Milionat pa kontroll të “AFTER SCHOOL”-ve

Edhe këtë vit nxënësit e arsimit 9-vjeçar në kryeqytet do të qëndrojnë vetëm 2 orë e 15 minuta në shkollë. Orari i reduktuar ka ardhur si pasojë e rregullave të diktuara nga pandemia e covid -19. Në këtë situatë, mijëra prindër në kryeqytet, zgjedhin t’i dërgojnë fëmijët në qendrat ditore të mësimit që njihen si “after school”(pas shkolle), një biznes privat që po njeh vetëm rritje. Alma, ka dy vajza. Njëra ndjek klasën e gjashtë dhe të voglën në klasë të dytë pranë shkollës “Dëshmorët e Lirisë”. “Fëmijët qëndrojnë 2 orë në shkollë dhe pjesën tjetër në shtëpi, por vajza e vogël nuk mund të qëndrojë e vetme në shtëpi deri në orën 5 kur kthehemi ne. Kështu që zgjidhja e vetme ishte ‘after school’”, – tregon Alma. Ajo rrëfen se edhe vajzën e parë gjatë klasës së parë dhe të dytë e ka dërguar në një afterschool, që ishte pranë një kopshti privat, por e pakënaqur me rezultatet, këtë herë provoi një tjetër.

Qendra mësimi pas shkolle është biznesi i ri që po lulëzon në kryeqytet. Me reduktimin e orarit mësimor prindërit janë detyruar të gjejnë zgjidhje alternative ku të lënë fëmijët gjatë orarit të punës. Por, pa kuadër ligjor dhe pa kontroll, këto biznese rrezikojnë të kthehen në një minë me sahat, ndërsa ekspertët apelojnë rishikim të ligjit për arsimin parauniversitar, me qëllim përfshirjen edhe të qendrave që ofrojnë mësim pas shkolle.