Ben Blushi, Top-Channel pushon shoferin nga puna

Ngjitja në krye të televizionit të një prej njerëzve që bëri aq shumë rrëmujë në tregun mediatik. Dashuria e madhe me Vjollca Hoxhën dhe “prishja” pa përfunduar kontratën në krye të TCH. Eksodi i madh i gazetarëve, regjizorëve, operatorëve nën drejtimin e “erës Blushi”. Akuzat për gjobvënie e pronësia mbi televizionin Top News. Çfarë fshihet pas largimit të bujshëm? Nga propozimi për pozicionin e drejtorit në darkën festive në Stamboll, tek mbyllja e derës në Tiranë Emërimi i tij në krye të televizionit kombëtar Top Channel, nisi nga një darkë festive në Stamboll, në dhjetorin e vitit 2017, të një prej biznesmenëve më të fuqishëm në vend, dhe përfundoi, pa mbushur 4 vite, me ndikimin e shumë faktorëve, ku përfshihen ata personalë të familjes, por edhe të biznesit. Ben Blushi mori detyrën e Drejtorit të Përgjithshëm të Top Channel kur pakkush e priste rikthimin e politikanit, shkrimtarit, publicistit, në krye të medias, pasi kishte kohë që ishte ndarë me të; e ku pas eksperiencës së tij si zëdhënës i Fatos Nanos pa ardhur fundi i viteve 2000, karriera i kishte prirë lart, duke botuar disa libra best-seller në Shqipëri, por edhe në trevat shqipfolëse e mandej, politika, ishte dera e re e hapur për të shkëlqyer me fjalimet brilante, plot pathos, gjithë ide, pse jo dhe mllef, por me të gjithë shqiptarët ngulur para ekranit për të dëgjuar se ç’do të thoshte Blushi. Pasi u zu me Ramën, legjislatura e re e shtatorit 2009, e gjeti Ben Blushin në krye të Lëvizjes për Mendim Ndryshe brenda Partisë Socialiste, e prej andej, një politikan, gjithmonë me qëndrime antagoniste ndaj kreut të PS, Edi Rama, por jo ndaj partisë. Qëndrimi i tij brenda strukturave të PS, kishte ulje ngritjet e zakonshme, ku “kafetë” paqësore mes tij dhe Edi Ramës kishin gjithmonë kuriozitetin mediatik, me kamerat mbrapa xhamave të lokaleve, e ku prej atyre debateve me orë të zgjatura, zor se dilte ndonjë lajm a informacion se çfarë kishin vendosur me njëri- tjetrin; nëse ia kishin thënë kundërshtitë në sy, apo vazhdonte të mbizotëronte ideja gjeniale e shprehur në artikulimin publik të Blushit që deklaronte se PS ishte një autobus ku nuk i flitej shoferit. “Partia Socialiste sot i ngjan autobusëve urbanë të viteve 80, të cilët ishin të mbushur me tabela të vogla që shkruanin: Mos i fol shoferit. Nuk e di pse regjimi i asaj kohe donte t’i bindte qytetarët e vet se drejtuesit nuk i flitet, sepse kjo rrezikon jetët e tyre. Sot, po të hysh në PS, shumica e njerëzve, ashtu si ne autobusët e vjetër të thonë: Mos i fol shoferit. Kur ti i pyet se për ku po shkon autobusi, ata bëjnë me gisht nga shoferi dhe duket sikur thonë: Vetëm ai e di. Kur t’i bëhesh gati të pyesësh shoferin, ku po shkojmë, njerëzit tregojnë me gisht tabelat ku shkruan: Mos i fol shoferit. Kjo që thashë pa dyshim duket si një shaka e trishtuar dhe shumë miq të mi do më thonë: E ç’rëndësi ka ku poshkojmë, rëndësi ka që autobusi po ecën. Kjo është e vërtetë. Autobusi po ecën, por rruga është e gjatë dhe unë nuk rri dot pa folur” (Ben Blushi - 3 mars 2008). Ben Blushi nuk ia doli dot t’i fliste shoferit, gjithë rrugës që qëndroi në të njëjtin autobuz. Ndaj një ditë të bukur, vendosi të marrë autobuzin e vet. Të ishte po vetë shofer dhe të ndiqte të njëjtin rregull që kishte kundërshtuar më parë. Mori të drejtojë autobuzin “Libra” në 2016, dhe i zhgënjyer, braktisi të njëjtin autobuz në vitin 2018 pas një sqarimi të gjatë për median dhe votuesit e tij. Vetëm Blushi e di, nëse autobuzi që po