50 vite si Mjeshtra të Parodisë… jo vetëm në Vlorë

Arti i katër parodistëve fshihej më tepër nën “stofin” e melodive më të njohura të kohës së tyre, duke ndërtuar tekstet në përmbajtje e duke goditur më shumë dhe me lezet veset në karakteret e njerëzve, të cilat ndërkohë ishin edhe në shënjestrën e goditjeve partiake, si mbeturina mikroborgjeze e borgjeze. Gjithçka e bërë dhe e interpretuar me guxim e talent bashkë, si tipare të ashtuquajtura “huaja”.

Ata janë katër, Agron Hamo, Afrim Agalliu, Mane Lumani dhe Muhamet Liko. Kushdo që i ka parë në skenë që në fillimet e tyre, patjetër ka menduar se janë si vëllezër të lindur njëri pas tjetrit, ose sikur vetë zoti i ka krijuar për të qenë të bashkuar. Një katërshe me misionin e të bërit shaka përmes aktrimit muzikor, për të fshikulluar veset tona e që ne poshtë në sallë, të lotojmë nga kënaqësia e tepërt dhe të na mbeten ata në mëndje e në shpirt për më shumë se 50 vite, pa u zvetënuar aspak.

Ata u bënë mjeshtra si interpretues të gjinisë së estradës, të vodevileve e muzikë – holleve moderne dhe i operetave gazmore të të gjitha kohërave, niveleve dhe gjinive të saj. Të katër, të lindur si PARODISTË, si talente të ardhur, jo nga shkolla e lartë e aktrimit, po nga ndërmarrjet ekonomike të qytetit, pra nga Lëvizja amatore e teatrit, e profilizuar në gjininë e humorit dhe të satirës, nga vetë jeta e gjallë e banorëve të Vlorës.

Parodia është art, një gjini e ashtuquajtur “e vogël” që shpreh një art të madh e virtuoz, sepse, jo të gjithë aktorët mund ta përballojnë dhe ta interpretojnë me lehtësi e sens gëzimi komunikativ me publikun, me shijet, hallet e veset e tij… Parodistët  e kupletistët si të tillë, janë aktorët që vijnë nga e antikiteti mijëravjeçar i Teatrit Grek, me maska e të veshur me lëkurë kafshësh të egra, që rrëfenin me të kënduar, me “viza të trasha”, me këngë e gjestikulime komike përmbajtjen e shfaqjes, para se të dilte në avanskenë aktori i dytë dhe i tretë e për t’i hapur udhë edhe korit, i përbërë edhe ai prej artistësh që e thoshin tekstin nëpërmjet melodisë, shoqëruar me instrumentet e lashtësisë, me brirë kafshësh të kthyera në instrumente muzikor.