“3-B” shpk, firma që mori peng Opozitën

Të përçarë në disa grupime, me sherre më shumë mes vedit sesa me kundërshtarin politik; pa strategji, pa bosht, një palë me një kryetar në arrest shtëpie, pala tjetër me një kryetar “në gjumë”, e disa palë të tjera me axhenda personale. Pak a shumë kështu mund të përkufizohet gjendja aktuale e opozitës më të madhe në vend e marr sot peng nga firma më e re politike: “3B shpk”. Tentativat për bashkim e ribashkim, janë tani përpjekje titanike sikur të kalosh Rubikonin, pa asnjë habi për atë që e pret opozitën në vazhdim. Grupet e përçara nuk gjejnë paqe ndër vete; e më keq akoma me njëri tjetrin. Nuk ka më asnjë simbiozë që do t’i çojë drejt të njëjtit qëllim. Po përpiqemi të sjellim një analizë të ngjarjeve në opozitë, PD apo Rithemelim apo ata pa emër, për të kuptuar se kush do t’i përfaqësojë shqiptarët e pakënaqur nga qeverisja e Edi Ramës. Ka pak gjasa të ndodhë që opozita e çoroditur, pa vulë, pa logo, pa sigël, pa flamur, të ngrejë një fushatë e platformë për zgjedhjet e 2025. Edhe nëse e bëjnë, do të jetë një program elektoral e organizativ i vonuar, ndërkohë që kundërshtari politik në qeverisje, ka kohë që ka ndezur motorrët. Në përpjekje të vagullta për të mbajtur gjallë shpresën e opozitarëve, eksponentët kryesorë të saj, konsiderojnë fitore, çdo lëshim që u bëhet nga mazhoranca. Më keq, nuk ka ku të vejë. Ndoshta pas disa viteve, do të duket drita në fund të tynelit…por jo tani herët.

Kalimi i valës së parë të habisë që solli afrimi i Gazment Bardhit me Sali Berishën zgjati jo pak. U deshën më shumë se tre ditë për këtë çudi. Zbutja e diferencave dhe e tensionit, nisi me përputhje qëndrimesh e aktesh në Parlament në sezonin e vjeshtës së vitit të kaluar, dhe kulmoi me mbledhje të përbashkëta grupi. Çdokush që e pati mundësinë, solli në kujtesë, madje edhe e ballafaqoi kreun e grupit demokrat, me deklaratat dhe qendrimet anti-Berishë, që ai ka mbajtur. Nga më të fortat e nga më radikalet.