Burgu në Shqipëri, një ambient i favorshëm për ekstremizmin e dhunshëm!

Disa kilogramë më i dobët që kur kishte hyrë në burg, sigurisht më i vjetër, krejt i qetë në fytyrë, Verdi Morava pavarësisht se ka kryer 8 vite burg nën akuzën e terrorizmit, mohon pothuajse çdo fjalë të prokurorisë që kishte thënë në 2014 për të përpara trupës gjykuese. Sapo doli nga burgu pas 8 vitesh, ai nuk mbante telefon celular me vete, por me të mund të lidheshe vetëm përmes një të afërmi të tij. Në një park të vogël të Tiranës i veshur me pantallona dhe këmishë, ai tregon kohën në gjashtë burgje të ndryshme të Shqipërisë. Në tregimin e tij nuk ka shumë dhunë, as gjëra të paimagjinueshme, por ka ankesa për prokurorinë dhe gjykatën të cilët e dënuan atë me 10 vite burg. “ A je penduar? ”- e pyes Verdin i cili jep një përgjigje të shpejtë, një “ jo ” bindëse ku thotë se “ nuk kam bërë asgjë për t’u dënuar ”. Akuzat për terrorizëm i quan montime dhe tërësisht të pabaza edhe pas 8 vitesh. Ritualet e fesë islame tregon që nuk i ka lënë asnjë ditë, as i mbyllur në qeli, por përkundrazi shprehet se ato vite kanë shërbyer për të lexuar e studiuar, kryesisht ligjin. Ai u dënua në 2016 së bashku me 8 persona të tjerë për një ndër veprat penale më të rënda të kodit Penal të Shqipërisë, terrorizmin. Verdi thotë se duhet të takohemi një herë tjetër dhe ashtu ndodhi. Pak ditë më vonë takimi do të ishte i gjatë, disa orësh dhe biseda më e thellë e më me detaje. “ Mos ki frikë, nuk jam terrorist, siç thonë ata ” shprehet Verdi i cili pavarësisht se mohon akuzën thotë se burgjet shqiptare nuk kanë sistem rehabilitimi, jo për të, sepse ai s’kishte nevojë për rehabilitim (thotë ai), por për të tjerët. “ Jam bërë aktivist për të burgosurit ”, - shprehet Morava teksa tregon sesi ka iniciuar një sërë protestash dhe grevash për të drejtat në burg. “ Kërkoja libra dhe të repsektoheshin të drejtat e të burgosurve ”, -shprehet ai. “Ata mashtrojnë, nuk janë në gjendje që të deradikalizojnë dhe rehabilitojnë askënd ”- thotë ndër rreshta. “ Gënjejnë kur thonë se ka psikologë të specializuar, asnjë seancë e veçantë për ne nuk është bërë për ne, dhe ne nuk kemi përfituar trajtime ndryshe ”- vijon Morava duke thënë se sistemi i burgjeve nuk të ofron deradikalizim për ata që janë të radikalizuar. Deradikalizimi në burgje Në një udhëzues për politikëbërësit dhe ofruesit e shërbimeve në Evropën Juglindore, Organizata për Siguri dhe Bashkëpunim në Evropë thotë se deradikalizimi është një nga objektivat kryesorë që duhet të kenë shtetet, kur bëhet fjalë për radikalë brenda dhe jashtë sistemeve të burgjeve. Sipas Zyrës së Kombeve të Bashkuara për Krimin dhe Drogat (UNODC), ndërhyrjet që kanë të bëjnë me shkëputjen ose deradikalizimin, në mënyrë tipike “kanë të bëjnë me një larmi aktivitetesh, përfshirë: këshillim dhe mbështetje psikologjike; programe konjitive - të sjelljes; ndërhyrje të punës sociale; debat dhe dialog që bazohet te besimi; edukimi; trajnimi profesional; terapi krijuese; terapi fizike, ndërsa masat për deradikalizim priren të mbështeten në masë të madhe te studiues fetarë të trajnuar në mënyrë të posaçme; mentorë ose psikologë. Sipas