David Kostelancik, ambasadori i ri amerikan që do “drejtojë” Shqipërinë

Media amerikane e ka vlerësuar si engjëlli kundër djallit dhe një diplomat që punon kundër lobistëve. Në Hungari ka bërë beteja të forta me kryeministrin Orban për Sorosin dhe lirinë e medias dhe për këto përplasje janë zhvilluar debate të forta në Senat. Është herë e dytë që vjen në Shqipëri pas detyrës si atashe politik në 1992-‘94 me ambasadorin William Ryerson. Dashuria dhe përplasjet në atë kohë me presidentin Sali Berisha dhe rikthimi në Tiranë pas 29 vjetësh, ku e pret po ai personazh i vjetër por me një përplasje të re. Kush është ambasadori i ri i SHBA në Tiranë që do të nisë punën në shtator. A do ndryshojë kurs nga politika e ndjekur nga paraardhësja e tij Yuri Kim për raportet me opozitën dhe qeverinë? Një portret për shefin e 23-të të Ambasadës Amerikane në Tiranë në historinë e marrëdhënieve mes dy shteteve. CV E DAVID KOSTELANCIK EMRI: David Kostelancik. DETYRA: I nominuar si Ambasador i Jashtëzakonshëm dhe Fuqiplotë i SHBA në Shqipëri. VENDLINDJA: Chicago, Illinois. VITLINDJA: 1965 MOSHA: 58 vjeç PREJARDHJA : Çekosllovaki, gjyshërit emigruan në SHBA në vitet ‘20-të STATUSI FAMILJAR: I martuar. Ka tre djem STATUSI PROFESIONAL: Diplomat senior i Shërbimit të Jashtëm me gradën diplomatike, ministër Këshilltar EDUKIMI: 1. Diplomë bachelor për arte në Northwestern University, Illinois Diplomë master për Matematikë dhe Shkenca Politike në The University of Michigan. Diplomë master për Politikat e Sigurisë Kombëtare në National War College, Washington. GJUHËT E HUAJA: Rusisht, hungarisht, shqip, turqisht. AMBASADAT AMERIKANE QË KA SHËRBYER DHE DETYRAT: Moskë-Rusi, këshilltar ministër për Çështjet politike i ambasadorit Thomas Pickering. Vjenë-OSBE, zëvendëskëshilltar politik në OSBE. Bruksel-NATO, diplomat në misionin e SHBA në NATO. Tiranë-Shqipëri, atashe politik në Ambasadën Amerikane me ambasadorin William Ryerson, (1992-1994). Ankara-Turqi, diplomat i ambasadës amerikane në Turqi, Ankara. Budapest-Hungari, I Ngarkuar me Punë në ambasadën amerikane dhe zëvendëshef i misionit, (2016-2019). DETYRA NË DEPARTAMENTIN E SHTETIT: Drejtor i Zyrës për Çështjet e Rusisë në Byronë e Departamentit të Shtetit për Çështjet e Evropës dhe Euroaziszë, korrik 2012-gusht 2014. Këshilltar Senior në Departamentin e Shtetit në Komisionin e Kongresit të Hesinkut gusht 2014-Gusht 2015. Zëvendësdrejtror i Zyrës për Evropën Qendrore për Çështjet e Byrosë për Evropën dhe Euroazisë. Drejtor i Zyrës së Departamentit të Shtetit për Evropën Qendrore dhe Jugore, gusht 2019. E trazuar me lajme gjithëfarësoj, skandale, protesta dhe zgjedhje, politika në Shqipëri është më shumë se kurrë me sy e vesh nga SHBA. Në shtator, diplomati David Kostenlacik do nisë nga puna në Tiranë si shefi i 23-të i ambasadës amerikane në Shqipëri në historinë 101-vjeçare të marrëdhënieve diplomatike. Me shumë gjasë, në qershor ai do marrë konfirmin në Komisionin e Jashtëm në Senat dhe në ditët e para të sezonit të ri politik do ulet në zyrën e shefit të ambasadës në rrugën e Elbasanit. Mbërritja dhe nisja nga puna e Kostelancik ka një domethënie të madhe për të ardhmen e Shqipërisë politike. Vendimi “non grata” ndaj Sali Berishës, skandali “McGonigal”, ndikimet e luftës në Ukrainë, financimi nga Rusia i PD-së me skandalin Nick Muzin, favorizmet e një kompanie ruse për të investuar në Shqipëri në fushën e naftës dhe gazit, rritja e interesit rus për turizëm në bregdetin tonë, marrëdhëniet e Kosovës me Serbinë, janë një tufë problemesh për të cilat SHBA duket se ka