drejtonte, humbi rrugën, apo nëse i kishin vendosur aq shumë pengesa në të, saqë durimi iu sos e mezi priti të zbriste tek stacioni i radhës, pa bërë qoftë edhe një ndalesë reflektimi nëse faji ishte realisht i shoferit, apo pasagjerëve që ia frynin kokën me biseda shterpë apo ide të parealizueshme në një afat të shkurtër, sikurse do të donte. Si hyri Blushi në Top Channel Vjollca Hoxha mblodhi stafin dhe deklaroi publikisht se më në fund kishte bërë zgjedhjen e duhur për pavarësinë dhe të vërtetën mbi çdo interes, për të hapur një cikël të ri komunikimi të Top Channel-it me shikuesit e vet në mbarë botën. Vjollca, i shtroi Benit një tapet të kuq e me spektatorë në të dy anët që e prisnin me duartrokitje. Ajo rrinte atje, në krye, te dera, për të shtrënguar dorën me njeriun që e vlerësonte pafundësisht si gazetar, shkrimtar e politikan, e që kishte arritur më në fund ta kishte MAKINISTIN e trenit të madh “Top Channel”. Me të vetmin ndryshim që zonja Hoxha nuk arriti ta kuptonte në kohë se Beni, analogjinë e kishte bërë me shoferin e autobuzit... “Kam kënaqësinë të njoftoj të gjithë shikuesit dhe punonjësit e Top Channel se duke filluar nga sot z.Ben Blushi do të jetë Drejtor i Përgjithshëm i Top Channel. Si një gazetar, shkrimtar dhe politikan që ka vendosur pavarësinë dhe të vërtetën mbi çdo interes, jam e bindur se z.Blushi do të ndihmojë Top Channel për të hapur një cikël të ri komunikimi dhe informimi me të gjithë dashamirësit tanë në krejt hapësirën shqipfolëse. Dua t’i siguroj të gjithë se Top Channel i mbetet besnik parimeve tona si një media e lirë, e pavarur dhe profesionale, e cila ka qenë, është dhe do të jetë përherë në shërbim të së vërtetës dhe lirisë së informimit”, deklaroi për gjithë shqiptarët pronarja e TCH, Vjollca Hoxha mesditën e 29 janarit 2018. Për tryezat e thashemnajës së tavolinave me alkol e puro në Tiranën e zhurmshme, ky nuk ishte një njoftim i ri. Ben Blushi kishte udhëtuar në të njëjtin “charter” që çonte në Stamboll në dhjetorin e 2017-ës, njerëzit më të pushtetshëm mediatikë, politikë e të biznesit të Tiranës, për të festuar larg syve e vëmendjes në Shqipëri, ditëlindjen e 50-të të një prej biznesmenëve më të fuqishëm të kohës, Saimir Mane. Aty u përvijua miqësia e Benit dhe Vjollës, aq sa, kur u kthyen në Tiranë, drejtuesit atëkohë të televizionit, shihnin se në telefonat e tyre vinin mesazhe shumë të kuruara nga Vjollca Hoxha. E meqë drejtuesit e Top-it e njihnin “gjuhën e komunikimit” të pronares së tyre, me kuriozitet pyesnin se kush mund të ishte ideatori i sms-ve me urdhëra e sugjerime dhe shumë shpejt u zbulua se këshilltari hije i Vjollcës, ishte Ben Blushi. Ikjet e bujshme nga Top Channel I pari drejtues “i djegur” pa hyrë Ben Blushi në derën e TCH, ishte Sokol Balla. Në pozicionin e Drejtorit të Përgjithshëm të Top Channel-it, Balla nuk qëndroi asnjë ditë për të parë sesi do të ishte “era-Blushi” në televizion. Iku apo e shtynë të ikte, Balla, kishte mbi një muaj që kishte lënë lajmet e Top-it dhe merrej vetëm me emisionin “Top Story”, por edhe këtë të fundit e mbylli në vigjilje të 2018. “Uroj që jeni duke kaluar bukur. Ky vit mbyll shumë kapituj për shumë nga ne. Një nga ata edhe unë. Në këtë fund 2017 dua të uroj së pari kolegët e mi të @topchanneltv me të cilët kalova më shumë 12 vjet të paharruar, dhe me të cilët rruga ime sot ndahet. Gëzuar 2018! Koli”, ishte statusi i Sokol Ballës në Tëitter në 31 dhjetor 2017. Me propozimin e Ben Blushit, pa u emëruar ky i fundit zyrtarisht pozicionin e ri, detyrën e drejtorit të