Moravës, asnjë prej këtyre masave nuk është marrë për të gjatë kohës që po vuante dënimin. “ Unë nuk kisha asnjë trajtim ndryshe nga të burgourit e tjerë ” - thotë ai ndërsa shton se: “ Askush nga psikologët, ose punonjësit e burgjeve, nuk është marrë posaçërisht me ne, për më tepër që të ketë ardhur dikush nga jashtë specifikisht për ne. As këta që ishin të brendshëm nuk bënë asgjë të jashtëzakoshme për ne. Nuk ia kanë idenë se çfarë bëjnë. ” “ Në të gjitha burgjet ku kam qenë askush nuk ka ardhur nga jashtë, por edhe këta (psikologët) që ishin të brendshëm nuk bënin absolutisht asgjë. Ata kryenin rolin e postierit. Shkruanin një kërkesë dhe e çonin diku dhe kaq. S’e bën punën e tij fare, s’ia ka idenë. Sektori i eduktimit për mua duhet të na ndiqte të gjithëve individualisht, por nuk e ka bërë ”- vijon më tej Morava. Ai tregon se si në burgjet e vendit me përjashtim të burgut të Fushë-Krujës, në biblioteka mungonte literatura e duhur dhe nuk kishte asnjë aktivitet kulturor-artistik. “ Në burgun e Burrelit nuk ma treguan asnjëherë bibliotekën, unë kërkoja vazhdimisht libra për të lexuar, por atje mungonte tërësisht literatura, nuk kishte asnjë aktivitet kulturor dhe artistik ” - thotë Morava. Sipas drejtorisë së Burgjeve masat e parashikuara në Planin e Aktiviteteve kundër Ekstremizmit të Dhunshëm në Sistemin e Burgjeve “janë zbatuar në mënyrë rigoroze, dhe tashmë sistemi i burgjeve shqiptare ka një staf të trajnuar profesionalisht për adresimin e çështjeve të ekstremizmit të dhunshëm në burgje dhe tashmë të dënuarit për këto vepra trajtohen sipas një metodologjie bashkëkohore të përshtatur në kontekstin shqiptar të burgjeve”. Vetë institucionet shqiptare e kanë të vështirë të masin shkallën e rehabilitimit të personave që kanë vuajtur ose janë duke vuajtur dënimin për këto vepra që kanë lidhje me ekstremizmin e dhunshëm. “ Është vështirë të gjejmë indikator matës të saktë, sa janë të rehabilituar tani këta persona. Rehabilitimi është një koncept që vlerësohet në dy kahe: Në aspektin ligjor, parashikohet se sa duhet të jetë afati i qëndrimit në liri, pa kryer më krime pas përfundimit të dënimit. Por, është edhe rehabilitimi social, pra sa kanë ndikuar aktivitetet e tij në rehabilitimin e personit, pra nuk kemi indikator matës. Nuk jemi në gjendje të themi se ku është shkalla e rehabilitimit e këtyre personave ”- tha Drejtoria e Përgjithshme e Burgjeve përmes zëvendësdrejtorit Femi Sufaj. Verdi Morava, edhe pse ka ka kryer dënimin nën akuzën për vepra që lidhen me ekstremizmin e dhunshëm, tanimë është në liri. Por, thotë që i gjithë procesi ndaj tij është montuar, dhe se asnjë akuzë nuk qëndron, duke konfirmuar faktin se ai nuk është penduar për asgjë që ka bërë në të kaluarën e tij. “ Unë jamë dënuar se kam dërguar një të moshuar në Rinas, i cili më pas më është thënë se ka shkuar në Siri dhe sipas akuzës, unë kam qenë në dijeni të udhëtimit të tij. Pikë së pari ata (prokuroria) nuk kishin asnjë provë që personi që kam shoqëruar unë ka shkuar në Siri dhe pastaj, edhe sikur të ketë shkuar unë nuk kam qenë në dijeni. Mua më është kërkuar për ta shoqëruar deri në Aeroportin e Rinasit dhe e kam bërë, do e bëja