zgjedhur për t’i menaxhuar njeriun e duhur në kohën e duhur. Diplomati me më shumë se tri dekada karrierë, do shërbejë si letër lakmuesi se si do jenë marrëdhëniet e tij me qeverinë dhe opozitën. Si do jenë raportet e tij me mazhorancën, specifikisht me kryeministrin Edi Rama dhe me opozitën, specifikisht me dy kryetarët e saj që vijojnë betejën për vulën Sali Berisha dhe Enkelejd Alibeaj, ashtu do jetë edhe e ardhmja e marrëdhënieve mes dy vendeve. IKU NGA TIRANA 29 VJEÇ DHE KTHEHET PAS 29 VJETËSH. PËRSËRI NË “LUFTË” ME BERISHËN Ka një koicidencë numrash në rikthimin e David Kostelancik në ambasadën amerikane në Tiranë. Ka qenë atashe politik në këtë ambasadë nga viti 1992 deri në 1994 dhe u largua nga kjo detyrë kur ishte 29 vjeç. Tashmë pritet të kthehet në Tiranë, fiks pas 29 vjetësh. Por në detyrën e lartë të Ambasadorit të Jashtëzakonshëm dhe Fuqiplotë me maturinë dhe eksperiencën e mjaftueshme. Ai është njëkohësisht i pari diplomat amerikan që vjen për herë të dytë në ambasadë. Punonjës të stafit të asaj kohe në ambasadën amerikane në Tiranë tregojnë se Kostelancik ishte pjesë e stafit të ngushtë të ambasadorit William Ryerson dhe pas përfundimit të misionit 2-vjeçar u largua. Një njohës mesatar i gjuhës shqipe, Kostelancik kishte mbërritur me Tiranën e trazuar të asaj kohe me zellin e një diplomati të ri dhe në CV kishte një armë jo pak efektive. Kishte mësuar gjuhën shqipe në kursin e zakonshëm 9 mujor në Washington me profesor Eduard Zadrimën, ashtu si shumë diplomatë të tjerë. Ishte koha kur ambasador i SHBA në Shqipëri ishte William Ryerson dhe kur marrëdhëniet mes dy vendeve kaluan përmes një “up and down-i” të fortë. Në fillim një raport i shëlqyer në të cilën diplomacia amerikane kishte shfaqur hapur mbështetjen ndaj PD-së, si partia e parë opozitare në vend që po drejtonte rrëzimin e komunizmit dhe pas ardhjes në pushtet në 1992, kishin nisur të acaroheshin për shkak të gabimeve që po bënte administrata e drejtuar nga presidenti Sali Berisha. Shkak shërbyen disa përplasje mes kreut të shtetit shqiptar dhe ambasadorit William Ryerson që lidheshin me mungesën e demokracisë dhe ndërhyrjet në drejtësi. Por çështja që i vuri vulën përplasjes ishte thyerja e embargos së naftës të vendosur nga OKB ndaj Jugosllavisë për shkak të luftës në Bosnje. Pika e vlimit ishte ultimatumi që Ryerson bëri ndaj Berishës: Nëse nuk ndërprisni thyerjen e embargos presidenti Bill Clinton do bëjë një deklaratë të fortë kundër qeverisë shqiptare. Dhe në këtë kazan që po vlonte, atasheu politik David Kostelancik kishte rolin e tij. Kjo situatë, por edhe ngajrje të tjera bënë që diplomati i ri ta njihte mirë Shqipërinë e asaj kohe, qeverinë, opozitën dhe veçanërisht presidentin Sali Berisha. As nuk do ta kishte menduar kurrë kur la Tiranën se pas 29 vjetësh do kthehej në krye të ambasadës dhe politikani me të cilin do ketë më shumë të bëjë me zhvillimet në Shqipëri, do jetë sërish Sali Berisha. I shpallur “non grata” nga shefi i tij direkt Antony Blinken më 19 maj 2021, tashmë në krye të PD-së pa vulë, pritet të jetë sërish personazhi kryesor që Kostelancik do ta ketë në agjendën e tij. Paraardhësja e Kostelancik, Yuri Kim, është denigruar rregullisht gjatë gjithë mandatit nga Berisha, me akuza dhe etiketime nga më ekstreme dhe nuk janë të paktë ata që pyesin nëse do vijojë kjo situatë. A do ta quajë Berisha edhe Kostelancik “guvernator që synon shkatërrimin e opozitës”? A do ta quajnë Berisha edhe Kostelancik “bashkëpunëtor me kryeministrin Edi Rama për të shkatërruar PD-në dhe tradhëtuar SHBA-në”? Por nuk