Belind Këlliçi: TIRANA që duam do fitohet nga zemra dhe shpirti i banorëve të vet!

Është 35 vjeç, i arsimuar në SHBA dhe një kampion tenisi. Eshtë një pasardhës i Qazim Mulletit nga nëna e tij ndërsa stërgjyshin para 100 vitesh e ka pasur deputet të Tiranës e Durrësit në parlamentin e 1921. Pak kush e di që ai ka qenë “Ledio” i parë pas pultit në emisionin “Klani i Natës” së Arian Çanit e shumëkush e di dhe ai vetë ndihet krenar që ka zgjedhur për bashkëudhëtare jete Anën, vajzën që dashuron librat. Për marrëdhënien me të flet për herë të parë, edhe pse, jeta e tij tani që kërkon të sfidojë Erion Veliajn për bashkinë e Tiranës do të kalojë në një “skaner” publik të paimagjinuar më parë. Ana, vajza e Ledi Shamkut dhe Artan Shkrelit, nuk mbetet më një “histori e mbyllur”. Belind Këlliçi prezantohet tanimë si një nga kandidatët kryesorë për t’i bërë ballë Erion Veliajt në Tiranë. E sheh si një mision të mundur sepse e ka zgjedhur strategjinë e vet… Bashkia e Tiranës është kali i betejës në këto zgjedhje. Kryeqyteti është trendi lëvizës ose jo i një politike që në vendin tonë, duket se e ka të vështirë të ndryshojë e qarkullojë figura të reja. Belind Këlliçi është një prej këtyre figurave. Ai është miku i të gjithëve… Një i ri model, i papërtuar dhe i kudogjendur. Nuk është njeri i zyrave, i kostumeve, prapaskenave e planeve të thurura me kujdes. Këto ditë e ndesh duke takuar njerëz, edhe pse fushata nuk ka nisur ende zyrtarisht. Është i bindur se vetëm duke folur me gjithsecilin mund të tejkalojë çdo pengesë e ndasi brenda demokratëve dhe të mundë Erion Veliajn. Gjasat janë që ai të dalë fitues i primareve dhe të përballet me Erion Veliajn për Tiranën. Belind Këlliçi është 35 vjeç dhe prej 13 vitesh është pjesë e politikës aktive në Partinë Demokratike. Vjen nga nje familje tradicionalisht e djathtë që beson fort te vlerat, ekonomia e tregut, shteti i së drejtës, prona dhe familja. Stërgjyshi i tij Maz’har Këlliçi u zgjodh deputet në parlamentin e parë shqiptar në 21 prill 1921 si përfaqësues i Tiranës dhe Durrësit dhe fiks 100 vite dhe 4 ditë më pas, më 25 prill 2021 stërnipi i tij Belindi hyri në Kuvend si deputet i Tiranës. Ai ka mbaruar studimet në Shtetet e Bashkuara të Amerikës me rezultate të shkëlqyera. Që 5 vjeç ka luajtur tenis dhe ka qenë edhe kampion në këtë sport për grupmoshat nën 18. Tenisi i ka ndryshuar jetën. Për shkak të tij dhe mesatares së lartë ai mundi te fitonte bursë në shtetin e Maryland-it. “Tenisi më shërbeu si trampolinë për të më çuar në SHBA dhe për të më paguar një pjesë të madhe të shpenzimeve të studimeve që ndryshe nuk i përballoja dot. Më ka hapur dyert për të parë dhe Amerikën, sepse kam qenë lojtar profesionist”. Belindi këtë e kujton si periudhën më të bukur të jetës. BELIND KËLLIÇI, DIKUR TEKNIK PULTI I ARIAN ÇANIT Puna e parë që ka bërë ka qenë në adoleshencë. Pakkush e di, se Belind Këlliçi ka punuar për gazetarin Arian Çani në një emision në radio. “Emisioni quhej ‘Klani i natës’. Kam qenë teknik pulti, pak a shumë si Ledio, por i fshehur prapa kuintave. Ka qenë një emision i jashtëzakonshëm që