2025, Investime pa njerëz

Pensionistët ishin në qendër të fjalimit të kryeministrit për buxhetin 2025, por sërish nuk programohet rritje pensionesh. Investimet publike arrijnë një rekord historik prej 6.2% të prodhimit kombëtar, duke u fokusuar te nxitja e sektorit privat dhe tregut të punës. Ndërkohë, stimulimi i konsumit dhe qasja sociale mbeten në plan të dytë. Si do të ndahen paratë e shqiptarëve në buxhetin e vitit 2025? Një panoramë e plotë me një tablo të qartë.

Në sallën e Kuvendit, zhurma e debatit për buxhetin e vitit 2025 mbulonte çdo përpjekje për të dëgjuar atë që vërtet kishte rëndësi. Një fjalim që nisi me premtime dhe përkushtime për më të moshuarit, pensionistët e këtij vendi që jetojnë me të ardhura të munguar dhe pritshmëri të ulëta. Heshtja pllakosi dhe atë ditë kuvendi duke i vënë kapakun mosrritjes së pensioneve. Pavarësisht vëmendjes mediatike dhe retorikës së zjarrtë, mesazhi kryesor u duk i qartë si drita në fund të tunelit: 2025 nuk do të jetë viti i tyre.

Por, ky nuk është fundi i tregimit. Kjo është nisja e një rrëfimi që me siguri nuk do të ketë kurrë një mbyllje. Ajo që mbeti pezull në ajër ishte premtimi i madh i qeverisë: një rekord historik në investime publike, që do të kapin për herë të parë 6.2% të prodhimit kombëtar. Një bast i guximshëm që tingëllon si një plan i menduar mirë për zhvillimin e vendit, por që, në të njëjtën kohë, duket se zhvendos fokusin nga shporta e konsumit dhe fuqizimi social drejt një modeli ekonomik më të ftohtë e të orientuar nga tregu.