mbeten pas as raportet e kryeministri Edi Rama. Pyetja kryesore është: a do ndryshojë kurs SHBA ndaj qeverisë që mbart jo pak probleme dhe ndaj kryeministrit Rama pas shpërthimit të skandalit me ish-shefin e kundërzbulimit të FBI Charles McGoningal? DAVID KOSTELANCIK, PASARDHËSI I EMIGRANTËVE NGA ÇEKOSLLOVAKIA QË U BË DIPLOMAT David Kostelancik është nga të rrallët ambasadorë që kanë ardhur në Tiranë që më parë kanë drejtuar një ambasadë. Ndonëse jo me statusin e ambasadorit, ai ka qenë i Ngarkuar me Punë në ambasadën amerikane në Hungari. Megjithatë, detyra e Ambasadorit të Jashtëzakonshëm dhe Fuqiplotë në Shqipëri është detyra më e lartë që ai ka mbajtur deri tani në karrierë. Është e zakonshme që në SHBA një familje të ketë prejardhje emigrantësh. Por jo çdo familje me këtë status nxjerr diplomatë të kalibrit të Kostelancik. Familja e tij ka ardhur në SHBA larguar nga Çekosllovakia në vitet ’20-të si emigrantë, për t’u sistemuar në Chikago. Në këtë qytet, David u rrit dhe arsimua si fëmijë emigrantësh i brezit të dytë. I diplomuar për matematikë, arte dhe siguri ushtarake, David Kostelancik ka përzjerjen më të çuditshme dhe më të vlefshme njëkohësisht në arsimimin e tij. Kanë qenë këto tre diploma që i kanë dhënë më shumë vlerë drejtimit që ai mori në karrierë si diplomat duke shtuar këtu edhe mësimi i disa gjuhëve të huaja, kryesisht lindore. Rusisht, hungarisht, shqip dhe turqisht, ai jo vetëm i flet mirë, por i kanë shërbyer jashtëzakonisht në vendet ku ka shërbyer si pjesë e shërbimit të Jashtëm. Për më shumë se tre dekada ai është pjesë e shërbimit të Jashtëm të SHBA me një karrierë që shumë kolegë ia kanë zili. Në karrierën e tij si diplomat ka punuar në gjashtë ambasada, në Moskë, në misionin e SHBA në OSBE në Vjenë, në misionin e SHBA në NATO në Bruksel, në Tiranë, në Ankara dhe në Budapest. Në ambasadën amerikane në Moskë ka mbajtur detyrën e Këshilltarit ministër për Çështjet politike pranë ambasadorit Thomas Pickering. Në misionin amerikan në OSBE në Vjenë ka mbajtur detyrën e zëvendëskëshilltarit politik. Në misionin amerikan në NATO ka mbajtur detyrën e një diplomati të thjeshtë. Në Tiranë ka mbajtur detyrën e atasheut politik pranë ambasadorit Rayerson në vitet 1994-1996. Po ashtu edhe në Turqi në ambasadën amerikane në Ankara. Detyra më e lartë ka qenë ajo kur Kostelancik shërbyer në ambasadën amerikane në Budapest nga viti 2016 deri në 2019. Për një vit ai ishte zëvendësshef i misionit dhe më pas i Ngarkuar me Punë. Kostelancik ka mbajtur katër detyra në Departamentin e Shtetit. E para ka qenë që nga korriku 2012 deri në 2 gusht 2014 si Drejtor i Zyrës për Çështjet e Rusisë në Byronë e Departamenti të Shtetit për Çështjet e Evropës dhe Euroaziszë. Më pas, për një vit deri në 2015, ka qenë Këshilltar Senior në Departamentin e Shtetit në Komisionin e Kongresit të Helsinkit. Një tjetër detyrë e rëndësishme ka qenë ajo si z ëvendësdrejtor i Zyrës për Evropën Qendrore për çështjet e Byrosë për Evropën dhe Euroazisë. Ndërkohë detyra e fundit përpara nominimit për në Shqipëri ka qënë deri në gusht vitin 2019 si Drejtor i Zyrës së Departamentit të Shtetit për Evropën Qendrore dhe Jugore. David Kostelancik është i martuar dhe ka 3 djem. KOSTELANCIK DHE SOROS, “I VIZATUAR” SI ENGJËLLI KUNDËR DJALLIT David Kostelancik është një diplomat që nuk e ka patur të shtruar me tapet të kuq rrugën përgjatë karrierës së tij. Nuk janë të pakta rastet kur ai është kthyer në qendër të vëmendjes së disa përplasjeve të mëdha deri në Washington. Por fakti është se shumicën e betejave të tij diplomatike, i