Eltar Deda, doktori që po kuron nëntokën

Shoqëria e vetme shtetërore e nxjerrjes së naftës në Shqipëri drejtohet prej më shumë se një viti nga Eltar Deda, një figurë sa teknike aq dhe politike me një karrierë të gjerë dhe të suksesshme në krye të institucioneve të ndryshme shtetërore dhe private. Një njeri i reformave që po shëndosh financat e "Albpetrol" SH.A me projekte, ide dhe vizionin për t'i rikthyer kompanisë dinjitetin dhe prestigjin që ajo meriton. Megjithatë, ai thekson se efiçenca dhe gjithë të tjerat nuk mund të vijnë vetëm falë punës së tij, por është një përpjekje madhore që e ka nisur bashkë me punonjësit e të gjitha niveleve. Në këtë intervistë ekskluzive për Revistën Newsbomb.al, Eltar Deda tregon se ka marrë dhe besimin dhe mbështetjen e ministres Belinda Balluku për nisjen e një reforme të thellë e cila ka synuar ristrukturimin e kompanisë, përmes një qasje krejt të re në automatizimin e proceseve të punës dhe investimeve për rritjen e rendimentit. "Kjo reformë e nisur në Albpetrol, e shoqëruar me përmirësimin e situatës financiare të kompanisë, ka bërë që edhe Qeveria ta shikojë me vëmendje të veçantë këtë kompani, çka është reflektuar edhe në vendimin për rritjen e pagave për naftëtarët, një vendim i mirëpritur dhe i përshëndetur nga punonjësit e shoqërisë", tregon ai. Me emërimin e Eltar Dedës në krye të saj, kompania jo vetëm që ka gjetur paqe, por duket se ka kaluar mes sukses periudhën e vështirësive të vazhdueshme. Normalisht, sfida e tij sapo ka nisur dhe përpara ka shumë punë për t'u bërë, por rezultatet e para janë të prekshme dhe shifrat janë të pamohueshme. "Duke ju referuar vitit që sapo lamë pas 2023, bazuar në monitorimin e kryer për anën financiare në 200 kompanitë më të mëdha në vend, ne kemi dalë ndër kompanitë e suksesshme me bilanc pozitiv", tregon me krenari Eltar Deda, edhe përse në çdo moment të bisedës kujdeset që të theksojë se frytet janë falë punës së gjithë ekipit që ai drejton. Një ndër investimet madhore që kompania ka ndërmarrë është dhe ai për rehabilitimin e stacionit të grumbullimit dhe trajtimit të naftës në Zharrëz, i cili do të ndikojë drejtpërdrejt në përmirësimin e kushteve të jetesës të komunitetit rreth zonës, sepse në mënyrë të ndjeshme do të ulet edhe ndotja mjedisore. Po këtë vit, është programuar të nisë puna edhe për rehabilitimin e 4 sektorëve të prodhimit në Kuçovë, Gorisht, Cakran dhe Patos, të cilët veç të tjera do të ulin ndjeshëm humbjet e naftës, që aktualisht janë për llogaritur në 15-20%. Në këto projekte do të aplikohen standardet më të mira në industrinë e naftës përsa i përket pajisjeve dhe teknologjisë që do të përdoret. "Përveç zhvillimit te teknologjisë së nxjerrjes së naftës, që prej muajit Shtator 2023, Albpetrol konkurron edhe me pagat e punonjësve. Vlerësimi i statusit të naftëtarit na bën që të jemi kompani me nivelet më të larta me kompanitë konkurruese, përgjithësisht për ata punonjës që punojnë drejtpërdrejt në terren për nxjerrjen e naftës si operatorët e prodhimit, axhustatorët, punonjësit e remontit etj", tregon Eltar Deda. Megjithatë, ashtu si çdo kompani, biznes apo ndërmarrje edhe në "Albpetrol" ka vështirësi për gjetjen e kapitalit njerëzor, aq më tepër që këtu flasim për teknikë të specializuar në fushën e prodhimit, por edhe në atë të shërbimeve