Burgu i pamerituar i kryeinxhinierit

Është “luks” i tepruar për Shqipërinë të mbajë në burg një inxhinier si Arben Dervishaj. Kolegë të tij të fakultetit, por edhe studentë, kanë kërkuar nëpërmjet një peticioni që menjëherë sapo të lërë qelinë, profesori i nderuar të kthehet në auditore. Kjo është më e pakta që mund të bëjnë. Në një rrëfim të zgjeruar në Newsbomb.al, profesorë të Universitetit kanë dhënë opinionet e tyre mbi padrejtësinë që po i bëhet profesorit, që sipas tyre, humbja e leksioneve të tij në auditore, është një humbje për pjesën e mësimdhënies dhe intelektualizmit në Shqipëri Në 16 nëntor 2022, dy policë mbërritën tek dera e shtëpisë së profesor Arben Dervishajt që në pikë të mëngjesit. “Duhet të vini me ne për sqarime”. Kaq ishte dhe u kuptua prej tij dhe bashkëshortes se rrjedha e mëvonshme e ngjarjeve do të ishte e vështirë. Beni e kuptonte që në krye të herës se kjo “historia e inceneratorëve” nuk do ta kursente. Por për një inxhinier si ai, që në jetën e përditshme kalkulon çdo gjë deri në detaj, nuk kishte ndonjë faj. As ndonjë frikë. Ndoshta autoritetet dhe shteti, tek i cili besonte profesor Beni, do të bënin punën e tyre me ndershmëri. Ku ta dinte Profesori me një barrë mend e me vite të tëra studimi, se çështja e inceneratorëve kërkonte “koka turku”. Ca për faj të vet që besonte shumë më tepër sesa duhej, e ca për rrjedhë të faktit e ngjarjeve, sot e gjithë ditën, pas plot pesë muajsh, një ndër inxhinerët më në zë të vendit, një vlerë e shtuar e shoqërisë, e ndërtimit, një aset që po u mungon auditorit, është mbyllur pas dyerve të qelisë në pritje të ditës së madhe të gjykimit. Mbi të fillimisht rënduan tre akuza. Dy prej të cilave ranë rrugës. Edhe pse sot është më e thjeshtë, askush nuk e nxjerr nga paraburgimi Arben Dervishajn, profesorin, që në Shqipëri e kemi si “ujët e pakët”, siç thotë populli, e në botë, e kërkojnë “me qiri”. Por ja që Shqipëria e ka luksin të mbajë në burg më të mirët, e kriminelët livadhisin si të kenë terezinë, duke vjedhur e zhvatur tendera gjatë ditës, e duke u shtruar nën grahmat e rakisë gjatë natës për të kujtuar sukseset e ditës. Profesori që kalon ditë-netët e tij përballë kompjuterit, duke llogaritur volume, skema, statistika… dergjet në burg. Dhe askush nuk dyshon se profesori as ndryshonte prova, as i zhdukte dot ato… por jo. Gjykata vendosi që ai të qëndrojë në burg, për të treguar se e kemi seriozisht. Dhe kur e ka seriozisht, nuk kap firmëtarët. Merret vetëm me vëzhguesit e projekteve që nënshkruajnë firmëtarët. Qindra vepra në Shqipëri mbajnë firmën e tij, nga rrugët e urat, deri te ndërtimet civile, duke e bërë atë një nga projektuesit më të mirë në vendin tonë. Mijëra studentë janë kuruar me profesionalizëm nga profesori, ndërsa pedagogjia e mësimdhënies së tij, mbetet e pakrahasuar për një pjesë të madhe të tyre. “Pika më e fortë në profesionin e tij, është guximi për të projektuar vepra inxhinjerike strukturore të vështira, korrektësia e jashtëzakonshme në marrëdhënie punë më të tjerët. Ai është kërkues i jashtëzakonshëm i kushteve teknike të projektimit, zbatimit apo mbikqyrjes së punimeve të ndryshme. Si njeri, mjaft i ndershëm, i sinqertë, mjaft bashkëpunues”. Me këto fjalë e përshkruan profesor Arben Dervishaj, Kujtim Allaraj, i diplomuar në Inxhinjerinë e Ndërtimit në vitin 1991, e që më pas bashkëpunuan për vite me radhë dhe po të njejtin mendim ndajnë edhe kolegët në Universitetin Politeknik të Tiranës si dhe ish-studentë