6,900 euro për paga gjyqtarësh! Kur Rama e Berisha ngrenë kartonin e kuq!

Në një vend ku pagat e çdo punonjësi, shtetëror apo privat, përbëjnë lajm, diskutimet për rrogat e gjyqtarëve përbëjnë një ‘superlajm’, ose, një strategji për të tërhequr vëmendjen nga shumëçka tjetër. Por një gjë e kemi të qartë. Kur në prillin e vitit 2021, pak ditë përpara zgjedhjeve parlamentare të 25 prillit atëvit, në rrjetet sociale e media u publikua pa frena database masive me të dhënat personale për rreth 660 mijë qytetarë, ku përfshihej emri, mbiemri, numri personal, vendi i punës, dhe paga mujore e gjithsecilit, gjithë vëmendja e kujtdo që ishte para një kompjuteri u përqëndrua aty, për të zbuluar, kush punonte ku, dhe sa e kishte pagën. Me muaj të tërë gazetarët publikuan rrogat, të majme ose jo, të kujtdo që kishte një post publik, ose privat, e që ishte i njohur për opinionin. Ndaj edhe këtë fillim viti, përballja institucionale pa frena që ka shkundur themelet e bashkëjetesës mes pushteteve në Shqipëri, e që ka të bëjë me kërkesën për rritjen e pagave të gjyqtarëve dhe prokurorëve, nuk ka kaluar pa vëmendje. Nisi si një kërkesë juridike në dyert e Gjykatës Kushtetuese, por brenda pak ditësh u shndërrua në një luftë të hapur verbale, ku etikimet si "histeri", "linçim" dhe "keqbesim" kanë zëvendësuar gjuhën e ftohtë administrative. Në këtë tymnajë epitetesh, nuk është bërë transparencë se sa në fakt paguhen sot gjyqtarët, sa kërkojnë të paguhen dhe si janë këto shifra në krahasim më rajonin dhe Bashkimin Evropian. Sa paguhen realisht sot gjyqtarët ? Newsbomb pyeti zyrtarisht Këshilli i Lartë Gjyqësor se sa është paga neto miminale dhe maksimale që merr sot një gjyqtar në shkallën e parë, në apel apo në gjykatën e posaçme. Shifrat zyrtare tregojnë se asnjë gjyqtar nuk paguhet 10 mijë euro, dhe kjo shifër nuk do të arrihet, as nëse kërkesa e tyre do të merrej parasysh. “Për funksionin e gjyqtarit në Gjykatën e Shkallës së Parë të Juridiksionit të Përgjithshëm dhe Gjykatën Administrative të Shkallës së Parë, paga neto minimale (me 0 vite vjetërsi në ushtrimin e funksionit të magjistratit), është në shumën 213,459 lekë (pas aplikimit të ndalesave nga paga bruto sipas legjislacionit në fuqi). Ndërsa, paga neto maksimale (me 25 vite vjetërsi në ushtrimin e funksionit të magjistratit), është në shumën 268,004 lekë”,- tha për Neësbomb qeveria e gjyqësorit, KLGj. Në vijim saktësohet se një gjyqari gjyqtarit në Gjykatën e Apelit të Juridiksionit të Përgjithshëm dhe Gjykatën Administrative e Apelit, i kalojnë në llogari në rastin më të ulët 237,459 lekë ose nëse ka maksimalisht 25 vite vjetërsi merr një pagë neto 276,731 lekë. Shifrat janë më të larta për gjyqtarët e posaçëm pranë, në shkallë të parë, dhe apel. “Për funksionin e gjyqtarit në Gjykatën e Posaçme shkalla e parë GJKKO, paga neto minimale (me 7 vite vjetërsi në ushtrimin e funksionit të magjistratit), është në shumën 410,256 lekë . Ndërsa, paga neto maksimale (me 25 vite vjetërsi në ushtrimin e funksionit të magjistratit), është në shumën 449,528 lekë . Ndërsa për funksionin e gjyqtarit në Gjykatën e Apelit KKO, paga neto minimale (me 10 vite vjetërsi në ushtrimin e funksionit të magjistratit), është në shumën 