e kujtoj me shumë nostalgji. Për herë të parë kam marrë rrogë aty, 250 mijë lekë të vjetra!” Kur iku në SHBA, iu dedikua tërësisht studimeve dhe në vitin 2009 vendosi të kthehet në Shqipëri, sepse duhej të përmbushte një mision. “Kur erdha në Shqipëri duhet të përmbushja jo vetëm pasionin tim, por edhe një mision të papërmbushur të parardhësve të mi duke nisur nga babai im dhe xhaxhai im që kanë qenë themelues te PD në Tiranë. Gjithashtu gjyshi im ka qenë një aktivist që ka jetuar në kohën e komunizmit. Dinte 7 gjuhë të huaja, por përfundoi magazinier. Mund të kishte përfunduar dhe shumë më keq. Një familje që i ka dhënë Tiranës, figurën e Qazim Mulletit. Pak e dinë se e ëma e Qazim Mulletit është Këlliç. Duhej të përmbushja një mision 1 shekullor”. Duket ironike por me t’u kthyer në Shqipëri, Belindi u angazhua në njësinë numër 10, në fushatën e Gert Bogdanit, pikërisht një prej kandidatëve që sot i duhet ta sfidojë në primaret e PD. Ai kontribuoi që Gerti të zgjidhej deputet dhe më pas iu desh edhe ta zëvendësonte në postin e kreut të Forumit Rinor të Partisë Demokratike. LIDHJA ME ANA SHKRELIN, VAJZËN E ARTAN SHKRELIT DHE LEDI SHAMKUT Belind Këlliçin e ka shoqëruar shpesh pyetja: Ç’bën një demokrat tipik si ai me një vajzë që njërin prej prindërve e ka pasur deputete të PS-së e gjuhëtare dhe tjetrin, një ndër arkitektët më kontemporanë në vend, angazhuar po ashtu në qeverisjen e majtë?! Në fakt, kjo është një pyetje që i përket një mentaliteti komunist, që nuk e njeh as ndjenjën e as njeriun e lirë që dashuron atë kë i do zemra. “Në një marrëdhënie personale, çdo i ri gjykon me ndjenjë me zemër. Ana, është një nga krenaritë e mia më të mëdha, të cilën unë nuk e kam fshehur kurrë. Ana është etiketuar dhe i është rënë në qafë pa të drejtë për shkak të angazhimit të prindërve të saj, por ajo vetë eshtë shumë e distancuar nga jeta politika, është në botën e publikimeve, librave. Ka një shtëpi publikimesh që e ka themeluar vetë. Shtëpinë ku ka lindur gjyshja e saj, një shtëpi tradicionale tiranase, ka refuzuar ta japë për një pallat shumëkatësh në zemër të Tiranës, në njesinë 10, aty ku dhe unë jam lindur e jam rritur dhe ka vendosur ta kthejë në një hapësirë novacioni, dhe ku promovohen shumë edhe vlerat feministe, sepse është shumë femiste dhe ku bëhet kulturë!” Ata nuk flasin kurrë për politikë e megjithatë, Ana është mbështetja e tij më e madhe në këtë rrugëtim të ri. Provën e parë ia dha kur doli hapur kundër shembjes së Teatrit Kombëtar. Sepse Ana, thotë Belindi, është një vajzë që i beson vlerave dhe kauzave të drejta. BELIND KËLLIÇI: MË KA SHOQËRUAR IDEJA QË JAM LIDHUR ME NJË VAJZË ME PRINDËR SOCIALISTË “Jo pak më ka shoqëruar ideja që jam lidhur me një vajzë prindërit e së cilës kanë patur angazhim pranë të majtës, por për mua pak rëndësi ka. Për mua rëndësi ka kush është Ana, çfarë përfaqëson Ana si individ. Unë i dal për zot çdo vendimmarrjeje personale dhe publike”. Në këtë betejë për Tiranën, Belindi ka marrë edhe urimet e prindërve të Anës, Artan Shkrelit dhe Ledi Shamkut me të cilët ka një raport shumë të ndjerë njerëzor