komanduar të informacionit, e mori gazetari Endri Xhafo. Me një staf që e njihte, me cilësitë e veta të një gazetari të sprovuar Xhafo ideoi stilin e tij të lajmeve në Top, që po i rezistonin ndryshimeve të bujshme të gjigandit mediatik, dhe duke u përballur edhe me interesat politike e ekonomike për aq sa mundej në atë televizion që e kishte të vështirë ndryshimin e menjëhershëm të kursit. Çuditërisht, pas 4 muajsh në detyrë, kur Blushi ndërkohë kishte hyrë kokë e këmbë në televizion, Xhafo jep dorëheqjen në maj 2018. Endri Xhafo, rezulton të jetë drejtori i fundit i lajmeve në TCH deri më tani, pasiqë, me erën “Blushi”, Top-i nuk pati më drejtorë lajmesh, por vetëm kryeredaktorë. Ishte koha e ikjeve të mëdha. I menjëhershëm ishte largimi i Ylli Rakipit me emisionin e tij nga Top Channel. Pas tij, gazetari Elert Yzeiri iku nga drejtimi i Top News. Në redaksinë e lajmeve të TCH, kishte vrima nga të gjitha anët. U larguan në periudha të ndryshme, shumë nga gazetarët që kishin qenë në bërthamën e edicioneve të lajmeve: U largua Eni Ferhati, Indrit Maraku, Merita Haklaj, Sokol Bregu, Beti Njuma, Klodian Tomorri, operatorë e montazhierë…Një ndër ikjet më të fundit nga informacioni i TCH ndodhi këtë vit, Pandi Gjata… Programacioni nuk po gjente qetësi. I pari i penalizuar ishte Ledion Liço, dhëndërri i pronares Vjollca Hoxha që nuk e vazhdoi më emisionin e tij. Regjizori Ergys Lubonja që ‘dirigjonte’ emisionet “Top Story” dhe “Top Fest” nuk u pa më në ambientet e televizionit; Altin Basha dhe Elton Papuçiu dy regjizorët e emisionit humoristik aq të dashur për shqiptarët “Portokalli”, u larguan me dorëheqje drejt ekraneve të tjera. Hemoragjia e burimeve njerëzore, në kohën kur të gjeje njerëz ishte e vështirë, nuk mbaronte. Të gjithë iknin me shumë fjalë, thashetheme, keqkuptime e moskuptime… Aty ku zyra e Vjollcës ishte totalisht e mbyllur, e ku dera e Blushit ishte e vështirë të hapej. I vetmi i mbijetuar qëndronte “babushi” mjekërbardhë me llullën e tij, Filip Çakulli. 20 vitet e tij të rrugëtimit në Top Channel me emisionin satirik, investigues e denoncues “Fiks Fare” në prime time do të ishte shumë e vështirë të zeroheshin, pavarësisht se ambienteve të Top-it flitet gjithmonë e më shpesh se prej shumë muajsh “Filipi dhe Blushi nuk kanë komunikim me njëri tjetrin”. Kjo ndoshta edhe për shkak të një pavarësie ekonomike që Filipi i kishte krijuar emisionit, me një lloj vetëfinancimi, i pandikuar nga politika e të ardhurave dhe shpenzimeve të gjigandit mediatik. “Fiks Fare” krijoi si një lloj ishulli të vetin brenda televizionit, ku Filipi, padyshim, me zgjuarsinë e vet, dinte të luante për të mbajtur balancat, në ruajtje të profesionalizmit të emisionit, dhe politikave të ndjekura nga pronarja e TCH, Vjollca Hoxha. Pse ky largim i papritur? Askush nuk di të thotë sot se çfarë ndryshoi në raportet shumë miqësore të krijuara mes Vjollca Hoxhës dhe Ben Blushit. Por që prej disa javësh, tryezat e zhurmshme të Tiranës po vlonin nga thashthemnaja për një krisje të raporteve mes të dyve. Një dashuri e madhe që kishte konsumuar kohën e vet, e po fikej nga dita në ditë, e paushqyer me miqësitë e dukshme publike. Kontrata katër vjeçare e Ben Blushit me TCH mbaronte në shkurt 2022. Ndaj për këdo, email i tij i largimit mesditën e 2 dhjetorit 2021, ishte shumë i parakohshëm. “Duke nisur nga sot nuk do jem më në Top Channel. Me bindjen se sot po largohem nga një kompani më e shëndetshme, më e besueshme dhe më e madhe në krahasim me atë që gjeta para katër vitesh, ju uroj të gjithëve punë