrosën turistët: Nga më e bukura Zoj, tek Xhubleta

102 kontejnerët me ngarkesën e errët të maskuar nën hijen e portit

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

PORTO PALERMO, Ferri i të internuarve në Kalanë e bukur të Vasiliqisë

51 ministrat që Edi Rama u bëri NDERIN E JETËS

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Hola Albania! Melias Hotels mbërrin në Shqipëri, destinacion pushimesh i pazbuluar

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?