Dosja e “dosjeve”: Loja e pisët e tranzicionit

Si e ka shfrytëzuar politika prej ’90 çështjen e dosjeve të bashkëpunëtorëve të shtetit: Me të tilla dosje është sulmuar pishtari i Demokracisë Azem Hajdari, por edhe kryeredaktori i parë i RD Frrok Çupi. Me dosje është sulmuar Neritan Ceka e Perikli Teta, madje edhe Rustem Gjata…Si janë përdorur më parë komisionet “Mezini” e “Bezhani” për luftën politike

Në shtator 2022 parlamenti do të duhet të marrë në shqyrtim një nismë të mazhorancës socialiste lidhur me amendimin e ligjit të dekriminalizimit, duke mundësuar verifikimin e të gjithë kandidatëve për deputetë për rekordet e tyre lidhur me Sigurimin e Shtetit. Nisma është politike dhe nuk është e destinuar të japë rezultat dhe nuk është strategji afatgjatë, por efekti kryesor i saj është afatshkurtër, për përdorim politik ditor. Të njëjtin fat, kanë pasur nisma të tilla të njëjta për konsum politik, e fundit e vitit 2009, rrëzuar nga Gjykata Kushtuese me vendimin nr.9 të marsit 2010. Këtë herë preteksti i debatit lidhet me një lajm të prodhuar nga Autoriteti i Dosjeve, sipas të cilit ish Presidenti i Republikës Ilir Meta ka qenë bashkëpunëtor dhe denoncues në favor të Sigurimit të Shtetit. AIDSSH ka dhënë opinione pozitive të Ilir Metën më 2017 kur ai u zgjodh President, por pas mbarimit të mandatit i njëjti institucion dhe të njëjtit drejtues japin opinion negativ për të njëjtin subjekt.