të tij, që sot janë lektorë e inxhinierë të mirënjohur. MËSIMDHËNIA Duket se një nga pikat më të forta të profesor Benit, ashtu sikurse e thërrasin ish-studentë e kolegë është mësimdhënia. I lindur në qytetin e Tiranës, prirja e tij ishte padiskutim ndërtimi dhe pasi e kryen shkëlqyer gjithë ciklin e studimeve në vitin 1987, ende pa dalë nga Fakulteti Ndërtimit, Arben Dervishaj emërohet pedagog dhe shef i sektorit të Betonarme. Në dukje, profesori është i rëndë në komunikim, e pak i vështirë, por duket se krejt e kundërta ndodh kur ai është përballë studentëve dhe bashkëpunëtorëve të tij. “Profesor Beni ka qenë pedagogu më komunikues dhe bashkëpunues që ne si studentë kemi patur. Ishte gjithmonë i gatshëm të na sqaronte, të na këshillonte për të bërë zgjedhjet e duhura në aspektet profesionale, por ka qenë dhe tejet njerëzor. Ka qenë një rast që do doja ta ndaja me ju. Kemi patur një shok klase, i cili për arsye ekonomike detyrohej të punonte në një “call center” gjatë kohës që ishte student. Në një bisedë gjatë marrjes së notave në lëndën e profesor Benit, profesori merr vesh që ky djali punonte në call center dhe menjëherë kontakton një studio projektimi dhe i mundëson shokut tonë një interviste pune, të cilën ai e fitoi”, - tregon inxhiniere Armela Kalliri, ish-studente e profesorit. Faktin që Arben Dervishaj ka qenë i pakursyer si në dhënien e dijes ashtu dhe në mbështetje profesionale na e tregon edhe inxhinieri Kujtim Allaraj, i cili thotë se ai ka qenë pedagogu i parë që ka pasur një marrdhënie të shkëlqyer si student-profesor. “Ai krijonte një afërsi të jashtëzakonshme me studentët në përgjithësi dhe kishte aftësi shpjeguese mjaft të qarta, dhe shumë i thjeshtë për lëndën e konstruksioneve prej betoni të armuar”, përforcon Allaraj, i cili që prej kohës së fakultetit ka vazhduar bashkëpunimin me Arben Dervishaj gati për 30 vjet. Stilin e tij për t’i mbajtur studentët gozhduar në auditorë ndoshta e kishte nga mënyra si i shpjegonte leksionet, sepse shumica e studentëve të tij rrëfëjnë se thuajse 100 për qind të leksionit e përthithnin në fakultet. Alket Kumaraku, lektor në Universitetin Politeknik të Tiranës, departamenti Hidroteknikës dhe Hidraulikës dhe ish-student i profesor Dervishaj kujton: “Në grupin shoqëror me studentët e tjerë të fakultetit, të gjithë flisnin me respekt për profesorin dhe mënyrën e zhvillimit të mësimit, pasi profesori, sikurse edhe mjaft kolegë të tij në Fakultet, kishte dhe ka edhe eksperiencë shumë të mirë edhe në zbatimin e punimeve të ndërtimit, përveçse formimit shumë të mirë teorik të tijin. Pasqyrimi i leksioneve edhe me shembuj praktikë, e bënte lëndën mjaft intreresante, saqë edhe salla e madhe e auditorit, siç quhej salla 102, mbushej pothuaj plot, në çdo orë leksioni të lëndës së konstruksioneve të betonit”. GJURMËT QË NUK FSHIHEN Përveç mësimdhënies që duket se është dashuria pa kushte e profesor Arben Dervishit, një nga sferat ku ai është fokusuar shumë ka qenë puna kërkimore shkencore për të sjellë gjithnjë informacione inovative që do i shërbenin fushës së ndërtimeve në Shqipëri. Teksa shfletojmë revistën “NDËRTUESI” gjejmë dhjetra artikuj që lidhen me përdorimin e materialeve të reja dhe aplikimin e standarteve të reja në ndërtim, tema këto që kërkojnë një kualifikim profesional të një niveli të mirë inxhinjerik. Këtë opinion e përforcon Maksim Muçi, ish-kryetar i Shoqatës së Ndërtuesve dhe projektues i mbi njëzet digave e objekteve të tjera publike