të mbarë. Ben Blushi”, shkruhet në emailin e tij. Nuk përmendet fjala “dorëheqje”, por “largim”. Përpara se Blushi të shkruante këtë email në mesditë, pati disa ‘sms’ që po qarkullonin tek njerëzit kryesore që ai njihte, miq e shokë të vetët, ku komunikonte vendimin e marrë. Nuk kishte pritur as të ndahej me stafin, po këtë zgjodhi ta bënte me një e-mail. Të shtunën e 27 nëntorit, siç tregojnë njerëz pranë të dy palëve, mes Ben Blushit dhe Vjollca Hoxhës ka pasur një komunikim, pa shumë debate. Vjollca, siç thonë palët e treta, i ka komunikuar Blushit se televizioni do t’i kthehet familjes, ajo dhe vajzat do ta menaxhonin, ndaj nuk do të kishte rinovim kontrate. “Kaq kishe?”, mësohet t’i ketë thënë Beni pa ndonjë rezistencë. Pronarja e Top, i ka kërkuar Blushit që të mblidhin stafin për një komunikim, por ky i fundit nuk ka pranuar. Kaq ka qenë e gjitha, derisa erdhi mesdita e 2 dhjetorit, kur Blushi njoftoi gjithë stafin për vendimin e largimit nga Top Channel. Ben Blushi, sikurse u ka thënë miqve të tij, hyri në atë kompani me 11 milionë euro borxh, e në largim, la vetëm 4 milionë euro borxh. Nga pikëpamja financiare për gjigandin mediatik që nuk ka gjetur qetësi me kredi bankare apo gjyqe për pronësinë, kjo është një arritje e madhe. Por siç thonë bashkëpunëtorët e TCH, filozofia me të cilën Blushi hyri në televizion tre vite e gjysëm më parë, ishte ajo e shkurtimit të shpenzimeve pa menduar më pare, sesi do të shtoheshin të ardhurat. E kështu, duke mos njohur mirë stafin, njerëzit, pati goxha shkurtim shpenzimesh që në fakt, çoi në atë eksodin e madh të njerëzve nga Top. Pa harruar se një rol jo të vogël luajti edhe hapja e televizionit A2CNN në atë kohë, ku u stacionuan një pjesë e madhe e të trajnuarve të TCH. Përtej kësaj, sa më shumë kalonin ditët, e javët, e muajt, aq më shumë rritej oreksi për të rritur të ardhurat. Dhe për këtë, Blushi kishte strategjinë e vet. Arsyet e pathëna Vjollca Hoxha është një grua e zonja në zanatin e vet. Ka ditur të mbajë në këmbë atë që Tani krijoi plot dashuri, pavarësisht se në këtë rrugë të vështirë nuk kanë munguar thashethemet. Vjollca dhe familja, ishin përherë në tavolinat e vendimmarrjes. Ndaj Vjollca vetë mund të ketë konsumuar ditët e qetësisë, kur për çështje të rëndësishme, vendimmarrje të mëdha, në telefonin e saj nuk mbërrite asnjë mesazh. Komunikimet me ata që merrnin vendime, kalonin tanimë nga telefoni i Ben Blushit, që me industrinë e madhe mediatike me vete, kishte në dorë të bënte dhe ndere, e të mbyllte dhe halle. Për një bizneswomen si Vjollca Hoxha, ndarja nga realiteti, mund të ketë qenë një ndër arsyet që e kanë shtyrë në marrjen e këtij vendimi. Por nuk mbetet më pas ndikimi që ka Lori Hoxha, vajza 28 vjeçare e dinastisë, që pasi ka shijuar periudhën si fashioniste “High Class”, është kthyer me këmbë në tokë për të marrë në dorë fatet e biznesit të krijuar nga i ati. E në këtë ecuri, aty ku të gjithë mendojnë se me punë, vullnet e përkushtim mund të arrihet gjithçka, Lori, mori në dorë të bënte producenten e “Big Brother Vip” emisionin e suksesshëm me shikueshmëri marramandëse e me plot financime. Po të pyesësh sot në ambientet e Top apo Digitalb, të gjithë, nga gazetarët e njohur, tek operatorët e thjeshtë, thonë se ky emision, ishte gjetje. Shikueshmëria u rrit, të ardhurat nga reklamat u rritën po ashtu. Ndaj dhe Lori, duke drejtuar një sipërmarrje kaq të madhe, ka ndikuar jo pak tek vendimi i së ëmës se mund ta menaxhojnë si familje gjigandin mediatik të krijuar nga Tani. E në fund, gjithçka