Banaking – si vetë emri, histori me KOKAINË nga superprodhimi

Si e raportoi televizioni RAI operacionin për kapjen e drogws në Itali në 31 dhjetor 2021. Në Belgjikë dhe Hollandë autoritetet shqetësohen nga superprodhimi i Kokainës. Pse në Shqipëri kokaina vjen akoma me banane, kur në botë linjat po zhvendosen te piperi, fasulet apo farat e sojes?

“Banaking” nuk është thjesht një reklamë mediatike dhe një treg i ri në Shqipëri, “banaking”, apo si do që ta ketë emrin më vonë, është një detyrim tregu i një superprodhimi të kokainës gjatë vitit 2021 në Amerikën Latine. Sot mund të ulërasim se si droga vjen në Shqipëri, kaq hapur, pse arrestohen vetëm kamionistë, dhe mund të ulemi në tryezë, si një opinionist opozitar me idenë se si qeveria është kthyer në narkoqeveri. Por të dhënat tregojnë të kundërtën në të gjithë tregun europian dhe botëror. Në BE, nuk “fitoi” vetëm pandemia, fitoi gjatë gjithë 2021-it edhe kokaina. Ka vetëm një ndryshim, të gjithë shtetet e pranuan me rradhë në këtë fillim të vitit 2022, kuptohet në një mënyrë tepër të sofistikuar për të mos pranuar dështimin e plotë. Në Shqipëri, narkotrafiku është një çështje që u diskutua politikisht, me akuza dhe kundër akuza dhe asnjëherë gjatë këtij viti, dhe vitit tjetër, kësaj qeverie dhe qeverisë tjetër nuk ka për t’u pranuar kurrë se lufta ndaj drogës, dhe veçanërisht ndaj kokainës po humbet gjerësisht në botë. Shqipëria nuk është në gjendje të ngrejë strategji, strategjitë hartohen nga organe me dhjetra specialistë ndër më të mirët në botë, por Shqipëria mund të godasë kanabisin e mbjellë dhe ky është i vetmi instrument që e ka në dorë, kokaina nuk mund të preket, ajo s’është një histori “Banakingu”, Porti Durrësit, skaneri, apo kamionisti. Kokaina është vrulli më i madh në kohë pandemie, që nuk mund ta ndalë dot askush.