e private. “Përgatitja e mirë profesionale e Benit, vihet re menjëherë në dëshirën që ka për diskutim në shoqatë, këshilla teknikë, komisione parlamentare… si dhe në përshtypjen që të lënë takimet e prof. Benit me ish-studentët e tij. Kur shkonim me shërbim në qytete të ndryshme, më habiste numri i madh i ish - studentëve që vinin ta takonin e që lajmëronin njëri-tjetrin se kishte ardhur profesor Beni. E po të kesh parasysh se lënda që jepte Beni në Inxhinieri, ishte nga më kryesoret dhe më të vështirat, këto takime të dukeshin dhe me interesante e më të bukura”, tregon projektuesi i njohur. Ervin Paci, profesor në Universitetin Politeknik të Tiranës, na rrëfen se profesor Beni kurrë nuk ka rreshtur së studiuari dhe kontribuari për shkencat inxhinierike duke shtuar se ai asnjëherë nuk e ka neglizhuar ndihmën për çdo koleg dhe shpjegimin për çdo student. E nisur nga profesionalizmi i profesor Arben Dervishaj i gjithë kolektivi i Departamentit në Fakultet, ka shprehur deshirën me anë të një kërkese për Gjykatën, që Profesori të kthehet menjëherë në aktivitetin e tij pedagogjik. PROFESIONALIZMI Një nga pikat e forta të Profesor Arben Dervishaj është aftësia e tij e jashtëzakonshme sidomos në projektimin e veprave konstruktive prej betoni të armuar duke e bërë atë një nga projektuesit strukturist më të mirë të Shqipërisë. Gjatë gjithë kohës ai qëndronte në studion e tij duke punuar dhe kolegët thonë se kur e pyesje për punë ai të përgjigjej gjithnjë, edhe në 3 të mëngjesit. Shumë shpejt përgjegjshmëria dhe profesionalizmi e bënë studion e ngritur nga profesor Arbeni, një ndër më të njohurat në vend. Profesor Ervin Paci do e cilësonte si të pakompromis me parimet e veta megjithë realitetin e komplikuar profesional dhe njerëzor në Shqipëri. Ndërsa inxhinier Allaraj e shikon kështu: “Profesor Arbeni ka aftësinë profesionale që me pak bashkëpunim, të japë zgjidhje të problematikave që dalin për projektimin e një godine banimi apo një vepre inxhinjerike të një rëndësie të veçantë. Kam 30 vjet që bashkëpunoj me të dhe kam patur shumë komunikime dhe bashkëpunim për të veçuar një detaj, por them se është mjaft i çiltër në marëdhënie bashkëpunimi, i sinqertë dhe shumë i ndershëm”. Për inxhinier Alket Kumarakun, gjurma e profesionalizmit të profesor Arbenit dhe e bashkëpunëtorëve të tij në studio, do mbetet si dëshmi e punës pasionante të tij si një nga konstruktorët, por edhe një nga pedagogët më të mirë. Ish-studentja e Arben Dervishtit inxhiniere Armela Kalliri, ja atribuon të gjithë meritat e suksesit të saj, profesionalizmit të profesorit. “ Profesori, jo vetëm për mua por për breza të tërë studentësh, është etalon i ndërtimit në Shqipëri. Për mua personalisht është konstruktori më i mirë dhe me korrekt. Kontributet e tij profesionale janë të pakrahasueshme për vendin. Ishte ai që ngriti një zë të fortë për ndryshimin e hartës sizmike në Shqipëri. Nëse ne sot projektojmë në mënyrë më të sigurt, duke mbrojtur veten dhe jetët e njerëzve, është sërisht falë profesorit”, përfundon Armela. NJERZILLËKU Teksa bisedojmë me projektuesin e njohur Maksim Muçi, ai na rrëfen se në aspektin jetësor Beni është një djalë me karakter të qëndrueshëm dhe i ndershëm dhe kjo, jo aq në sajë të origjinës së tij prej “labi” por në sajë të marrëdhënieve familjare, marrëdhënieve të ndershme me njerëzit, përgatitjes së tij profesionale dhe arritjes së çdo gjëje në sajë të punës. Ndërsa për profesor Ervin Pacin, Profesori Arben