përfundon aty ku nis, në 360 gradë, tek ndërhyrjet e mëdha që vijnë nga biznesi. Një prej biznesmenëve më të fuqishëm në vend, nuk po gjente qetësi muajt e fundit nga sulmet e përsëritura në edicionet e emisionet e Top Channel-it. E kur vjen puna te paratë, kjo është e fundit që i vë kapak një marrëdhënieje. Zonja Hoxha, duket se nuk e ka menduar më gjatë pasi sinjalet po i vinin gjithandej, nga miqtë, nga familja, nga stafi. Ishte momenti i duhur që prona t’i kthehej të zotit. Koha do ta tregojë nëse ka marrë vendimin e duhur, në kohën e duhur. Ky eshte box me faksimile A është bërë Ben Blushi pronar i Top News? Një vit më parë, Ben Blushi ndoshta nuk e ka menduar se do të ishte në këtë situatë. Ndaj në 17 dhjetor 2020, mori vendimin për të themeluar shoqërinë VOX TV, që jo rastësisht, ka të njëjtën adresë e zyra me ato të Top Channel, siç rezulton dhe në faqen online të televizionit: Mëzez, Tiranë, Njësia administrative Kashar, rruga “17 Nëntori”, Godina nr 20, kati 5. Administrator dhe ortak i kësaj shoqërie është gazetari Endrit Habilaj, që është drejtues i televizionit Top News, por edhe autor i emisionit “Top Story” në TCH. Tek “Historiku i regjistrimeve”, sipas Qendrës së Regjistrimit të Bizneseve, rezulton se në 23 shkurt 2021 është depozituar vendimi i Asamblesë së Ortakeve për ndryshimin e emrit të subjektit nga Top News, në VOX TV. Dhe emri tregtar ishte Top News, dhe u bë VOX TV. Pas këtij ndryshimi nuk është shumë e qartë nëse Top News mbetet pjesë e Top Media Group, apo ka dalë më vete me pronar të ri. Në fillim u fol se Top News u dha me qira tek Ben Blushi nga Vjollca Hoxha. Televizioni ndryshoi në fillimvit: u rrit stafi, u shtuan programacionet, u shtuan edhe shpenzimet. Pjesa më e madhe e gazetarëve, punonin dhe raportonin tek Top News që po merrte vëmendje të madhe. Edhe pse emri tregtar ka ndryshuar në VoxTV, logoja e tij ka mbetur e njëjtë. Me largimin e Ben Blushit nga TCH, nuk dihet se cili do të jetë fati i këtij televizioni: mbetet në pronësi të Top Media Group, apo ka ndryshuar pronësinë siç thonë dokumentet. Akuzat për gjobvënie ndaj një firme farmaceutike Në qershor 2019, biznesmeni Nadir Çausholli, akuzoi televizionin TCH për gjobvënie në shumën 250 mijë euro. Akuza erdhi pas një seri shkrimesh, kronikash e investigimesh që biznesmeni pretendoi se ishin bërë ndaj kompanisë së tij farmaceutike CFO Farma dhe produkteve të saj. Deri në 1 janar 2019, CFO Farma kishte qenë sponsor gjeneral i disa emisioneve të TCH, por marrëdhënia mes tyre është ndërprerë. Nadir Çausholli doli në media dhe deklaroi se është gjendur nën sulmin e TCH dhe për këtë arsye, kishte bërë kallzim penal ndaj administratores së TCH dhe dy personave të stafit të televizionit për veprën penale të “shtrëngimit me anë të kanosjes për dhënie pasurie”. Biznesmeni deklaroi se TCH i kishte kërkuar 250 mijë euro në këmbim të mbrojtjes që televizioni do t’u bënte produkteve të tregtuara nga kompania e tij. Kjo shumë do të ishte e veçantë nga ajo që CFO Pharma do të paguante për publicitetin, e etiketuar si Public Relation. Ndërkohë që Çausholli u ankua zyrtarisht në AMA, Ambasadën Amerikane dhe Prokurorinë e Krimeve të Rënda lidhur me gjobvënien e pretenduar. Nga ana tjetër, TCH verifikoi se një letër që mban sipër emrin e kryeredaktorit të Top Story, Endrit Habilaj për ish-ministren e financave Anila Denaj, ishte një falsifikim sipas tyre i zotit Çausholli, pasi letra ishte dorëzuar nga shoferi i tij, me qëllim krijimin e një alibie të rreme të përfshirjes së TCH në gjobvënie.