432,509 lekë dhe paga neto maksimale (me 25 vite vjetërsi në ushtrimin e funksionit të magjistratit), është në shumën 465,236 lekë ”,- informoi zyrtarisht KLGJ në përgjigje të një kërkese për informacion. Sa kërkojnë të paguhen në të vërtetë ? Nëse kërkesa e magjistratëve do të pranohet, dhe paga bazë nuk do të jetë 153 mijë lekë (36 % e pagës së Presidenti), por 231 mijë lekë (sa paga e një drejtori të përgjithshëm në kryeministri), do të thotë se paga finale që kalon në llogaritë e gjyqtarëve dhe prokurorëve, do të rritet me afro 50 përqind. Për gjyqtarët që shërbejnë në shkallën e parë të gjykatave të rretheve, paga aktuale luhatet mes 2,134 dhe 2,680 euro. Me rritjen e kërkuar, kufiri minimal kapërcen në 3,201 euro (një shtesë neto prej 1,067 euro), ndërsa kufiri maksimal shkon në 4,020 euro. Pra, vetëm rritja për këtë kategori është sa dy apo tre paga mesatare në administratën publike. Në nivelin e dytë të gjykimit, pagat që sot nisin nga 2,374 dhe arrijnë në 2,767 euro, parashikohet të pësojnë një rritje domethënëse. Minimumi i ri do të fiksohej në 3,561 euro, ndërsa tavani maksimal për një gjyqtar apeli do të shkonte në 4,150.5 euro, duke reflektuar një rritje konkrete prej rreth 1,383 euro mbi pagën ekzistuese. Në GJKKO, shifrat bëhen "ekstravagante", siç do t'i cilësonte Kryeministri. Gjyqtarët e Shkallës së Parë Kundër Korrupsionit dhe Krimit të Organizuar, të cilët aktualisht paguhen mes 4,102 dhe 4,495 euro, me formulën e re do të shihnin në llogaritë e tyre bankare shifra që variojnë nga 6,153 deri në 6,742.5 euro. Kjo përfaqëson një rritje neto prej mbi 2,000 eurosh në muaj për çdo magjistrat të këtij niveli. Në majën e kësaj strukture financiare qëndrojnë gjyqtarët e Apelit të GJKKO. Paga e tyre aktuale, e cila nis nga 4,325 dhe shkon në 4,652 euro, me rritjen prej 50% do të thyente çdo rekord të mëparshëm. Minimumi i tyre do të bëhej 6,487.5 euro, ndërsa maksimumi do të kapte vlerën prej 6,978 euro. Kjo rritje prej 2,326 eurosh vetëm për këtë kategori, është pikërisht ajo që Sali Berisha e quan "përmbysje të piramidës", pasi vendos pagën e një gjyqtari apeli shumë më lart se atë të Presidentit të Republikës apo të vetë Kryeministrit, duke e kthyer këtë trupë në elitën e padiskutueshme financiare të shtetit shqiptar. Megjithëkëtë, asnjë pagë nuk shkon 10 mije euro, siç kryeministri deklaronte. Funksioni Sa është Sa mund të bëhet Gjyqtar i shkallës së parë, J. përgjithshëm 2134 deri 2680 euro 3 201 € deri 4 020 € Gjyqtar apeli, J. përgjithshëm 2374 deri 2767 euro 3 561 € deri 4 150 € Gjyqtar GJKKO, shkalla e parë 4102 deri 4495 euro 6 153 € deri 6 742 € Gjyqtar GJKKO, apel 4325 deri 4652 euro 6 487 € deri 6 978 € Përballja e Ramës me magjistratët Debati u bë i nxehtë kur Kryeministri Edi Rama, në mënyrë sistematike, në një dalje publike që në ditët e para të vitit, shënjestroi drejtpërdrejt magjistratët që kishin kërkuar rritje page përmes shfuqizimit të disa neneve të ligjit të vitit 2023. Teksa vetë ishte mes dy zjarresh, dhe nuk i kishte dhënë përgjigje SPAK që kërkonte t’i arrestonte numrin dy të qeverisë, kryeministri vendosi të fajësojë në publik gjyqtarët. Me një ton që paralajmëronte stuhinë, Rama nuk kurseu as Gjykatën Kushtetuese, duke