përsëri sot nëse dikush ma kërkon ta shoqëroj ”- shprehet Morava . Tanimë ai jeton në një shtëpi në periferi të Tiranës, në kërkim të një pune dhe me shpresën se gjërat do të përmirësohen. “ Përpara se të arrestohesha unë kisha ndërtuar biznese, mi shkatërruan të gjitha ”-s hprehet ai, teksa thotë se ende nuk ka gjetur një punë të përshtatshme për të. Të dënuarit për ekstremmizëm të dhunshëm Gjykata e Apelit për krimet e rënda në nëntor të 2016 i deklaroi fajtorë dhe i dënoi 9 imamë të vetëshpallur, nën akuzat e veprave që lidheshin me terrorizmin. Ndaj tyre u dha një total prej 92.3 vitesh burg për akuzën se kishin rekrutuar shtetas shqiptarë në dy xhami të Tiranës të cilët pasi i kishin indoktrinuar i dërgonin në Siri për të luftuar në krah të shtetit islamik. Procesi gjyqësor ndaj tyre kishte nisur në vitin 2015 në Gjykatën e Krimeve të Rënda ( E shkrirë me ligjin e 2016 dhe e riemëruar me emrin, Struktura e Posaçme AntiKorrupsion, SPAK) ndërsa për nga akuzat ai ishte një ndër proceset më të ndjeshëm në vendin toë. Të akuzuarit ishin imamë të vetëshpallur, të paautorizuar nga Komuniteti Mysliman i Shqipërisë, dhe që kryenin aktivitetin e tyre në disa territore të Shqipërisë. Gjithçka nisi teksa i ashtuquajturi Shteti Islamik ISIS në lindjen e mesme po zgjerohej, ndërsa besimtarë nga e gjithë bota po bienin pre e propagandës së tyre për t’ju bashkuar të ashtuquajturës “luftës xhihadiste”. Burgu, aty ky “shumohen” terroristët? Shqipëria nuk ka saktësisht shifra se sa shtetas të saj iu bashkuan Shtetit Islamik në Siri për të luftuar atje, por mes tyre ka pasur gra, fëmijë dhe burra, ndërsa disa herë personazhe nga Shqipëria kanë dalë në videot propagandistike të ISIS drejtuar vendeve të Ballkanit Perëndimor në formën e kërcënimeve të drejtëpërdrejta. Pavarësisht se Shqipëria ka riatdhesuar persona nga kampet famëkeqe të Lindjes së Mesme, asnjë person i kthyer ose që ka qenë në luftë aktive atje, nuk është vënë para drejtësisë shqiptare. Për periudhën 2015-2018, rezultojnë 11 persona të dënuar për kategorinë e veprave që lidhen me ekstremizmin e dhunshëm, nga të cilët 10 persona për veprën penale të parashikuar nga neni 231 i Kodit Penal “Rekrutimi i personave për kryerjen e veprave me qëllime terroriste ose të financimit të terrorizmit”. Në total këta individë janë dënuar me 126 vjet burg, ku dënimet për secilin prej tyre variojnë 7-18 vjet. Ndërkohë rezulton vetëm një i dënuar për veprën penale të “Financimit të Terrorizmit”. Pavarësisht dyshimeve të Drejtorisë së Përgjithshme të Parandalimit të Pastrimit të Parave e cila ka referuar në prokurori 20 raste që lidheshin me dyshimet e financimit të terrorizmit, autoritetet vendase nuk kanë arritur që të gjejnë prova të mjaftueshme deri në këto momente për 19 raste. Drejtorisë së Përgjithshme të Parandalimit të Pastrimit të Parave duke iu referuar ligjit nuk dha detaje të tjera sa i përket rasteve që lidheshin me dyshimet për financimin e terrorizmit. “ Gjatë një periudhe 5 vjeçare (2017-2021) nga ana e DPPPP janë dërguar në organet ligj zbatuese 20 (njëzet) raste me anomali/dyshime të lidhura me financim e terrorizmit apo me veprime financiare nga