e familjar. Po kur do martohet? Te kjo pyetje, ai e ka të pamundur të shmangë kundërshtarin e tij politik. “Kurdo që të vendosim, e sigurt është që dasmë në kala nuk do bëj dhe dasëm 500 milionë lekë me kursimet e pensionit të mamit nuk do bëj. Këto broçkulla shqiptarëve nuk do ia them. Kam vendosur të futem i vërtetë në politikë dhe do mbetem i tillë deri në ditën e fundit të angazhimit tim”. Më tej rrëfen se ai dhe Ana nuk janë shumë të dhënë pas organizimit të dasmës. Më shume do kishin preferuar një ceremoni private me familjen dhe një udhëtim të bukur me njëri-tjetrin. MARRËDHËNIA ME LULZIM BASHËN, KËLLIÇI: AI ËSHTË I KEQI I VETES Belind Këlliçi, marrëdhënien me Lulim Bashën e ka patur me batica dhe zbatica. Thotë se përherë ka menduar se Basha ka qenë i keqi i vetes së tij. Për shkak te enturazhit që e ka rrethuar, rrethi i tij i ngushtë, njerëzve me te cilët është këshilluar e që sipas tij, kanë qenë thellësisht apolitikë. Ata, rrëfen Belindi, ndërhynin në vendimmarjen e PD. Në shumë raste kanë krijuar konflikte dhe përçarje në PD dhe të gjitha këto kanë shkuar në dëm të tij. Ishte Basha ai i cili e mbështeti dhe promovoi por në dy momente, marrëdhenia e tyre u lëkund. Njëherë kur nuk e futi në listat për deputetë dhe së fundmi kur Belindi mori shumë vota personale. “Me Lulzim Bashën jam njohur në Bashkinë e Tiranës. Në 2013 më ftoi të bëhesha pjesë e ekipit të tij në PD. Në 2014 jam zgjedhur koordinator kombëtar prej tij dhe anëtar kryesie i PD. Në 2015 fitova garën për forumin Rinor. Në 2017 ndodhi ajo që ndodhi. Basha vendosi në mënyrë personale, një precedent të rrezikshëm, jo vetëm të linte jashtë kryetarin e Forumit Rinor të partisë së tij të zgjedhur me “një anëtar një votë”, por edhe titullarët kryesorë të partisë. Qoftë sekretarin e përgjithshëm, sekretarin organizativ, ekipin e tij dhe vendosi të promovonte kontakte personale, një pjesë e tyre të panjohur për demokratët. Fushata e atij viti ishte 4 javore dhe gjysmën e kohës na u desh të prezantonim kandidatët, se nuk i njihnin”. Katër vitet që pasuan, Belind Këlliçi ishte në ballë të çdo proteste e aksioni politik, si një nga zërat më të fortë të Partisë Demokratike dhe këtë herë, Basha e bëri drejtues politik në Tiranë dhe e futi në listën e sigurt për deputet. Në zgjedhjet e viti 2021 ai theu herësin, duke marrë mbi 11 mijë e 601 vota personale në zonën e Kombinatit, Vaqarrit, Pezës, Ndoqit, Kasharit dhe Pezës, zona që njihen si të majta. “Pas zgjedhjeve ne patëm një proces analize, objektivat dhe rezultatet. Targeti dhe objektivi im u tejkalua me mbi 4 mijë vota. Prisja thjesht një “faleminderit”, por u godita politikisht për këtë, pse unë kisha marrë vota. U binda që me Lulzim Bashën nuk ekzistonte meritokracia. Gjendeshin mënyra për të goditur e zbehur politikisht ato figura që në fund morën vota jo për vete, por për PD-në. U goditëm unë, zoti Shehaj, Bumçi, Luçiano Boçi, i cili ishte një shembull ekzemplar”. KËLLIÇI: SI E LASHË BASHËN PËR BERISHËN Për të, nëse ka faj ndokush për peshën politike dhe promovimin e Lulzim Bashës, ai është Sali Berisha. Ai madje zbulon