DOSJA E AMBASADAVE 1990, Si u vra 17 vjeçari Altin Basha dhe lindja e Germana-s në ambasadë

Deri më 1 korrik 1990 kishte rreth 60-70 qytetarë që kishin hyrë në ambasadat e ndryshme në Tiranë. Në total 16 qytetarë ishin larguar nga vendi me marrëveshje midis ambasadave dhe qeverisë shqiptarë dhe rreth 20 të tjerë ishin në pritje. E vetmja ambasadë e njohur ku ende nuk kishte asnjë rast hyrjeje ishte ambasada e RFGJ. Prej pak ditësh kishte nisur aktivitetin  diplomatik në selinë e re tek rruga “Skënderbej”.

Më 1 korrik, rreth orës 23.00, pesë persona kapërcyen murin rrethues dhe hynë në oborrin e ambasadës. Ish-ambasadori gjerman në detyrë Werner Daum kujton: “Më 1 korrik 1990 një makinë udhëtoi drejt ambasadës tonë, katër qytetarë kërcyen në oborrin e ambasadës, Sigurimi qëlloi dhe plagosi njërin prej tyre. Më 2 korrik ishin rreth 60-70 refugjatë në ambasada, tek greku, italiani, francezi dhe tek ne… një makinë rrëzoi murin e ambasadës, prej saj vrapuan një grup refugjatësh. Sigurimi qëlloi, një mori plumba në bark e mushkëri, një polic me armë hyri brenda territorit të ambasadës. Në një demonstratë në rrugën e ambasadës u qëlluan me armë dy protestues, një shumë i plagosur u dërgua në spital. Sigurimi veproi tani me një brutalitet të pabesueshëm, por qytetarët nuk lejuan të frikësohen”.