Letrat e diktatorit/ Nafta shqiptare, kur Enver Hoxha zbulonte “çerdhen e KGB-së”

Për naftën shqiptare ka pasur diskutime, debate dhe akuza për sabotime që në fillim të shekullit të 20. Historia nisi me mbretin Zog më pas me italianët pas pushtimit dhe më vonë, nën regjimin komunist, Enver Hoxha ka pasur ndërhyrje, debate dhe ndëshkime të forta me grupe armiqësore dhe inxhinierë të jashtëzakonshëm në burg, që punuan në këtë industri. Sot, kur kryeministri Edi Rama shpalos me sukses zbulimet e reja të Shellit në Shpirag, shqiptarët duhet të kujtojnë sesi e ka trajtuar pasurinë e nëntokës diktatori shqiptar, Enver Hoxha. Synimi i tij ishte manipulimi i popullit me informacione të rreme, dhe gjetja e armiqëve dhe grupeve armiqësore tek ata që ndihmonin për nxjerrjen e kësaj pasurie, në fillim me rusët, më vonë me inxhinierët që ishin kualifikuar në Moskë. A ka qenë vërtet kaq e pasur Shqipëria me arin e zi?

A ka ndonjë regjim në Shqipëri që nuk ka e kthyer në betejë nxjerrjen dhe shfrytëzimin e naftës në raport me të huajt? Kështu bëri Ahmet Zogu në vitet ‘20-‘30-të me anglezët dhe amerikanët. Kështu bënë qeveritë gjatë Luftës së Dytë Botërore nën pushtimin italian. Kështu bëri Enver Hoxha gjatë regjimit komunist me rusët dhe kështu po ndodh edhe pas rrëzimit të regjimit komunist e deri më sot. Por, duket se politikani që e ka patur kal beteje nxjerrjen e naftës gjatë gjithë pushtetit të tij ishte Enver Hoxha.