se ka debatuar shpesh me Berishën mbi imunitetin politik që lideri historik i PD-së i jepte Lulzim Bashës. Kur ndarja e madhe ndodhi, Këlliçi kërkoi të takohej personalisht me Berishën, për t’i shprehur mbështetjen e tij. Kjo sepse, siç thotë ai, edhe shumica dërrmuesve e të rinjve të forumit, mbështesnin Berishën. Por shpejt, edhe me Berishën, u duk se pati një krisje kur u zhvilluan zgjedhjet për nënkryetar në PD. Këlliçi thotë se ndaj tij ndodhi një sulm i paprecendentë, nga persona që nuk kanë ndonjë funksion në PD. E megjithatë, ai njohu rezultatin dhe tani po shikon përpara për Tiranën. KËLLIÇI: PSE VENDOSA TË KANDIDOJ PËR TIRANËN Kur e pyes se pse vendosi të futej në garë dhe të lerë mandatin e deputetit, ai thotë: “Sepse gjykoj që ky është një moment historik. PD nuk është në ditët e saj më të mira dhe i takon brezit të ri të marrë më shumë përgjegjësi. I takon një politikani për të prishur çdo rehati personale e për t’u hedhur në betejë. Eshtë një betejë historike për të çliruar Tiranën nga një model uzurpimi që e ka bërë të pajetueshëm këtë qytet. Nuk mund të vazhdoja të isha dëshmitar okular i shkatërrimit të qytetit tim dhe të kisha komoditetin e mandatit e t’i bishtoja një përballjeje me Erion Veliajn për të cilin, jam koshient që është një makineri shumë e madhe financiare dhe mediatike”. Po çfarë e bën të mendojë se mund ta mundë gjithë këtë makineri? “Mundet me frymë, me kurajo, me model. Me shpirt… Mundet me një fushatë pune dhe terreni. Nuk besoj se ka një qytetar që nuk i sheh kullat…”, thotë ai. Por këtu nuk mund të mos e ndërpres dhe ta pyes se pse nuk i denoncon me emra kullat dhe pronarët e tyre. “Për ato që kam fakte i kam denoncuar me emra. Aty ku kam fakte e prova. Kam denoncuar me firmë dhe vule shkresën e firmosur nga Erion Veliaj në mars të 2017 për inceneratorët. E kam bërë në komision Hetimor Parlamentar, do vijoj ta bëj edhe në SPAK”. Belind Këlliçi zotohet se ditën e parë që do futet si kryetar Bashkië ne zyrë, do shkojë personalisht në SPAK për të depozituar këtë provë dhe gjithë dokumentacionin e inceneratorit të Tiranes. “Por unë nuk jam gjobaxhi”, thotë ai. “Nëse ka një biznesmen që ka përfituar në mënyrë të paligjshme, ka një shkak dhe shkaku janë ata që japin leje në mënyrë të paligjshme”. Aksionin e konsfiskimeve të ndërtimeve në mënyrë preferenciale ai e cilëson një gjueti shtrigash. SKENARI I KËLLIÇIT: Veliaj do ia bëjë Ramës më keq se Basha-Berishës! Kryeministri Edi Rama ka një plan okult ndaj Veliajt, por nuk zbulon se çfarë, është parashikimi hipotetik i Belindit. “Edhe pse e ka kandiduar (pavarësisht se jo zyrtarisht), Rama është i bindur se do të jetë lule, ajo që i bëri Lulzim Basha- Sali Berishës në raport me çfarë do i bëjë Erion Veliaj- Edi Ramës”. Por si do ia dalë Belindi me një PD të ndarë në disa grupime të bindë të fitojë Tiranën? “Duke dhënën shembullin tim personal. Unë jam i pari që jam hedhur në këtë betejë dhe kam sakrifikuar diçka nga vetja për një betejë për opozitën. Unë gjykoj që kjo do më shërbejë për t’u ulur me çdo faktor opozitar për të tejkaluar çdo pengesë, cdo