mbështetëse. Për t'i paraprirë kësaj situate, kompania ka nisur me iniciativën e Ministrisë së Infrastrukturës dhe Energjisë bashkëpunimin me institucionet arsimore profesionale për rihapjen e degëve specifike në profilin e naftës, në shkollat profesionale në Qarkun e Fierit dhe jo vetëm, me qëllim përthithjen e sa më shumë nxënësve që do të duan të arsimohen në këtë sektor. "Tashmë që Shqipëria po prek dhe investime të tjera nga kompani private, nevoja për punësim në këtë sektor do jetë edhe më e madhe, ndaj kemi menduar si e vetmja kompani shtetërore e këtij sektori, të jemi pararojë e gjithë tematikës në fjalë", shprehet kryeadministratori i "Albpetrol". Krahas punës së përditshme për rritjen e efiçencës, ai shikon si risi dhe mbrojtjen e mjedisit. Falë politikave të reja që janë ndërmarrë, "Albpetrol" synon që të gjitha ato zona ku ka mbetje historike të kthehen në zona ekologjikisht të pastra. "Ne kemi dy vendburime që janë brenda parkut Kombëtar të Vjosës, aktualisht Albpetrol nuk ka mbetje të reja, por objektivi ynë është që ne të ndërhymë brenda këtij viti me një plan konkret fillimisht për eleminimin e mbetjeve historike. Një tjetër sjellje ndaj mjedisit, është dhe kthimi i puseve të fondit ndalur në zona ekologjikisht të pastra, duke kërkuar dhe fonde e projekte nga Organizata Ndërkombëtare", shprehet Eltar Deda. Zoti Deda, faleminderit për mundësinë e kësaj interviste për Revistën Newsbomb.al. Ju jeni emëruar në krye të shoqërisë së vetme shtetërore të nxjerrjes së naftës prej Tetorit 2022 dhe vini nga një karrierë e suksesshme me punë menaxheriale. Si është drejtimi juaj në krye të “Albpetrol” SH.A? Detyra si Administrator i Albpetrol sh.a, të vetmes shoqëri shtetërore të nxjerrjes së naftës në Shqipëri, ka qenë për mua një vlerësim i rëndësishëm, por njëkohësisht edhe një përgjegjësi e madhe për të përmbushur jo vetëm detyrat funksionale, por edhe objektivat strategjike të vendosura nga Ministria e Infrastrukturës dhe Energjisë për këtë shoqëri. Falë besimit dhe mbështetjes së vazhdueshme të Zv.Kryeministres njëherësh dhe Ministre e Infrastrukturës dhe Energjisë, znj.Belinda Balluku, në këto muaj kemi nisur një reformë të thellë e cila ka synuar ristrukturimin dhe shëndoshjen financiare të kompanisë, përmes rritjes së efiçencës së strukturave të saj. Ristrukturimi ka pasur si qëllim uljen e numrit të punonjësve, përmes automatizimit të sistemeve dhe proceseve të punës, si dhe duke i orientuar strukturat në një qasje totalisht të re, drejt modernizimit të shumë hallkave që kanë lënë për të dëshiruar në punën e tyre në të kaluarën. Automatizimi i disa proceseve të cilat ndër vite janë amortizuar, investime të reja për të patur rendiment më të lartë pune, por edhe për të reduktuar humbjet. Kemi nisur një epokë të re në Albpetrol, për dixhitalizimin e stacionit të shitjes së naftës në Zharrëz dhe jo vetëm. Në të njëjtën kohë mirëadministrimi i burimeve financiare të kompanisë ka bërë të mundur që bilancet financiare të jenë të qëndrueshme dhe me trend pozitiv. Kjo reformë e nisur në Albpetrol, e shoqëruar me përmirësimin e situatës financiare të kompanisë, ka bërë që edhe Qeveria ta shikojë me vëmendje të veçantë këtë kompani, çka është reflektuar edhe në vendimin për rritjen e pagave për naftëtarët, një vendim i mirëpritur dhe i