persona të dyshuar si të lidhur me terrorizmin/akte ekstremiste ”- tha në një përgjigje zyratare DPPPP. Sipas Raportit të EUROPOL12 për terrorizmin në vitin 2020: “Rajoni i Ballkanit Perëndimor mbeti strehë për komunitetet e radikalizuara. Përveç kthimit të personave që iu bashkuan luftës në SIRI, kërcënimi i terrorizmit gjithashtu buron nga radikalizimi i grupeve dhe individëve, përfshirë dhe atyre që vuajnë dënimin në burg. Këto mjedise përfshijnë anëtarë të organizatave terroriste të njohura dhe grupe informale, por gjithashtu edhe individë që vetë-radikalizohen në internet, për shembull përmes kontakteve me ideologë xhihadistë.” Shërbimi Infromativ i Shtetit tha në një raport të publikuar në qershorin e 2022 se dy Organizatat terroriste më të mëdha në botë,“ISIS” dhe “Al-Qaida” dhe grupe të tjera ekstremiste mbeten kërcënim për sigurinë ndërkombëtare dhe rajonale. Ndërsa mesazhet e këtyre organizatave shpërndahen përmes teknologjisë dhe komunikimit online. Shërbimi informativ konfirmon në këtë raport, faktin se të burgosurit për vepra terroriste, vijojnë ende të mbajnë një profil radikal, ndërsa shqetësuese mbetet situata pasi ata të dalin jashtë burgut. “ Të burgosurit për terrorizëm vijojnë të mbajnë profil radikal dhe janë të angazhuar në aktivitete radikalizuese në sistemet penitenciare në vendin tonë dhe rajon. Vlerësohet se, shkalla e radikalizimit mund të ndikojë në situatën e sigurisë, pas përfundimit të dënimeve .”- thuhet në raportin e Shërbimit Informativ Shtetëror. SHIK nuk dha detaje në kërkesë për hollësitë dhe problematikat e tjera në burgjet shqiptare lidhur me aktivitete të dyshuara terroriste. Vetë drejtoria e burgjeve e ka konfirmuar faktin se brenda burgjeve në Shqipëri, të paktën një person vitet e fundit është radikalizuar. Bëhet fjalë për një shtetas i cili ka qenë duke vuajtur dënimin për vrasje në një prej burgjeve të Shqipërisë, por ai është radikalizuar brenda sistemit të burgut. “ Është një person i cili mendojmë që është radikalizuar, ka qenë i dënuar për vrasje dhe gjatë një vlerësimi që i është bërë, është arritur në përfundimin se ai kishte prirje për t’u marrë me radikalizëm ”-tha në një përgjigje Femi Sufaj, Zëvendësdrejtor i Përgjithshëm i Burgjeve. Personi në fjalë më pas u vendos që të zhvendosej në regjimin “41 Biss”, një strukturë e posaçme brenda burgut të Sigurisë së Lartë. Burimet pranë drejtorisë së Burgjeve thanë se kanë qenë pikërisht pjesëtarë nga grupi i “imamëve” të vetëshpallur të cilët kanë ndikuar në radikalizimin e këtij personi, të dhënat e të cilit nuk bëhen të ditura. Personi në fjalë kishte shfaqur shenja të dukshme në ndryshimin e sjelljes së tij, ku më përpara nuk predikonte fenë islame, ndërsa në një moment ai nisi që të prediktonte rite fetare, dhe të ndryshonte edhe mënyrën sesi vishej, por edhe pamjen e jashtme. Nisur nga ndryshimet thelbësore në sjellje, veshje, dhe pamje, ai iu nënshtrua një vlerësimi nga ekspertët të cilët arritën në përfundimin se është radikalizuar dhe mbi të kishin ndikuar pikërisht personat të cilët po vuanin dënimin për veprime që lidhen me ekstremizmin e dhunshëm. Zyrtarët e burgjeve nuk komentuan gjendjen