ka fituar. Kulmin e tyre e mban ajo në vitin 2017 gjatë kohës kur president ishte republikani Donad Trump. Kostelancik ishte i Ngarkuar me Punë në Hungari dhe ndaj tij nisi një furi sulmesh pikërisht nga disa kongresmenë republikanë. Mes tyre veçohej Cornelius Harvey McGillicuddy, i cili e kritikoi ashpër diplomatin në Kongres që sipas tij po bënte një punë jo të mirë në Budapest. George Soros ishte shpallur “non grata” nga qeveria hungareze dhe situata vërtetë u tensionua. Por kjo ishte vetëm njëra anë e medaljes. Jo vetëm demokratët, por edhe media amerikane u rreshtua në krah të David Kostelancik. Në një shkrim të gjatë në revistës diplomatike “The American interest” të asaj kohe, David Kostelancik u mor në mbrojtje me argumenta të fortë dhe ai i vizatua si engjëlli që luftoi kundër djallit. Autori i shkrimit më 23 nëntor 2017 i besonte me argumente diplomatit dhe njëkohësisht mbajti qëndrim duke hedhur akuza të rënda ndaj kongresmenit si një lobist që çonte ujë në Moskë. Duke hedhur publikisht pothujse një parrullë “besoji diplomatit, jo lobistit”, mes të tjerave gazetari shkruante: “Është koha për të vlerësuar amerikanët patriotë që po shërbejnë në vijën e parë jashtë vendit - njerëz si Dave Kostelancik, të cilët flasin për vlerat dhe interesat e kombit tonë, jo për dollarë dhe cent”. (Melia Thomas, The diplomat vs the lobist, The american interest, november 23, 2017, Washnigton, USA) Por kjo nuk ishte as beteja e parë dhe as e fundit e David Kostelancik. Një nga fjalët kyçe të opozitës shqiptare në vitet e fundit ka qenë George Soros. Miliardieri amerikan me orgjinë hungareze që ka dhënë jo pak ndihma për Shqipërinë është cilësuar nga Sali Berisha dhe Ilir Meta si njeriu që ka lobuar me paratë e tij për të dëmtuar opozitën shqiptare, në veçanti PD dhe konkretisht Sali Berishën. Madje vetë Berisha e quan atë njeriun kryesor që ka sponsorizuar shpalljen e tij “non grata” nga SHBA. Në këtë linjë ka qenë në atë kohë edhe Ilir Meta që mbante postin e presidentit të Republikës. Në një nga fjalimet e tij Meta presidenti ka përmendur kryeministrin e Hungarisë Viktor Orban që sipas tij ndërmori një politikë të drejtë antiSoros duke e shpallur non grata dhe duke mos përfillur as BE e as SHBA. Vendimi tjetër konkret ishte vendimi i qeverisë për mbyllje e një univeristeti në Budapest që ishte ngritur me paratë e Soros. Por në atë kohë David Kostelancik që mbante detyrën e të Ngarkuarit me Punë reagoi ashpër duke e cilësuar vendim të gabuar. Për “Zërin e Amerikës” më 4 prill 2017 diplomati amerikan tha: “Shtetet e Bashkuara janë të zhgënjyera nga miratimi i përshpejtuar i legjislacionit që synon të mbyllë Universitetin e Evropës Qendrore Europian Central University. Shtetet e Bashkuara do të vazhdojnë të mbrojnë pavarësinë e këtij univeristeti”. Por pak ndikoi ky reagim për kryeministrin Orban, i cili ishte i vendosur në luftën ndaj George Soros. Pikërisht për këtë vendim presidenti në detyrë Ilir Meta më 2 korrik 2019 bëri ndoshta një nga deklaratat të të forta: “Nuk e kam dëgjuar me vëmendje Viktor Orbanin në vitin 2000 në janar, ku po i flisja me gjithë dashuri për Sorosin, se me thënë të drejtën atëherë na ndihmoi në kohën e opozitës se dhe ai socialist është në pikëpamje, edhe më tha keni kujdes se nuk është aq demokrat sa duket dhe shpesh komploton kundër demokracisë”. Tashmë i njëjti diplomat vjen si ambasador në Tiranë. Janë të njëjtët personazhe por me qëndrime të ndryshme. Në Shqipëri është opozita që sulmon Soros, ndërkohë qeveria nuk ka të njëjtën qasje. Rrjedhimisht, kuptohet pak a shumë