e vendosur atë përpara një përgjegjësie morale dhe kombëtare. "Unë shpresoj shumë që Gjykata Kushtetuese mos t’ia lërë këtë njollë të madhe turpi Shqipërisë dhe mos të na detyrojë të kërkojmë ilaçe të tjera," deklaroi Kryeministri, duke lënë të kuptohej se ekzekutivi nuk do të qëndronte duarkryq përballë një vendimi pro gjyqtarëve. Për Ramën, kjo lëvizje e magjistratëve ishte një akt absurd: "Do kuptojë shumë mirë sa absurde është kjo histori, me gjykatësit që duan t’i rrisin vetes pagat, vetë zot, vetë shkop" . Reagimi nuk vonoi. Shoqata Kombëtare e Gjyqtarëve, e drejtuar nga gjyqtari i GJKKO-së, Engert Pëllumbi, publikoi një deklaratë të gjatë, duke e cilësuar qëndrimin e kryeministrit si një "fushatë të spekulimeve publike" dhe "tymnajë populiste" . Në një narrativë që i ngjante një padie publike, Shoqata radhiti gjashtë momente të asaj që ata e quajtën "keqbesim" i shtetit shqiptar ndaj reformës. Sipas tyre, që nga viti 2016, qeveria ka ceduar qëllimisht nga standardet financiare, duke përdorur marifete ligjore për të mos paguar magjistratët sipas premtimit origjinal. "Ne nuk mund të heshtim përballë përbaltjes kryeministrore, publike, mediatike, tërësisht histerike, që synon të ndezë kundërshtitë në opinionin publik," shkruhej në deklaratën e Shoqatës. Gjyqtarët akuzuan ekzekutivin se po tenton ta shndërrojë një proces kushtetues në një "gjyq popullor" , duke përdorur si armë "populizmin, si armë e pafuqisë juridike dhe e fuqisë së përbaltjes" . I gjendur përballë një gjuhe që rrallëherë ka ardhur nga radhët e gjyqësorit, Edi Rama u rikthye në ekran, këtë herë edhe më i ashpër. Ai e cilësoi reagimin e shoqatës si një përpjekje për t'i "mbyllur gojën" dhe i ftoi gjyqtarët të linin mantelin e të hynin në garë politike. "Shoqata e gjyqtarëve shfaqet publikisht si një parti politike, me një gjuhë të papranueshme... 'Tymnajë populiste'?! Jeni parti politike? Regjistrohuni si parti politike, dilni në garë dhe mbroni platformën tuaj", ironizoi ai. Rama shkoi në zemër të debatit financiar, duke i ballafaquar gjyqtarët me shifrat që, sipas tij, rëndojnë mbi taksapaguesit. Ai akuzoi magjistratët se po luajnë një lojë ku arbitri do të shënojë vetë golin: "Një arbitër i cili thotë: bilbili është i imi, topi është i imi, penalltinë do ta gjuaj vetë dhe porta duhet të rrijë pa portier" . Kryeministri u ndal te pretendimi se mosrritja e pagës përbën "ulje": "Më shikoni mua të axhituar? Jam shumë i axhituar se 37 milionë euro që kërkoni ju plus nga buxheti i shtetit janë para që duhet të hiqen nga diku tjetër" . Ai e mbylli replikën me një paralajmërim për etikën e tyre: "Ju sugjeroj ta lini dhe të mos përfshiheni më se nuk i takon gjykatësve të prononcohen publikisht me terma të tilla që ju shkojnë partive më të vjetra dhe më të degraduara" . Kur dukej se debati ishte mes Ramës dhe gjyqtarëve, në skenë u shfaq Shoqata e Prokurorëve të Republikës së Shqipërisë. Përmes një qëndrimi zyrtar, ata u solidarizuan me kolegët e tyre, duke kërkuar që procesi në Gjykatën Kushtetuese të zhvillohet i pandikuar nga "presioni i jashtëm" dhe "instrumentalizimi i opinionit publik" . Prokurorët theksuan se çdo ndryshim ligjor që sjell ulje të pagave apo regres në