Arben Tafaj, Zemreku i orës tironse

Linda dhe fëmijët ende e kanë të vështirë të hapin derën e zyrës së tij. Brenda, mbi tryezën e punës, qëndrojnë të paprekura një mori dokumentesh, një kalendar takimesh, shënime, dhe një listë e gjatë emërore, ashtu siç i la ai, si për të ruajtur gjurmët e një shpirti që kishte ende shumë për të dhënë.

Sapo kishte dalë nga një sëmundje e rëndë, por me energjinë e një fituesi, iu rikthye punës me vendosmërinë për t’i çuar të gjitha deri në fund. Kishte planifikuar që, para mbarimit të këtij viti, të organizonte një festë të madhe për miqtë dhe bashkëpunëtorët e tij. Lista e gjatë e miqve, kolegëve dhe bashkëpunëtorëve, që ai do të ftonte, u mijëfishua kur ata, të tronditur dhe të mpirë, e përcollën drejt botës së përtejme.