se si mund të jetë panorama: Berisha dhe Meta do sulmojnë Soros. Kryeministri Rama nuk do t’i mbështesë dhe për ambasadorin e ri kjo mjafton. KOSTELANCIK DHE MEDIA Ka një histori domethënëse në karrierën e Kostelancik në raport me median në vititn 2017 po në Hungari. Gjatë kohës që ishte i Ngarkuar me Punë në Budapest ai u bë pjesë e një angazhimi diplomatik për të mbrojtur lirinë e medias, në vendin në të cilin ishte dhe vazhdon të jetë kryeministër Viktor Orban. Ishin 22 kongresmenë të Partisë Demorartike në SHBA që i kërkuan Departamentit të Shtetit dhe administratës së Trump të ndërhynin fort për pëprlasjet mes kryeministrit dhe medias. Ishte një projekt amerikan që mbështeste financiarisht mediat e pavarura në Hungari por kjo u pengua të aplikohej nga qeveria. Sipas demokratëve, Trump e trajtoi butë këtë çështje dhe sot në Budapest mbahet ende mend kur i Ngarkuari me Punë në ambasadën amerikane ne Budapest David Kostelancik bëri bujë me deklaratën e tij më 20 tetor 2017 ditën e lirisë së medias në vendin që ishte 13 vjet që ishte anëtarësuar në BE dhe 18 vjet në NATO. "Shtetet e Bashkuara dënojnë pa mëdyshje çdo përpjekje për të frikësuar ose heshtur gazetarët." Gazetat dhe portalet në Budapest morën flakë dhe e e trajtuan këtë deklaratë si mbështetjen e madhe që u ishte bërë atyre. Titulli “Kostenlancik kriton qeverinë për kontrollin ndaj medias”, ishte jo vetëm bombastik në aspektin gazetaresk por edhe politik. Kjo solli reagimin e qeverisë hungareze. Në një deklaratë të saj Ministria e Jashtme e Hungarisë i cilësoi fjalët e Kostelancik si ndërhyrje në zgjedhjet parlamentare që do mbaheshin në 2018. Sekretari i Ministrisë së Jashtme, Magyar Levente, bëri një deklaratë sfiduese. Në emër të qeverisë ai tha: “ Hungaria, një shtet sovran, proteston që çdo vend duhet të ndërhyjë në zgjedhjet e ardhshme parlamentare”. E ndërsa për Soros, Kostelancik mund të jetë në një mendje me kryeministrin Rama, pak gjasa ka që të jetë për median. Duket se në një terren që ka shumë probleme, ambasadori i ri Kostelancik do këtë ndikimin e vet në median shqiptare. A DO NDRYSHOJË KURS SHBA NDAJ BERISHËS DHE RAMËS? AMBASADORËT SHQIPTARË FLASIN PËR AMBASADORIN AMERIKAN Dhe koicidencat e Kostelancik me Shqipërinë vijojnë. E la Tiranën në kulmin e përplasjes mes SHBA dhe Sali Berishës dhe kthehet në të, në kulmin e përplasjes me Sali Berishën. Të qenurit ambasador në këtë situatë, e ka një të mirë, se ai e njeh mirë politikanin Berisha, por nga ana tjetër ka si problem paragjykimin që mund të ketë. Teksa e nominoi më 23 janar, u duk se presidenti Biden kishte firmosur një urdhër rutinë. Në fakt, duket se caktimi i David Kostelancik në Tiranë kur përplasja e Lindjes Ruse me Perëndimin është më i madh se kurrë me luftën në Ukrainë, kupton që ka qenë një vendim i studiuar mirë. Duket qartë që SHBA ka interes të rëndësishëm mbështetjen e demokracive në rajonin Ballkanik dhe në këtë konteks Shqipëria është një aelat i qëndrushëm dhe i përhershëm dhe si të tillë këron ta mbajë përherë SHBA. U duk sikur skandali me shefin e kundërzbulimit të FBI-së, Charles McGonigal, e lëkundi këtë besim ndaj Shqipërisë. Por në fakt, nuk është kështu. Konfirmimin e politikës mbështetëse e bëri pak ditë më parë emisari për Ballkanin Perëndimor, Gabriel Escobar, teksa tha: “Departamenti i Shtetit nuk është pjesë e këtij hetimi. Në lidhje me pyetjen për akuzat për agjentin McGonigal më duhet t’u referoj të pyesni FBI-n. Do të them se nga perspektiva e DASH dhe qeverisë amerikane Shqipëria është një aleate solide e NATO-s, një partner i