standarde, përbën cenim të garancive kushtetuese. Ky "front i bashkuar" i magjistraturës duket se e irritoi edhe më shumë kreun e qeverisë. Kundërpërgjigja e Ramës ndaj prokurorëve ishte ndoshta më pikantja dhe më sulmuesja në të gjithë këtë sagë. Ai e cilësoi shoqatën e tyre si një strukturë "ende të paregjistruar" dhe talli logjikën e tyre mbi "uljen e pagave". "Pra, shqip, një pagë që s’më ngrihet sa ç’dua unë, është një pagë e ulur!!! Duket totalisht e pabesueshme, po është shumë fatkeqësisht e vërtetë!" shpërtheu Rama. Por, goditjen më të rëndë ai e rezervoi për performancën e prokurorisë, duke e zhvendosur debatin nga rrogat te drejtësia njerëzore. Ai i akuzoi ata për kthimin e arrestit me burg në rutinë dhe për njollosjen e Shqipërisë: "Po për shqelmimin e vazhdueshëm si askund në Europë të prezumimit të pafajësisë... që na ka renditur si dele të zezë në bisht të kontinentit europian... a keni ndonjë gjë për të deklaruar?!" pyeti ai me cinizëm, duke i vendosur prokurorët në pozitën e të akuzuarit përpara opinionit publik. Kjo kronikë e replikave tregon një krize të paprecedentë komunikimi mes pushteteve, të paktën që nga koha kur drejtësia e reformua. Në pritje të vendimit të Gjykatës Kushtetuese, atmosfera mbetet e tensionuar. gjë është e sigurt: në këtë përballje, "dinjiteti" dhe "buxheti" janë kthyer në dy koncepte që nuk po gjejnë dot një gjuhë të përbashkët. Edhe Berisha në krah të Ramës Në këtë skenë të tensionuar mes pushteteve, habit lideri i opozitës, Sali Berisha. Ndonëse sulmon ashpër menaxhimin e qeverisë, i jep të drejtë parimit se timoni i financave mbahet nga Ramës dhe pagat nuk mund të vendosen me vendim gjykate. Berisha e ka cilësuar strukturën e pagave si një përgjegjësi ekskluzive, duke deklaruar prerë: "Çështja e pagave dhe piramida e pagave janë e drejtë absolute ekskluzive për të gjithë shtetin dhe institucionet e tij e ekzekutivit." Për Berishën, debati nuk është thjesht teknik, por një dështim i hierarkisë shtetërore që ai e quan " piramidë ". Ai argumenton se ndërtimi i kësaj piramide pasqyron përparësitë e një kombi dhe se qeveria aktuale e ka shkelmuar këtë logjikë duke krijuar anomali absurde. "Shteti është i detyruar t’i qëndrojë hierarkisë. Dhe kjo hierarki përcakton rrogën më të lartë në republikën e Shqipërisë, Presidenti i Republikës," u shpreh ai, duke nënvizuar se përmbysja e këtij rregulli e ka kthyer shtetin në një " leckë ". Në analizën e tij, Berisha i jep të drejtë gjyqtarëve jo sepse ata duhet të caktojnë pagat e tyre, por sepse qeveria ka shkelur ligjet që vetë ka votuar. Ai godet fort pabarazinë mes prokurorëve të SPAK dhe institucioneve të tjera kushtetuese, duke e quajtur të pajustifikueshme që një prokuror special të paguhet dyfishi i një anëtari të Gjykatës Kushtetuese. " Prokurori i Përgjithshëm merr gjysmën e rrogës së një prokurori në SKAP. Shtet është ky?" pyeti ai me ironi. Megjithatë, mbështetja e tij për magjistratët vjen vetëm si pasojë e shkeljes së ligjit nga ana e Ramës. Sipas Berishës, është kryeministri ai që e ka futur vendin në këtë qorrsokak: "Ky e ka përmbysur piramidën. Ky është përgjegjësi kryesor. Hajde zgjidhe tani. Nuk luhet me piramidën e rrogave." Dueli 4 orësh në Kushteteuse Po çfarë kërkojnë në të vërtetë gjyqtarët dhe prokurorët në Kushtetuese? 