hatërmbetje, për sa kohë kemi interes t’u kthejmë qytetin qytetarëve dhe të mposhtim modelin më të dështuar të Rilindjes dhe pengun e Edi Ramës si promovim politik që është Erion Veliaj, një model i deformuar dhe i rremë”. KËLLIÇI: VELIAJ MAKINERI LEKU, JA KU DO I GJEJ PARATË PËR FUSHATË Në një fushatë, shumë të rëndësishme janë paratë, ndaj e pyes Këlliçin se ku do i gjejë. Ai thotë se është duke studiuar me ekipin e tij ligjor të gjitha hapësirat që i lejon ligji për “found raising”, ngritjen e fondeve. “Erion Veliaj është makineri leku, por sesi i bëri këto para me rrogën e kryetarit e bashkisë, unë nuk e di. Unë do bëj një fushatë model, do i drejtohem qytetarëve të thjeshtë, bizneseve të vogla pse jo, për të ardhur e për të kontribuar duke ndjekur edhe shembullin në Amerikë. Në Amerikë donacione për fushatën Presidenciale mund të japë edhe një qytetar i thjeshtë me 5 dollarë, edhe një biznesmen që mund të japë 1 milionë dollarë. Përsa kohë janë brenda kuadrit ligjor dhe bëhej transparente, do krijojnë një frymë shumë të mirë besimi”. Çfarë do ndodhë nëse humb përballë Erion Veliajt? “Unë do jap gjithcka nga vetja ime, gjithçka nga kapaciteti im personal, mendor, fizik, emocional per ta fituar këtë betejë. E di që nuk është e lehtë, kam një makinë propagande, balte… e di se do shpifin ndaj meje, shumë baltë do hedhin drejt meje për të më barazuar me Erion Veliajn, por kam vendosur t’i qëndroj të vertëtës deri në fund”. Belind Këlliçi thotë se qytetarët do e votojnë sepse ai sjell një model ndryshe nga Erion Veliaj, çdo gjë e ka të fituar me votë, nuk është i financuar nga qarqe të ndryshme, nga organizata të huaja dhe nuk ka asnjë lidhje me organizata si Soros, por është i mbështetur te qytetarët e thjeshtë. Ai beson te e vërteta. “Për aq kohë sa je i vërtetë, dhe fle rehat në darkë, nuk ke mashtruar e gënjyer njeri, je i lirë edhe kur të anatemojnë, je i qetë sepse koha është ilaçi, e vërteta më e madhe. Besoj tek të qenurit, njëri i ndershëm, njeri normal. Këtë besoj, shoqëria jonë ka nevojë per për njerëz normalë, ka nevojë politika për politikanë normalë, ka nevojë media për analistë normalë, ka nevojë ky vend për kthimin në shinat e normalitetit”, thotë Belindi.

Belind Këlliçi: TIRANA që duam do fitohet nga zemra dhe shpirti i banorëve të vet!

Nga Anta Muçaku

Artikuj të ngjashëm Artikuj

Nano, beteja e një jete

“Nafta e Shpiragut, të gjithë po hanë çfarë zbuluam ne!”

Zonjat e “Prime Time”

Saga e dhimbjes e familjes MULLETI

LILI CINGU, KËMBËT QË VALLËZOJNË ENDE

Një “gjuetar goli” si Jasir Asani

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Tigri nxjerr dhëmbët, drejton gishtin drejt Veliajt

Gjiri i Kakomesë, “Bukuroshja” e braktisur bëhet gati për TURIZËM

MARK PALNIKAJ, INXHINIERI QË “ZHVARROS” ARKIVAT E VATIKANIT

Gratë që vunë përpara burrat

Inva Mula: Unë sopranoja e parë shqiptare në skenat evropiane

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Belind Këlliçi: TIRANA që duam do fitohet nga zemra dhe shpirti i banorëve të vet!

Nga Anta Muçaku

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?