përshëndetur nga punonjësit e shoqërisë. Në fakt, Albpetrol ka qenë prej kohësh një ndërmarrje problematike, duke pasur parasysh se aty janë ndryshuar 5 administratorë në më pak se 4 vjet. Me emërimin tuaj, duket se institucioni ka gjetur paqe. Po si është realisht situata ekonomike dhe financat e kompanisë sot? Për shkak të një trashëgimie problematike, me mungesë të investimeve dhe mangësi në menaxhim jo vetëm të viteve të fundit, por shumë më të hershme, kompania ka qenë në vështirësi të vazhdueshme. Sigurisht që për momentin vetëm sa kemi nisur të ndryshojmë situatën, por kemi ende shumë punë për të bërë. Jemi përpjekur të krijojmë një klimë tjetër të menaxhimit të brendshëm, por edhe të bashkëpunimit me institucionet e qeverisjes qendrore edhe të atyre të qeverisjes vendore në bashkitë ku ne ushtrojmë aktivitetin tonë. Aktualisht Albpetrol ka një infrastrukturë të lëvizjes së gjithë naftës bruto tërësisht të vjetëruar teknologjikisht dhe të amortizuar, mungesë sistemesh sigurie e kaluar brez pas brezi e lidhur njëherësh dhe me mungesë te sistemeve emergjente, duke vazhduar tek standarditeti i kushteve ambientale, duke çeduar tek monitorimi në kohë reale, e pa diskutim një fryrje të pajustifikuar të burimeve njerëzore. Janë të gjitha problematika që i kemi vlerësuar me realizëm dhe kemi nisur nga puna për ti ndryshuar, sigurisht pa cënuar interesat kombëtare pikë së pari, pa cënuar profesionistët dhe pa diskutim pa ndikuar tek rendimenti i punës. E kemi parë Albpetrolin jo vetëm si një shoqëri për nxjerrjen e naftës, por edhe si një kompani e cila duhet të rrisë kujdesin maksimal për ruajtjen e mjedisit, kryesisht zonave të mbrojtura. Duke ju referuar vitit që sapo lamë pas 2023, bazuar në monitorimin e kryer për anën financiare në 200 kompanitë më të mëdha në vend, ne kemi dalë ndër kompanitë e suksesshme me bilanc pozitiv. Duke pasur parasysh gjithë vështirësitë që ka kaluar Albpetrol, si dhe teknologjinë e amortizuar që ka trashëguar kompania, sa e vështirë ka qenë për ju ndryshimi i situatës financiare? Krijimi i një fryme të re brenda vetë kompanisë dhe ndërgjegjësimi i punonjësve se rritja e efiçencës do të ndihmonte jo vetëm në shëndoshjen e kompanisë, por edhe në një trajtim më të mirë financiar të tyre ka bërë që tani të kemi një tjetër angazhim të të gjithë punonjësve, që nga niveli bazë e deri në strukturat drejtuese. Kësisoj unë mendoj se është rrjedhim i këtij angazhimi ndryshimi që tashmë vërehet nga të gjithë. Ne jemi munduar maksimalisht për të bërë më të mirën për resurset që ne disponojmë, me organizim dhe bashkëpunim. Vetëm duke pasur një bashkëpunim dhe mirëkuptim të tillë ndërmjet qendrave e punonjësve tanë, mund të kemi një proces pune të pa ndërprerë për shkaqe nga më të ndryshmet që ofron terreni ku kryhet e gjithë veprimtaria jonë. Zoti Deda, sipas të dhënave të deklaruara “Albpetrol” SH.A administron më shumë se 1200 puse në gjithë vendin. Po kompanitë private, sa puse administrojnë dhe keni nisur ju ndonjë kontroll ndaj tyre, a i zbatojnë marrëveshjet hidrokarbure? Në total janë 1238 puse, ku referuar Marrëveshjeve Hidrokarbure që Albpetrol ka me kompanitë private, janë dhe rreth 500 puse të tjerë që janë në administrim prej këtyre subjekteve të cilët ushtrojnë të njëjtin aktivitet si ne. Një pjesë e këtyre puseve