mirë bilateral. Ka qenë një ndihmëse e madhe për ne në Këshillin e Sigurimit. Nuk ka asnjë ndikim në marrëdhëniet tona bilaterale mes SHBA dhe Shqipërisë”. Kryeministri Edi Rama e ka shfrytëzuar jo pak këtë mbështetje. Në interpelancën e 2 marsit në parlament ai lëshoi dhjetëra fjalë që bënin një tufë sarkazme që jo vetëm hidhte poshtë bashkëpunimin e tij me McGonigal në favor të Rusisë dhe kundër opozitës shqiptare por reklamoi edhe një herë mbështetjen e madhe që ka nga SHBA. Tha Rama në interpelancë: “Ka 100 vjet që kjo botë thotë që Amerika blen, Amerika palos, Amerika dyllos kë të dojë, por ja që bota s’kish parë gjë akoma se dolët ju nga Lana që zbuluat se Amerikën e bleka deri dhe një farë Edvin Kristaq Rama me banim në Surrel, e paloska Amerikën me gjithë FBI-në një Goni Goni nga Tropoja që banon në Bronks dhe në fund pastaj për lezet e dylloska me gjithë CIA-n një Dori Duçka nga Shqipëria, poliagjent që banon te kthesa e TEG-ut. Pika, pika kush e ka qeverisur Shqipërinë”. AMBASADORËT PËR AMBASADORIN Cilat janë prishtmërinë e ambasadorit David Kostelancik në Shqipëri? Kush më mirë se dy diplomatë të njohur shqiptarë mund ti japin përgjigje kësaj pyetje. I pari Fatos Tarifa që ka shërbyer si ambasador në Washington nga 2001 deri në 2005 dhe i dyti Arben Çejku që ka shërbyer si ambasador në Maqedoni dhe Kosovë. Ambasadori Tarifa vazhdon të ketë memorizuar një thënie të ish-ambasadorit James Jeffrey kur e takoi në Washington përpara se të merrte detyrën në Tiranë: “Duke filluar nga dita e djeshme, për mua Shqipëria është vendi më i rëndësishëm në botë. Në të gjithë administratën amerikane unë jam i vetmi njeri që do të mendoj 24 orë në ditë dhe shtatë ditë në javë për Shqipërinë, për shkak se më është besuar të përfaqësoj qeverinë e vendit tim në vendin tuaj. Në këtë funksion, misioni im kërkon që unë të mendoj vazhdimisht për marrëdhëniet e Shteteve të Bashkuara me Shqipërinë, ashtu sikurse ju mendoni vazhdimisht për marrëdhëniet e Shqipërisë me Shtetet e Bashkuara”. Tarifa e merr këtë citim si përgjigjen më të mirë të pyetjes se çfarë pritet nga një ambasador që do nisë punën në Tiranë si Kostelancik duke shtuar se parësor është interesi kombëtar amerikan, i cili është i pakompromentueshëm. Ndërsa diplomati Arben Çejku flet me superlativa për Kostelancik si sipas tij është një emër i shquar në komunitetin e diplomatëve amerikanë. Sipas Çejkut vetë profili i tij tregon pak a shumë “agjendën” e prioriteteve që pritet të drejtojë gjatë mandatit në Tiranë. Dhe këtu Çejku rendit konkretisht këto prioritete: “Përveç forcimit të mëtejshëm të marrëdhënieve tona dypalëshe, për të cilat ai ka njohuri të thella si ish-diplomat i SHBA në Tiranë, duket se qeveria amerikane po kërkon të jetë më aktive për sfidat që ne kemi në luftën kundër krimit, korrupsionit dhe narkotrafikut. Njëkohësisht, zhvillimet në rajon me sfond kërcënimet e mundshme që vijnë nga lufta në Ukrainë, shprehin interesin amerikan për më shumë prezencë diplomatike të ekspertizës së lartë në rajon, përfshi Shqipërinë”. Pak a shumë në të njtën linjë edhe Tarifa e vijon argumentin e tij me faktin se edhe pse Sali Berisha është i vetmi president në histori, i ftuar në Shtëpinë e Bardhë nga dy presidentët George H. Bush dhe Bill Clinton e megjithatë administrata amerikane e ka shpallur non grata që nënkupton se për ta, nuk ka rëndësi individi. Në këtë linjë, Tarifa mendon se nuk pritet ndryshim të linjës së qëndrimit edhe me ardhjen e ambasadorit të ri Kostelancik. Për këtë Tarifa shton: “Shpallja e Sali Berishës dy vite më parë një