aktuale të të dënuarit, nëse vlerësimet e mëvonshme tregojnë shenja të deradikalizimit ose jo të tij. Ndërkohë që një tjetër ngjarje e cila konfirmohet edhe nga Drejtoria e Burgjeve është ajo e ndodhur në Burgun e Peqinit rreth vitit 2017 ku dy të rinjve brenda burgut iu gjetën flamuj të organizatës terroriste të ISIS. Mbetet e paqartë sesi flamujt arritën të futeshin brenda burgut, dhe për qëllimin që të rinjtë po i posedonin. Nga të gjitha vlerësimet që iu bënë të rinjve asokohe, rezultuan se ata nuk kishin gjasa që të radikalizoheshin, ose shenja që mund të ishin radikalizuar dhe që përbënin kërcënim të lartë. Vetë zëvendësdrejtori i Përgjithshëm i Burgjeve, Femi Sufaj e sheh burgun si një ambient ku të radikalizuarit kanë një terren të përshtatshëm për të zgjeruar jo vetëm idetë e tyre, por edhe mundësitë për rekrutim. “ Burgu është një institucion i favorshëm ku zhvillohen ide ekstremiste. Shumë persona të dënuar për vepra terroriste e kanë si qëllim zgjerimin e habitatit të tyre, pra të zgjerojnë rrethin e personave të ngjashëm me veten e tyre ”- thotë Sufaj. Një ish-punonjëse sociale e cila ka punuar në Burgun e Sigurisë së Lartë në Peqin, dhe që është marrë drejtpërdrejtë me personat e dënuar për ekstremizëm të dhunshëm, dëshiron që të mbetet anonime. Ajo tha se " Gjatë kohës që unë kam shërbyer në burg, e kam lënë në 2020, nuk kishte një përkufizim se çfarë ishte rehabilitimi në sistemin e burgjeve. Vitin e fundit para se unë të largohesha nga sistemi në 2019, filloi të vihej theksi tek rehabilitimi, ku u mbështetën te modeli suedez pasi ishte një sistem i suksesshëm. Në atë moment ne nisëm trajnime për rehabilitimin. LLogarit që në periudhën e trajnimeve me ekspertë Suedezë, ishte pandemia dhe u pezulluan. Duke qenë se mungonte pjesa e konceptit, mungonte edhe pjesa e trajtimit. ” Ish-punonjësja sociale në burg, e cila aktualisht nuk e ushtron profesionin e saj në Institucione të Vuajtjes së Dënimit tha se të burgosurit për ekstremizëm dhe të tjerët trajtoheshin në të njëjtat ambiente. “Megjithatë këto si kategori, atë kohë deri në 2020, trajtoheshin njëjtë me pjesën tjetër të të burgosurve, edhe ideja është se në konceptin e atyre, gjatë komunikimit me to ata ishin të bindur se nuk kanë bërë asnjë gabim, unë kam komunikuar me 4-5 prej tyre që ishin në burgun e Peqinit. Ata nuk shihnin asnjë faj, ose gabim tek vetja, nuk ishin të penduar ”- thotë ajo. Dilemat e institucioneve Institucionet e burgjeve kanë dy mundësi për t’u sjellë me personat që janë të dënuar për vepra që lidhen me terrorizmin. Të dyja, me rrisqet e veta! Së pari, ata të mbahen si grup, veçmas nga të burgosurit e tjerë në mënyrë që të minimizohen kontaktet, dhe në mënyrë që ideologjia e idetë e tyre të mos deportojnë tek të burgosurit e tjerë. Kjo është një mundësi e vështirë, edhe për faktin se Institucionet e Vuajtjes së Dënimit sipas zv.drejtorit të Burgjeve nuk kanë të gjitha kushtet e duhura, për të veçuar tërësisht një pjesë të të burgosurve. Dhe së dyti, mbajtja në të njëjtat ambiente me të burgosurit e tjerë, ndërsa rreziku për shpëndarjen e ideologjisë është mjaft i lartë. Edhe sa i përket grupit të imamëve të vetëshpallur që u dënuan për vepra që kishin lidhje me terrorizmin, institucionet shqiptare vërejtën se duke i lënë bashkë 9 personat që ishin dënuar, po merrnin përsipër një rrisk që ndoshta sistemi ynë nuk mund ta përballonte. 