u janë dorëzuar nga Albpetrol kompanive partnere sipas Marrëveshjeve Hidrokarbure dhe një pjesë janë puse të rinj, të shpuara me investimet e tyre. Përsa i përket kontrollit të aktivitetit, Albpetrol në përputhje me klauzolat e Marrëveshjeve Hidrokarbure është në monitorim të vazhdueshëm dhe të përditshëm të aktivitetit të tyre operacional. Keni konstatuar papërputhshmëri në zbatimin e kontratave të tyre dhe pagesat për shtetin? Të gjitha Marrëveshjet Hidrokarbure që kanë lidhje me Albpetrol, monitorohen nga ana jonë. Ka kontrata të cilat janë lidhur më shumë se 10 vite më parë, por ka dhe marrëveshje të lidhur përpara 20 vitesh, siç është ajo për vendburimin e Patos-Marinzës dhe si rrjedhojë ka një sërë problematikash të mbartura ndër vite, të cilat ne aktualisht po i ndjekim me prioritet. Sa i përket pjesës së pagesave për shtetin, ne si kompani ndjekim vetëm detyrimet që këto kompani koncesionare kanë ndaj vetë shoqërisë Albpetrol, pasi janë institucione të tjera të ngarkuara me ligj për ndjekjen dhe arkëtimin e detyrimeve financiare në buxhetin e shtetit shqiptar. Marrëveshjet që kompania që ju administroni ka me privatët parashikojnë edhe mbrojtjen e mjedisit. A keni bërë ju takime me komunitetin, apo vëzhgime me specialistët tuaj, si është realiteti? Keni aplikuar masa për ndonjë kompani që është gjetur në shkelje? Në realitet problemet e mjedisit janë shumë sensitive në raport me atë se çfarë duhet të jetë. Shqipëria trashëgon dhe ka si problematikë kryesore të ashtuquajtura mbetje historike, për të cilat ne tashmë kemi marrë një nisëm për të hartuar dhe për të ndërhyrë në ato zona të cilat duhen rehabilituar dhe të kthehen në zona ekologjikisht të pastra. Kjo do të jetë qasja për mjedisin e politikave të kompanisë krahas ndërhyrjes në infrastrukturë. Të gjithë partnerët privatë që ushtojnë aktivitetin e tyre në vendburimet e naftës dhe gazit janë të detyruar të zbatojnë legjislacionin në fuqi në Republikën e Shqipërisë lidhur me mbrojtjen e mjedisit. Albpetrol është në monitorim të masave që këto kompani marrin për mbrojtjen e mjedisit. Marrëdhëniet tona me këto kompani rregullohen nëpërmjet Marrëveshjeve Hidrokarbure, kur për çdo rast që kemi konstatuar mospërmbushje të kushteve ligjore në ushtrimin e aktivitetit të tyre lidhur me mbrojtjen e mjedisit, ne e kemi referuar rastin në organet administrative që e kanë një kompetencë të tillë. Fusha naftëmbajtëse e Patos Marinzës është nga më të mëdhatë në Europë, por sipas Ministrisë së Mjedisit, për shkak të industrisë shumëvjeçare të nxjerrjes së hidrokarbureve ajo është një nga tre zonat më të ndotura në Shqipëri. Si është situata në këtë zonë sot? Po ndiqet një politikë e veçantë aty? Me fillimin e 2024 kemi adresuar një sërë fondesh përsa i përket mjedisit. Parku Kombëtar i Vjosës, ku kemi dy vend burime, sot që flasim nuk ka asnjë derdhje nga Albpetrol, e njëjta situatë është dhe në Gjanicë. Jemi duke studiuar kthimin e puseve te fondit ndaluar në zona ekologjikisht të pastra. Këtu vlen të përmendim dhe ndërhyrja që do të kryhet në infrastrukturë me projektet e rëndësishme të cilat janë miratuar tashmë nga organet drejtuese të kompanisë sonë. Sjellja jonë ndaj mjedisit do të jetë e bazuar në një strategji. Siç e theksova dhe më lart, kompania tashmë do të krijojë marrëdhënie të reja