3 marsin e vitit të kaluar Unioni i Gjyqtarëve kërkoi shfuqizimin e ndryshimeve ligjore që u bënë për pagën e tyre në vitin 2023 nga mazhoranca, e cila zbatoi përcaktoi se rroga bazë e magjistratëve do të ishte sa 36% e pagës së Presidentit, pra 153 mijë lekë. Më herët, referenca mbi të cilën llogaritej rroga ishte 132 100, aq sa ishte paga e drejtorit të departamentit në Kryeministri. Pra me ndryshimin e ligjit nga qeveria, rritja ishte me mbi 200 euro. Por kjo rritje u konsiderua si ulje nga ana e gjyqtarëve. Kjo për shkak se në të njëjtën kohë, qeveria rriti pagat për administratën publike. Dhe paga e drejtorit të departamentit në Kryeministri u rrit në 231 mijë lekë të reja. Pra gjyqtarët thonë se ndryshimi i referencës së pagës së tyre nga ajo e drejtorit të departamentit në Kryeministri te ajo sa 36% e pagës së Presidentit, ua ka ulur pagën se nëse s’do bëhej ky ndryshim ajo do të ishte 780 euro. Për këtë arsye gjyqtarët kërkojnë nga Kushtetuesja ose rikthim në referencën e parë ku paga bazë e magjistratit ishte sa e drejtorit të përgjithshëm në Kryeministri, ose një përcaktim sa 54.5% e pagës së Presidentit. Në një seancë maratonë që zgjati rreth 4 orë në datën 20 janar, Gjykata Kushtetuese u shndërrua në arenën e një përplasjeje mes pushtetit gjyqësor dhe ekzekutivit. Debati u fokusua në ligjin nr. 33/2023, i cili ndryshoi formulën e pagave të magjistratëve, duke i lidhur ato me një koeficient prej 0.36 të pagës së Presidentit. Unioni i Gjyqtarëve dhe Shoqata Kombëtare e Gjyqtarëve, e cilësuan ligjin e vitit 2023 si një "qëndrim sistemik negativ " dhe " regres normativ ". Gjyqtari Genti Dokollari, duke përfaqësuar Unionin, pranoi hapur taktizimin e kohës së dorëzimit të padisë për të shmangur presionin politik: "dhe ne të zgjuar jemi të presim një moment të përshtatshëm kur përgatiteshin zgjedhjet e tjera... që të paktën qeveria nuk duhet të kishte kohë që të merrej me ne, apo me ju". Një pikë e nxehtë e debatit ishte pretendimi i qeverisë se pranimi i kërkesës do t'i kushtonte buxhetit të shtetit 37 milionë euro. Gjyqtari Sokol Pina, duke iu kundërpërgjigjur këtij argumenti, theksoi se vetë sistemi prodhon më shumë se sa kërkon: " vlerat e konfiskuara në vitet 2023 dhe 2024 vetëm nga Gjykatat e Posaçme (SPAK)... e tejkalojnë atë rritjen prej 37 milion eurosh që parashikon rritja". Gjyqtari i GJKKO-së, Erjon Bani, shpjegoi pabarazinë e krijuar nga ligji i ri, duke vënë në dukje ngrirjen e pagave të magjistratëve në raport me administratën. Bani argumentoi se neni 138 i Kushtetutës nuk mbron vetëm vlerën matematike, por statusin relativ: "interpretimi konkret duhet bërë në frymën e parashikimit... nuk mbulon vetëm pakësimin e pagës në aspektin matematik aritmetik, por edhe standartet që lidhen me pagën". Nga ana tjetër, Kuvendi dhe Këshilli i Ministrave mbrojtën ligjin duke thënë se këto vendime për pagat i jep vetëm qeveria dhe parlamenti. Përfaqësuesit e shtetit argumentuan se Kushtetuta garanton vetëm mbrojtje nga ulja, jo detyrim për rritje progresive: "Neni 138 i Kushtetutës nuk garanton një zhvillim progresiv të pagës... por një garanci negative që ndalon uljen e saj". Seanca