Çfarë ka Akoma për Rozana RADIN! 

Çdokush nga ne akoma shpreson tek një dashuri e humbur apo se një dashuri që po venitet mund të çelë prapë, apo se dikush do mund të rikthehet, në një emër që shfaqet mbi ekran, në atë takimin e “papritur” pikërisht në rrugën ku ai apo ajo ecën përditë.

Të gjithë besojmë akoma se diçka e mirë do të ndodhë, se dëshira do të realizohet, se në fund çdokush e meriton dashurinë. Fjalë, të cilat në botën e Inteligjencës Artificiale që po tenton të humanizojë gjithnjë e më shumë ekzistencën e saj, duken të largëta, por nuk e kanë humbur aspak fuqinë për t’i zgjuar njerëzit fort, për t’i rikthyer drejt vetvetes.  “Akoma” është teksti i këngës, që ka gjetur atë cepin e përhumbjur të shpresës në brendinë e çdokujt. Rozana Radi tenton ta “ringjallë” me një baladë edhe njëherë shpresën e bashkë me të, dashurinë. Në këtë intervistë për Newsbomb, këngëtarja dhe artistja flet për momentin në mesnatë që krijoi hitin e saj të fundit, bashkëpunimin me këngëtarin grek Sany dhe për paraqitjen skenike të saj. Dashuria është akoma e bardhë dhe Rozana vendos përtej këngës të na rrëfejë disa “akoma” të saj të cilat i pret. Jo si në ëndërr, apo si diçka sureale, por kur Zoti të thotë po.