person ‘non grata’ nga sekretari Blinken nuk ishte një vendim personal i tij, por një vendim i administratës së Shteteve të Bashkuara, mbështetur në fakte mjaftueshmërisht të arsyeshëm për të. Të mendosh se me largimin e “guvernatores” Kim siç në një mënyrë dëshpërimisht skandaloze e ka cilësuar Berisha ambasadoren e nderuar të Shteteve të Bashkuara në Shqipëri dhe me ardhjen e një ambasadori të ri amerikan në Tiranë ky qëndrim mund të ndryshojë, është një naivitet kaq i madh, saqë asnjë njëri i arsyeshëm dhe me sado pak njohuri mbi politikën e Shteteve të Bashkuara nuk do ta merrte seriozisht”. Edhe diplomati Arben Çejku nuk beson se do ketë ndryshim të kursit të Washingtonit me ardhjen e Kostelancik. Në këtë kontekst ai thekson: “ Nuk besoj se do të ketë ndryshim kursi, por përkundrazi vijim të mbështetjes për një drejtësi të re sa më funksionale dhe produktive, duke larguar sa më shumë duart e politikës nga puna e organeve të drejtësisë. Shqipëria ka nevojë për mbështetje të vazhdueshme të SHBA dhe besoj se ambasadori i ri do të shënojë rezultate pozitive të dobishme për ne dhe SHBA”. Megjithatë hamendjet, parashikimet janë ato që diplomatët dhe analistët kuptojnë dhe mendojnë se do ndodhin. Duhet të presim shtatorin për të parë se çfarë do të bëjë konkretisht David Kostelancik në Shqipëri. Tirana nuk është Budapesti dhe politikanët dhe media hungareze nuk janë shqiptarë. Dhe këtë ai sigurisht që e di. E mësoi jo pak në vitin 1992 kur mbërriti për herë të parë në vendin që sapo kishte rrëzuar komunizmin dhe kur iku në 1994 la pas një qetësi para stuhisë. Tani duhet ta vazhdojë në një kohë tjetër pasi kanë rrjedhur shumë ujra. Kanë kaluar 29 vjet dhe historia nuk përsëritet. Ajo vetëm mund të rimojë, siç thonë me ironi politologët amerikanë. (22 AMBASADORËT E SHBA NË SHQËPRI 1922-2023) MAXWELL BLAKE; Komisioner amerikan në Shqipëri, në rangun e ministrit fuqiplotë dhe i dërguar i jashtëzakonshëm. Koha e qëndrimit në detyrë: 6 muaj e 6 ditë/Emërimi: 10 qershor 1922/Letrat kredenciale: 23 qershor 1922/Largimi: 4 dhjetor 1922 ULYSSES S. GRANT-SMITH; Ministër fuqiplotë i SHBA-së dhe i dërguar i jashtëzakonshëm në Shqipëri. Koha e qëndrimit në detyrë: 2 vjet, 4 muaj e 17 ditë/Emërimi: 22 shtator 1922/ Letrat Kredenciale: 4 dhjetor 1922/Largimi: 8 shkurt 1925. CHARLES CALMER HART; Ministër fuqiplotë dhe i dërguar i jashtëzakonshëm i SHBA-së në Shqipëri Koha e qëndrimit në detyrë: 4 vjet e 5 ditë/Emërimi: 27 maj 1925/Letrat Kredenciale: Herën e parë te presidenti Ahmet Zogu, më 1 gusht 1925; herën e dytë te mbreti Zogu i Parë, më 13 dhjetor 1928/ Largimi: 12 dhjetor 1929 HERMAN BERNSTEIN; Ministër fuqiplotë i SHBA-së dhe i dërguar i jashtëzakonshëm në Shqipëri Koha e qëndrimit në detyrë: 3 vjet, 5 muaj e 4 ditë/Emërimi: 17 shkurt 1930/Letrat Kredenciale: 28 prill 1930, te mbreti i shqiptarëve Zogu I/Largimi: 24 shtator 1933. GEORGE POST WHEELER; Ministër fuqiplotë i SHBA-së dhe i dërguar i jashtëzakonshëm në Shqipëri Koha e qëndrimit në detyrë: 11 muaj e 4 ditë/Emërimi: 26 gusht 1933/Letrat Kredenciale: 28 nëntor 1933/Largimi 1 nëntor 1934. HUGH GLADNEY GRANT; Ministër fuqiplotë i SHBA-së dhe i dërguar i jashtëzakonshëm në Shqipëri. Koha e qëndrimit në detyrë: 11 muaj e 4 ditë/Emërimi: 9 gusht 1935/Letrat Kredenciale: 8 nëntor 1935/Largimi: 27 shtator 1939 pas pushtimit të Shqipërisë nga Italia më 7 prill 1939. JOSEPH EARLE JACOBS; Drejtues i misionit vëzhgues diplomatik në Shqipëri Koha e qëndrimit në detyrë: 5 muaj e 2 ditë/Emërimi: 10 prill 1945/Letrat Kredenciale: 8 maj 1945/Largimi: 10 tetor 