Dervishaj i vlerësonte shumë njerëzit dhe marrëdhëniet njerëzore ishin të hapura, të drejtpërdrejta pa ekuivoke dhe marrje me llafe. Por teska bisedojmë me kolegët e tij zbulojmë edhe një gabim të profesorit… “Një gjë që ishte gabim Prof Beni, kurdoherë e thoshte që ishte gabim si në profesion ashtu dhe në marrëdhëniet njerëzore”, thotë profesor Ervini. Nuk mbarojnë epitetet për njerëzillëkun e profesor Arbenit duke e përkufizuar si njeri zemërgjerë e të gjindshëm në të gjitha hallet që kishin studentët apo kolegët, shëndetësore apo profesionale. Inxhinierja Armela Kalliri e quan Arben Dervishaj një njeri me vlera të mëdha morale dhe humane që nuk ka treguar kurrë arrogancë apo mëndjemadhësi përkundrejt studentëve, punonjësve apo bashkëpunëtorëve të tij. E situata në të cilën ndodhet aktualisht profesor Arben Dervishaj që akuzohet për firmosjen e situacioneve të falsifikuara në inceneratorin e Fierit, ka krijuar gati-gati një revoltë të pedagogëve dhe inxhinierve për mënyrën se si është denigruar figura e tij, e një projektuesi të shkëlqyer dhe njeriu me vlera, ndërsa shpresojnë që ai të kthehet sa më parë në mësimdhënie dhe në studio. “Më vjen shumë keq për situatën që po kalon z.Arben dhe jam i zhgënjyer me organet e drejtësisë që me një guxim të pa matur dhe pa ndonjë verifikim, mund të denigrojnë një figurë të inxhinjerisë shqiptare. Një situatë e tillë mund t’i ndodhë çdo inxhinjeri shqiptar që mund të mbikqyrë ndërtimin e një objekti apo një vepre. Nëse e shohim në këtë prizëm i bie të largohemi nga Shqiperia”, shprehet Kujtim Allaraj, inxhinier. Nërsa për Alket Kumarakun, lektor në Universitetin Politeknik të Tiranës, puna e organeve ligjzbatuese duhet respektuar, por duke ruajtur dinjitetin e njeriut, aq më tepër të njerëzve si profesor Arbeni, që me punën dhe veprat e tij, i bëjnë nder këtij vendi. “Jam shumë e indinjuar që profesori po trajtohet në këtë mënyrë. Në asnjë lajm apo shkrim nuk është përmendur qe ai është një pedagog i nderuar, që i ka dhënë vendit me qindra inxhinierë ndër vite dhe, ka kontribuar me seriozitet për vendin, si rrallë profesionistë të tjerë pasi në shumicën e rasteve profesionistët janë pragmatistë dhe shohin vetëm interesin e tyre. Mua më vjen keq që Shqipëria mbetet në nivele të tilla të ideologjise komunsite, ku hidhet vrer dhe mllef ndaj intelektualëve të vendit të cilët kanë punuar me vite për një Shqipëri më të mirë! Nuk mundet një individ si profesor Arben Dervishaj të mbahet atje sikur është koka e bandës më të rrezikshme në Kolumbi! - përfundon ish-studentja e Dervishaj, Armela Kalliri. Profesor Maksimi e quan aksident arrestimin e Arben Dervishaj, i cili aktualisht ndodhet në paraburgim për një shkelje në procedurat e mbikqyrjes së punimeve të zbatimit në inceneratorin e Fierit. “Mund të zgjatesha shumë në këtë argument profesionalisht dhe administrativisht por nuk është momenti dhe fare shkurt do thoja: - Shkelja që ka bërë Beni, ka qenë dhe është e zakonshme në procesin e ndërtimit me objektet me financim publik. Në çdo fund viti për mos djegie të fondeve (shpesh se tenderat zhvilloheshin me nga 6 muaj vonesë) raportoheshin punime të pa kryera, bëheshin pagesat dhe punimet kryhen në muajt e parë të vitit pasardhes. I vetmi ndryshim është se sot jetojmë në kohën e shifrave të mëdha. - Ligjërisht them se nëse veprimi, deri në vënjen në pune të objektit, do kishte pasoja, atëherë do qe i pari zhvilluesi që kishte lidhur kontratën me mbikqyrësin që do e