Ben Blushi, Top-Channel pushon shoferin nga puna

Nga Anila Basha

Artikuj të ngjashëm Artikuj

POLICËT e lënë rrugëve: Pa bukë, të pasiguruar e pa shtesë page jashtë orarit

Sulmi mbi Ukrainë dhe dora e zgjatur e Putinit

DITARI I NJË NËNE QË VUAN, 22 vjet në kërkim të së vërtetës

Marsi i grave të vrara… dhe një ftesë për SPAK

Banaking – si vetë emri, histori me KOKAINË nga superprodhimi

Sokol Ngresi, gjyqtari që mohoi shtëpinë në Vlorë për t’i shpëtuar Vetting-ut

Artikujt më të lexuar

POLICËT e lënë rrugëve: Pa bukë, të pasiguruar e pa shtesë page jashtë orarit

Zengjinet e qeverisë

Ori Nebiaj për politikën dhe filizat e reja të dashurisë

Grinta prej Grifshe e Gridës

VALENTINA DUKA: Gabimi më i madh në jetë kur i thashë “PO” Lulzim Bashës

Rinia e një diktatori që s’e donte artin

“Non grata”? Tronditja amerikane për Shqipërinë

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Ben Blushi, Top-Channel pushon shoferin nga puna

Nga Anila Basha

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?