1946. GEORGE DAILEY HENDERSON, Sekretar i misionit amerikan në Shqipëri. Koha e qëndrimit në detyrë: 1 muaj e 3 ditë/Emërimi: 10 tetor 1946/Marrja e detyrës: 11 tetor 1946/Largimi: 14 nëntor 1946 DAVID HEYWOOD SWARTZ; I ngarkuar i përkohshëm me punë i SHBA-së në Shqipëri. Koha e qëndrimit në detyrë: 23 ditë/Emërimi: 15 mars 1991/Marrja e detyrës: 20 mars 1991/Largimi: 12 prill 1991 CHRISTOPHER ROBERT HILL; I ngarkuar i përkohshëm me punë i SHBA në Shqipëri. Koha e qëndrimit në detyrë: 7 muaj e 14 ditë/Emërimi: 15 mars 1991/Largimi: 1 tetor 1991. WILLIAM EDËIN RYERSON; Ambasador i jashtëzakonshëm dhe fuqiplotë I SHBA në Shqipëri. Koha e qëndrimit në detyrë: 2 vjet, 9 muaj e 22 ditë/Emërimi: 2 dhjetor 1991/Letrat Kredenciale: 21 dhjetor 1991/Largimi 13 tetor 1994 JOSEPH EDËARD LAKE; Ambasador i jashtëzakonshëm dhe fuqiplotë i SHBA-së në Shqipëri Koha e qëndrimit në detyrë: 1 vit, 5 muaj e 26 ditë/Emërimi: 5 korrik 1994/Letrat Kredenciale: 17 tetor 1994.Largimi: 15 mars 1996 (dorëheqje). MARISA R. LINO; Ambasadore e jashtëzakonshme dhe fuqiplotë e SHBA-së në Shqipëri Koha e qëndrimit në detyrë: 2 vjet, 8 muaj e 16 ditë/Emërimi: 2 korrik 1996/Letrat Kredenciale: 4 shtator 1996/Largimi 20 maj 1999. ROBERT HOLMES FROWICK; I ngarkuar me punë i ambasadës amerikane në Shqipëri Koha e qëndrimit në detyrë: 2 muaj e 11 ditë/Emërimi: 20 maj 1999/Largimi 31 korrik 1999 JOSEPH LIMPRECHT; Ambasador i jashtëzakonshëm dhe fuqiplotë i SHBA në Shqipëri. Koha e qëndrimit në detyrë: 3 vjet, 3 muaj e 20 ditë/Emërimi: 7 korrik 1999/Letrat Kredenciale: 8 shtator 1999/Vdiq në detyrë: 9 maj 2002. JAMES FRANKLIN JEFFREY; Ambasador i jashtëzakonshëm dhe fuqiplotë i SHBA në Shqipëri. Koha e qëndrimit në detyrë: 1 vit, 7 muaj e 20 ditë/Emërimi: 3 tetor 2002/Letrat Kredenciale: 22 tetor 2002/Largimi 2 maj 2004 MARCIE BERMAN RIES; Ambasadore e jashtëzakonshme dhe fuqiplotë e SHBA në Shqipëri. Koha e qëndrimit në detyrë: 2 vjet, 8 muaj e 14 ditë/Emërimi: 18 tetor 2004/Letrat Kredenciale: 30 tetor 2004/Largimi 16 qershor 2007 JOHN LOVELLE WITHERS II; Ambasador i jashtëzakonshëm dhe fuqiplotë i SHBA-së në Shqipëri. Koha e qëndrimit në detyrë: 3 vjet, 2 muaj e 16 ditë/Emërimi: 28 qershor 2007/Letrat Kredenciale: 25 gusht 2007/Largimi 10 nëntor 2010 ALEXANDER ARMANDO ARVIZU; Ambasador i jashtëzakonshëm dhe fuqiplotë i SHBA-së në Shqipëri. Koha e qëndrimit në detyrë: 4 vjet, 1 muaj e 5 ditë/Emërimi: 1 tetor 2010/Letrat Kredenciale: 6 dhjetor 2010/Largimi 11 janar 2015. DONALD LU; Ambasador i jashtëzakonshëm dhe fuqiplotë i SHBA-së në Shqipëri Koha e qëndrimit në detyrë: 3 vjet, 6 muaj e 11 ditë/Emërimi: 17 dhjetor 2014/Letrat Kredenciale: 13 janar 2015, te presidenti i Shqipërisë Bujar Nishani/Largimi: 24 korrik 2018 LEYLA MOSES-ONES; E ngarkuar me punë, zëvendësshefe e misionit të SHBA-së në Shqipëri. Koha e qëndrimit në detyrë: 1 vit, 4 muaj e 1 ditë/Emërimi: 28 shtator 2018/Marrja e detyrës: 10 dhjetor 2018/Përfundimi: 27 janar 2020 (si drejtuese e ambasadës). YURI KIM, Ambasadore e jashtëzakonshme dhe fuqiplotë e SHBA-së në Shqipëri Emërimi: 19 dhjetor 2019/Letrat Kredenciale: 27 janar 2020/Largimi i mundshëm: Korrik 2023. FUND

David Kostelancik, ambasadori i ri amerikan që do “drejtojë” Shqipërinë

Nga Roland Qafoku

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

Gëzim Myshketa: “Sempre Avanti”! Çdo mbrëmje fillon nga zero!

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

David Kostelancik, ambasadori i ri amerikan që do “drejtojë” Shqipërinë

Nga Roland Qafoku

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?