padiste këtë të fundit. Përgjegjësi kryesor për lëvizjen e fondeve është zhvilluesi. Mbikqyrësi është një i punësuar provizor i tij. - Në praktikën e përditshme mund të ketë shumë mbikqyrje objektesh që paraqesin problematika shumë e shumë herë më të mëdha se rasti i inceneratorit dhe nuk është kujtuar njeri të marrë ndonjë masë. Ndërsa në fund profesor Maksimi ashtu si edhe kolegët e tjerë urojnë që familja Dervishaj ta kalojë këtë situatë të vështirë me sa më shumë besim se çdo gjë do kalojë, e normaliteti në jetën e tyre do të vijë së shpejti. Kumaraku: Ngjarja që më ka mbetur ndërmend me profesor Arbenin Detaje apo ngjarje të ndryshme, ku del karakteri shumë i mirë dhe i fortë i profesorit më kujtohen shumë, por realisht, më ka mbetur në mendje një rast i treguar gjatë diskutimeve dhe bisedave me studentët e ndërtimit pas shkolle: “Profesor Arbeni do zhvillonte orë leksioni, me kurset e Ndërtimit dhe ishte një përplasje oraresh me një lëndë tjetër. Pedagogu i lëndës tjetër, një pedagog i sapodalë në pension, hyri në auditor dhe sapo pa profesor Arbenin, ndaloi tek dera. Profesor Arbeni sapo e pa, ndërpreu mësimin dhe e pyeti: Profesor, keni ju mësim? Pedagogu tjetër me zërin e tij të ulët i thotë qetësisht: Besoj se po ... Profesor Arbeni e ndërpreu mësimin dhe i tha pedagogut tjetër: Po profesor, ndjesë, po vazhdoj më pas (apo më vonë, diçka e tillë), dhe u ul në tavolinë, të shkruante apo shënonte diçka tek blloku i vetë apo tek materialet që kishte, ndërkohë pedagogu tjetër fillon mësimin. Ndërkohë që pedagogu tjetër, po shpjegonte, me zë të ulët në fakt, pas disa minutash dëgjohet një nga studentët në sallë, i cili i thotë pedagogut tjetër me zë të lartë dhe sipas mendimit të studentit, që tregonte ndodhinë, jashtë çdo norme etike, edhe për moshën edhe për pozicionin akademik, midis studentit dhe pedagogut): Ngrije zërin, se nuk dëgjojmë! Profesor Arbeni, menjëherë ndërpreu shkrimin, dhe iu drejtua studentëve (se nuk arriti ta identifikonte apo nuk e kërkoi identifikimin e studentit, nuk e mbaj mend), duke u folur me ton kritik apo të rëndë, por duke vënë në dukje, që duhej të tregoheshin më të respektuar, minimalisht për faktin që pedagogu edhe pse në pension, vinte për mësimdhënien, dhe duhet të vlerësonin edhe faktin që eksperienca edhe përgatitja e pedagogut (i cili ndoshta ka qenë edhe pedagog i profesor Arbenit), ishin mjaft të vlefshme për ata dhe për vetë profesor Arbenin dhe më pas largohet pasi mbaroi edhe me shënimet. E gjithë salla ra në qetësi deri sa mbaroi mësimi...

Burgu i pamerituar i kryeinxhinierit

Nga Rezarta Delisula

Artikuj të ngjashëm Artikuj

Basti i Ramës me brezin e ri

Muzeu i Luftës: Nga MIG-ët te NATO, si ka evoluar ushtria shqiptare!

TRE DITËT E PARA MES DEMOKRACISË DHE TMERRIT

“Safe2Eat”, fushata që na çon më pranë BE me ushqimin

Arabia Saudite, resortet luksoze që të lënë pa frymë

Si e (vetë) vranë Vladimir Shehun, ku është letra e fundit???

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Prangat e Veliajt, skenari i zgjedhjeve

EKSKLUZIVE/ Spiunët e televizionit

Damasku, kryeqyteti i paqes së humbur

Si e (vetë) vranë Vladimir Shehun, ku është letra e fundit???

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Muzeu i Luftës: Nga MIG-ët te NATO, si ka evoluar ushtria shqiptare!

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Burgu i pamerituar i kryeinxhinierit

Nga Rezarta Delisula

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?