me asetet dhe mjedisin. Ne kemi dy vendburime që janë brenda parkut Kombëtar të Vjosës, aktualisht Albpetrol nuk ka mbetje të reja, por objektivi ynë është që ne të ndërhymë brenda këtij viti me një plan konkret fillimisht për eleminimin e mbetjeve historike. Një tjetër sjellje ndaj mjedisit, është dhe kthimi i puseve të fondit ndalur në zona ekologjikisht të pastra, duke kërkuar dhe fonde e projekte nga Organizata Ndërkombëtare. Shumë vende kanë nisur prej vitesh shfrytëzimin e karburanteve alternative për të ulur ndotjen, si bionafta apo biodizeli, ndërsa Shqipëria pavarësisht zotimeve nuk ka ende asnjë nismë konkrete. Mendoni se dhe vendi ynë duhet të kthejë sytë nga burimet alternative. Ne po shohim që Shqipëria është gjithnjë drejt progresit. Si shtet jemi duke përdorur politika për mjedisin por edhe për shfrytëzimin e të gjitha resurseve natyrore që disponojmë. Mund të themi me plot gojën që Shqipëria është një vend i bekuar nga Zoti për të gjitha resurset që ka, e pa diskutim gjithçka po shkon drejt evoluimit. Falë politikave të qeverisë, ne po shohim që Shqipëria po shfrytëzon të gjithë potencialin e saj për prodhimin e energjisë me panele foto voltaike, pra një mënyrë alternative kjo përveç prodhimit të energjisë në HEC-e. E njëjta gjë mund të jetë dhe për industrinë hidrokarbure, pse jo mos të përdorim dhe burime alternative në të ardhmen, por sigurisht edhe duke shfrytëzuar dhe pasurinë e arit të zi që kemi në nëntokën tonë. Siç e thamë më sipër, kompania shtetërore që ju drejtoni administron më shumë se 1200 puse nafte, janë këto të gjithë aktivë? Prej shumë vitesh një numër pusesh prodhuese kanë qenë të ndaluara, për faktorë të caktuar, keni ndërmarrë ju ndonjë nismë për riaktivizimin e tyre? Nëse po, si ka rezultuar dhe çfarë prodhimi kanë? Në strukturën e fondit të puseve të shoqërisë Albpetrol, aktualisht numërohen rreth 1,202 puse aktivë qe janë në punë dhe prodhojnë nafte, pavarësisht se gjatë punës ka raste që disa nga këta puse ndalen përkohësisht për shkak te problemeve mekanike sipërfaqësore ose nevojës për punime remonti. Fokusi primar i shoqërisë tonë është mirëmbajtja e puseve aktual aktiv duke investuar me teknologji te reja apo kryerjen e punimeve sipërfaqësore apo atyre te remontit në kohë dhe me efektivitet. Stafi ynë teknik i inxhinierëve të prodhimit dhe ata gjeolog me një eksperiencë dhjetëra vjeçare në sektorin hidrokarbur, pas studimeve dhe vlerësimeve të kryera të biografive të puseve që janë në fondin e puseve të ndalur, ka vlerësuar dhe ka programuar që për vitin 2024 të rivëmë në punë edhe 36 puse duke e çuar numrin e puseve që japin naftë në 1,238 në total. Për puset e fondit të ndalur që do të rivihen në punë, pavarësisht problematikave teknike të paparashikuara që mund të dalin gjatë procesit, jemi optimist që do të rezultojnë me sukses dhe do të kemi mundësinë e një debiti shtesë. Si është raporti i punës së Albpetrol me kompanitë e tjera që operojnë në Shqipëri? Çfarë po bën ky institucion për të përmirësuar performancën, ne aspektin e investimeve të reja në teknologji por edhe në trajnimin e stafit? Sot në Shqipëri, vendburimet e naftës dhe gazit administrohen nga 8 kompani, ku shoqëria Albpetrol është e vetmja kompani qe aksionet e saj janë 100% të shtetit shqiptar, për të cilën në bashkëpunim të