2 prej personave të grupit të përbërë prej 9 anëtarësh, u pikasën nga specialistët si persona “me nivel të lartë radikalizmi” dhe që mund të përbënin rrezik për të burgosurit e tjerë të cilët mund të binin pre e radikalizmit. Të gjendur në këto kushte, grupi i tyre u vendos që të ndahej, ku njëri prej 2 personave të konsideruar si më i rrezikshmi u vendos në sistemin 41Biss, për një vit, por duke qenë se institucionet panë që ai vijon të mbetet në nivel të lartë radikalizmi, vendosën që i burgosuri të rrijë i mbyllur në sistemin e posaçëm të sigurisë së lartë për 2 vite me radhë. Kontakti i të burgosurve të tjerë me persona të dënuar për vepra që lidhen me ekstremizmin e dhunshëm janë shqetësuese edhe për ish-drejtorin e Përgjithshëm të Policisë së Shtetit që më herët ka mbajtur postin e Drejtorit të Antiterrorit, Gledis Nano i përfshirë personalisht në riatdhesimin e dhjetëra shqipatarëve nga kampet siriane. “ Duhet të jemi të qartë që ka një ndarje shumë të dukshme midis besimtarëve dhe personave me prirje radikale pavaresisht përkatësisë fetare. Shumë të dënuar aderojne në këto grupe për motive që lidhen me krijimin e kushteve më të mira siç mund të jenë oraret e qëndrimit në qeli, të qenurit pjesë e nje grupi të caktuar personash, mungesa e literaturës adekuate, etj. Nga ana tjeter, disa persona mund të kenë një historik me krime të dhunshme për të cilët mund të jenë dënuar dhe kontakti në burg me persona të radikalizuar, mund të çojë në një produkt të padëshiruar ” - tha Zoti.Nano. Qeveria ul buxhetin dhe shkurton punonjësit për një organizëm kyç Teksa bota ishe zhytur në një pasiguri të madhe dhe aktiviteti i organizatave terroriste në dhjetëra shtete përfshirë shtetet e mëdha dhe me një sistem sigurie pothuajse të pathyeshëm, në vitin 2015 qeveria shqiptare miratoi për herë të parë Strategjinë Kombëtare dhe Planit të Veprimit Kundër Ekstremizmit të Dhunshëm. Këshilli i Ministrave krijoi njëkohësisht Qendrën për Koordinimin Kundër Ekstremizmit të Dhunshëm në Shqipëri, si një qendër për koordinimin dhe zhvillimin e kapaciteteve të aktorëve lokalë dhe praktikuesve të vijës së parë të përfshirë në përpjekjet për të luftuar ekstremizmin e dhunshëm në Shqipëri dhe rajon. Kjo qendër administrohej deri në vitin 2022 nga Zyra e Kryeministrit dhe financohej nga Buxheti i Shtetit, ndërsa me datën 20 prill të vitit 2022, përmes një vendimi të Këshillit të Ministrave, u vendos që kjo qendër të kalonte nën varësinë e Ministrisë së Brendshme. Vetëm dy muaj më vonë, me 29 qershor Këshilli i Ministrave vendosi që të bënte një tjetër ndryshim në këtë qendër. Edhe pse qendra është thelbësore në veprimtarinë e saj të punëve me persona të radikalizuar, qeveria e pa të arsyeshme që të ulte numrin e punonësve të saj me 8 persona dhe të shkurtonte buxhetin e kësaj qendre me 11 436 791 lekë të reja. Një punonjës i qendrës i tha në kushtet e anoniamatit se veprimtaria normale e qendrës “është goditur