Dita e thyerjes finale

Çfarë ndodhi në selinë e partisë më të madhe opozitare, në 100 minutat e ferrit. Detaje të panjohura deri më tani, dhe një parashikim për të ardhmen e PD pas 8 janarit të dhunshëm. Newsbomb sjell për lexuesit mendimet e dy të rinjve demokratë, që ishin ndarë atë ditë. Adela në godinë, Genti në oborr.

Oborri i Partisë Demokratike me një pamje impresionuese për shkak të hapësirës, shkallëve, një dekori me flamuj të mëdhenj, dy lulishteve të vogla në anë dhe pemëve gjigande që sfidojnë gjelbërimin në zhdukje në qytet, dhe një lloj madhështie që e ofron godina e arkitekturës së regjimit komunist ndërtuar për lavdinë e propagandës së ushtrisë së kohës, mesditën e 8 janarit u shndërrua në një shesh lufte, ku u përzien rreckat e djegura të ambicies, armiqësisë, xhama të thyer, shkopinj, gurë, zemëratë, e gjitha mbuluar nga një mjegull helmuese e gazit lotsjellës. Ajo kthinë përpara Parlamentit, buzë Bulevardit Gjergj Fishta, në mes të Xhamisë së madhe dhe Katedrales Katolike, që prej 9 vitesh është shtëpia e demokratëve, ziente nga tensioni që ka kulmuar mes Lulzim Bashës dhe Sali Berishës. Nuk ka paqe. Përplasja e brirëve e 8 janarit, pas shumë betejave që nisën me 9 shtator kur Basha përjashtoi liderin historik nga Grupi Parlamentar, pasi ai u shpall non-grata nga SHBA, ishte deri më tani më shkatërrimtarja, por me gjasë jo e fundit.