ngushtë edhe me organet mbikëqyrëse dhe drejtuese të kompanisë tonë, po vazhdojmë objektivin e MIE dhe po e zhvillojmë Albpetrolin që jo vetëm të jetë me një bilanc pozitiv financiar, por të jetë edhe një shembull për kompanitë koncesionare se si duhet të ushtrojnë veprimtarinë e tyre në Shqipëri, sipas praktikave më të mira në industrinë e naftës. Prioriteti ynë për vitin 2024 do të jenë investimet në linjat e transportit të naftës bruto si dhe në sektorin e magazinimit dhe administrimit të tij. Rehabilitimi i Stacionit të grumbullimit dhe trajtimit te naftës në Zharrëz, është një investim madhor për shoqërinë Albpetrol që do të ndikojë ndër të tjera edhe në përmirësimin e kushteve të jetesës të komunitetit rreth zonës sepse në mënyrë të ndjeshme do të ulet edhe ndotja mjedisore. Ky projekt ka fokus kryesor mirëadministrimin (grumbullimin dhe trajtimin) e naftës së vendburimeve që administron Albpetrol, uljen e humbjeve të prodhimit të naftës, ndërtimin e impiantit teknik për mbrojtjen dhe sigurinë e jetës dhe shëndetit të punonjësve që punojnë në atë ambient pune etj. Pra, do të jetë një model edhe për kompanitë e tjera në këtë sektor. Rehabilitimi i 4 sektorëve te prodhimit, përkatësisht ne Kuçovë, Gorisht, Cakran dhe Patos. Këta sektorë janë përzgjedhur për të filluar puna këtë vit dhe investimi në ta do të ul ndjeshëm humbjet e prodhimit te naftës, ku aktualisht humbjet janë për llogaritur në 15-20%. Ne këto projekte do te aplikohen standardet më të mira në industrinë e naftës përsa i përket pajisjeve apo teknologjisë që do të përdoret. Përveç zhvillimit te teknologjisë së nxjerrjes së naftës, që prej muajit Shtator 2023, Albpetrol konkurron edhe me pagat e punonjësve. Vlerësimi i statusit të naftëtarit na bën që të jemi kompani me nivelet më të larta me kompanitë konkurruese, përgjithësisht për ata punonjës që punojnë drejtpërdrejt në terren për nxjerrjen e naftës si operatorët e prodhimit, axhustatorët, punonjësit e remontit etj. Dikur ka pasur një Institut të Naftës, pikërisht me qendër në Fier. Në vitet e demokracisë, qeveri të ndryshme e mbyllën këtë institucion. Tani me zbulimet dhe zhvillimet e reja a është e nevojshme të riaktivizohet ky institut për të mbledhur ekspertizën e inxhinierëve më në zë? Politikat e qeverisë shqiptare në fushën e kërkimit shkencor janë adresuar drejt universiteteve. Për këtë gjë Albpetrol e vlerëson shumë bashkëpunimin që kemi me Universitetin Politeknik, në degët e sektorit përkatës, duke pasur asistencën teknike dhe shkencore pranë kompanisë sonë me studime, analiza, konsulenca dhe oponenca të ndryshme. Ne kemi qenë të angazhuar maksimalisht për një bashkëpunim sa më të frytshëm me këto degë dhe sigurisht që mbetemi të hapur për ta thelluar edhe me tej në të ardhmen këtë bashkëpunim. Sa e vështirë është të jesh në krye të kësaj kompanie shtetërore, në këtë kohë kur të gjitha kompanitë vuajnë për kapital njerëzor? A është prekur Albpetrol nga ikja e profesionistëve, apo ju zbatoni ndonjë politikë për të promovuar më të mirët? Në fakt vështirësia për gjetjen e kapitalit njerëzor, veçanërisht në sektorë specifikë siç është ai i naftës dhe gazit, është një fenomen global në këto momente dhe që po e kalojnë edhe një pjesë e madhe e vendeve më të zhvilluara të Europës. Megjithatë ne jemi përpjekur të stimulojmë