u mbyll me tërheqjen e trupit gjykues për vendim, ndërkohë që KLGJ u rreshtua krah kërkuesve, duke deklaruar se ndryshimi i formulës cënon besimin e gjyqtarëve te stabiliteti i të drejtave të tyre Ekspertët kundër kryeministrit Përballë rrebeshit verbal mes Qeverisë dhe Magjistraturës, zërat e ekspertëve të pavarur po tentojnë të rikthejnë debatin në shinat e ligjit, duke zhveshur retorikën politike nga petku i populizmit. Juristi Ledio Braho dhe aktivisti Gerti Shella, monitorues prej vitesh i sistemit të drejtësisë përmes organizatës InfoCip, e shohin përplasjen jo si një luftë për para, por si një krizë të sigurisë juridike dhe etikës institucionale. Për avokatin Ledio Braho, pretendimi i Kryeministrit se gjyqtarët po veprojnë " tinëz " është jo vetëm i pavend, por një përmbysje e realitetit. Braho zbulon një " artificë " teknike që, sipas tij, dëshmon se kush ka luajtur vërtet në hije. Ai shpjegon se ndërkohë që qeveria rriti pagat e administratës, ajo ndryshoi me nxitim referencën e pagës së magjistratëve për të shmangur rritjen e tyre automatike. "Nëse ka aktorë që janë sjellë 'tinëz', ata janë pushteti ekzekutiv dhe ai legjislativ", thotë Braho, duke shtuar se qeveria shmangu rritjen e pagave të gjyqtarëve përmes cënimit të parimit të sigurisë juridike. Sa i përket sulmit të Ramës, avokati është i prerë: "Një qasje e tillë nuk është normale... gjuha e përdorur krijon një perceptim publik sikur pushteti gjyqësor po synon një puç kushtetues". Nga ana tjetër, Gerti Shella, drejtues i InfoCip e zhvendos vëmendjen te menaxhimi i buxhetit dhe realiteti i vështirë i gjykatave. Ai e cilëson të " qortueshme " ndërhyrjen e qeverisë në një kohë kur Gjykata Kushtetuese është tërhequr për vendim. Shella vë në dukje një paradoks: qeveria shqetësohet për koston e një grupi të vogël magjistratësh, ndërkohë që ka fryrë administratën në nivele të frikshme. "Shqipëria është një vend me popullsi të përgjysmuar, por me një administratë që është dyfishuar", -deklaron Shella, duke vënë në dukje se ndërmarrjet e ujësjellësve dhe pastrimit janë të tejmbushura me punonjës partiakë. Për të, pretendimi për " paga ekstravagante " bie përballë rritjes galopante të çmimeve: "Sot, një pagë neto prej 2 deri në 3 milionë lekësh është bërë e pamjaftueshme... magjistratët mbajnë dy deri në trefish më shumë ngarkesë pune". Të dy vëzhguesit e pavarur të kësaj situate, bashkohen në një pikë: rritja e pagave nuk është një dhuratë, por një detyrim kushtetues për të garantuar integritetin e sistemit. Braho kujton se paketa e vitit 2016 synonte një "skemë reale dhe dinjitoze" për t'i mbrojtur gjyqtarët nga presionet. Ndërsa Shella e mbyll me një mesazh që godet thelbin e debatit mbi pavarësinë: rritja e pagave nuk duhet parë si ryshfet ligjor për besnikëri, por si "garanci për punë të denjë".

6,900 euro për paga gjyqtarësh! Kur Rama e Berisha ngrenë kartonin e kuq!

Esiona Konomi

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

PROTESTA E MEMEVE TË TALLESH NË ZGRIPIN E PAMUNDËSISË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

6,900 euro për paga gjyqtarësh! Kur Rama e Berisha ngrenë kartonin e kuq!

Esiona Konomi

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?