rëndë nga këto vendime arbitrare dhe jo të mirëanalizuara”. “ Në kushtet kur shtetet e rajonit, dhe botës, janë duke rritur kapacitetet e organizmave që merren me radikalizmin, dhe janë duke financuar projekte të mëdha për deradikalizimin, rehabilitimin dhe riintegrimin e personave të radiaklizuar, qeveria shqiptare gjen një moment aspak të përshtatshëm jo vetëm për të ulur numrin e punonësve, por për të shkuartuar në mënyrë drastike edhe buxhetin përmes së cilës funksionin qendra ”- tha një punonjës i qendrës. As Ministria e Brendshme dhe as Qendra për Koordinimin Kundër Ekstremizmit të Dhunshëm nuk pranuan që të japin komente për situatatën në burgje. Strategjia Kombëtare dhe masat e instiucioneve Shqipëria miratoi strategjinë Kombëtare kundër Ekstremizmit të Dhunshëm për herë të parë në 2015, ndërsa ajo u botua në fletoren zyrtare me 18.11.2015. Vendi ynë deri në atë kohë nuk kishte eksperienca të prekshme që lidheshin me vepra që kishin të bënin me ekstremizmin e dhunshëm apo terrorizmin, ndërsa deri në atë kohë, dënimet për vepra të qarta që lidheshin me terrorizmin e formave moderne kishin munguar. Që ekstremizmi i dhunshëm dhe terrorizmi ishin një betejë e re me të cilën po përballej vendi ynë, vihej re qartë edhe në planin e veprimit të atij viti. Në asnjë moment në planin e strategjinë e 2015 nuk përmendej fjala “burg” ose “institucion i vuajtjes së dënimit”. U deshën masat e marra nga organizatat ndërkombëtare dhe lokale vite më vonë për të kuptuar dhe punuar me ekstremizmin e dhunshëm në kontekstin e burgut. Por, edhe pse strategjia kombëtare duhet të përfundonte në vitin 2020, qeveria ende nuk ka miratuar një tjetër strategji. Në faqen e konsultimeve publike është hedhur 2 vite më vonë, në gushtin e 2022, për konsultim me publikun dhe ekspertët strategjia e re 2022-2025. Tanimë, hartuesit e tij përmendin në disa raste edhe kontekstin e burgur, ndryshe nga strategjia e 2015. Në projektin e ri strategjik, sugjerohet ndër të tjera edhe “Trajnime fillestare dhe të vazhduara për forcimin e kapaciteteve të zyrtareve të burgjeve dhe shërbimit të provës në lidhje me instrumentet e vlerësimit të shenjave për identifikimin e personave në rrezik, menaxhimin e rasteve dhe shkëmbimin e informacionit”. Fabian Zhilla, ekspert i sigurisë në Shqipëri shprehet se: “ Masa më e mirë që duhet marrë në këtë drejtim, është ajo që quhet kundërnarrativa ose rrëfenja kundër kësaj propagande, dhe sigurisht mënyra më e mirë është edukimi, përfshirja e teologeve të tjerë në sistemin e burgjeve ”.

Burgu në Shqipëri, një ambient i favorshëm për ekstremizmin e dhunshëm!

Nga Isa Myzyraj

Artikuj të ngjashëm Artikuj

Përtej Zvërnecit

PROTESTA E MEMEVE TË TALLESH NË ZGRIPIN E PAMUNDËSISË

35 vjet PS po sto pa m’thuhej si je?

Zvërneci, investimi që do ndryshojë historinë e turizmit shqiptar

Historia e protestave nga ’90: Çdo brez, revoltën e vet

3 italianët e protestës së PD: Qëlluam policinë me patate, për solidaritet!

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Burgu në Shqipëri, një ambient i favorshëm për ekstremizmin e dhunshëm!

Nga Isa Myzyraj

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?