dhe afrojmë në strukturat tona punonjës të rinj nga familjet e atyre që kanë punuar dhe dhënë kontributin e tyre më herët për këtë kompani. Pra duke shfrytëzuar një lloj trashëgimie familjare. Albpetrol ka njerëz të cilët jetën e tyre ja kanë kushtuar kësaj industrie. Sigurisht që duke qenë një sektor me vështirësi pune, sektori hidrokarbur e ndien vështirësinë e gjetjes së teknikëve te specializuar si në fushën e prodhimit, ashtu edhe në atë të shërbimeve mbështetëse si mekanik, axhustator, montator etj. Për t’i dalë përpara një situate edhe më problematike që mund të vijë në të ardhmen e afërt, me iniciativën e MIE, shoqëria Albpetrol ka filluar bashkëpunimin me institucionet arsimore profesionale për rihapjen e degëve specifike në profilin e naftës në shkollat profesionale në Qarkun e Fierit dhe jo vetëm. Bashkëpunimi me pushtetin vendor dhe institucionet përkatëse do krijojnë mundësinë e fillimit të një nisme në shkollat e arsimit bazë për prezantimin e këtyre degëve të profilizuara në sektorin hidrokarbur, me qëllim përthithjen e sa më shumë nxënësve që do të duan të arsimohen në këtë sektor. Tashmë që Shqipëria po prek dhe investime të tjera nga kompani private, nevoja për punësim në këtë sektor do jetë edhe më e madhe, ndaj kemi menduar si e vetmja kompani shtetërore e këtij sektori, të jemi pararojë e gjithë tematikës në fjalë. Ju jeni diplomuar për "Mjekësi" dhe në vite keni drejtuar disa institucione të rëndësishme që lidhen me fushën tuaj të studimit. Më vonë kaluat te Energjia dhe sot që jeni te hidrokarburet, a e ka gjetur Eltar Deda "kurën" për "shëndetin" e Albpetrol? Duke vlerësuar maksimalisht besimin e dhënë nga Zv.Kryeministrja njëherazi Ministre e Infrastrukturës dhe Energjisë, Belinda Balluku me emërimin tim në krye të Albpetrol, jam munduar që gjithë eksperiencën dhe aftësitë e mia si administrator në disa institucione, por edhe në biznesin privat t’i vendos në funksion të reformimit të Albpetrol dhe sigurisht arritjes së objektivave kryesore që ka kjo shoqëri. Bashkë me gjithë stafin drejtues, por edhe me të gjithë punonjësit e të gjitha niveleve, jemi duke punuar që Albpetrol të jetë një kompani e shëndetshme dhe efiçente, për të pasur dinjitetin dhe prestigjin që realisht një kompani e tillë duhet të ketë. Asgjë nuk bëhet vetëm, por një punë e mirë bëhet në ekip. Pranë kompanisë Albpetrol kam gjetur një staf me të cilët kam një bashkëpunim dhe bashkëveprim në të gjitha vendimet dhe aktivitetin që kryej për të shëndoshur kompaninë e për ta mbajtur në nivele konkurruese. Vetëm kështu duke punuar si një ekip, kemi punë më rezultative, e një institucion korrekt dhe të shëndetshëm ashtu siç meriton të jetë shoqëria Albpetrol. Ndryshimi ka nisur dhe rezultatet e para kanë ardhur, por sigurisht që nuk ka vend për vetëkënaqësi, sepse sfidat që kemi përpara janë akoma shumë të vështira dhe nevojitet akoma më shumë punë dhe angazhim për të realizuar ato objektiva që i kemi vënë vetes.

Eltar Deda, doktori që po kuron nëntokën

Nga Ilir Xhafaj

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjiri i Kakomesë, “Bukuroshja” e braktisur bëhet gati për TURIZËM

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Eltar Deda, doktori që po kuron nëntokën

Nga Ilir Xhafaj

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?