“SHEFI” dhe “GAZETARI” dashuria që u kthye në urrejtje

“Ishte një mësues i arteve marciale dhe kishte një nxënës që e donte fort dhe e mësonte. Me kalimin e kohës, nxënësit i hipi vetja në qejf dhe e sfidoi. U vendos data kur do bëhej mundja në qendër të qytetit. Pati shumë njerëz. Djali ishte i ri dhe mësuesi me vitet e duhura mbi supe. Gara dukej të ishte e fortë, por… Djali dukej se do të fitonte, por në momentin e fundit, mësuesi përdori një teknikë dhe e la në tokë. Djali s’e priste sepse nuk e kishte parë asnjëherë këtë teknikë. Dhe mësuesi i tha: “Kjo është teknika ime. E kam krijuar vetë kur isha në moshën tënde. Nuk fiton forca. Fiton mendja dhe eksperienca. Merre dhe këtë mësim të fundit nga unë”. Kjo është historia klasike se si “nxënësi” përpiqet të zërë vendin e profesorit. Një jetë i frymëzuar nga Armand Duka, Dritan Shakohoxha tashmë synon poltronin e drejtuesit të institucionit të futbollit shqiptar. Një dishepull që tradhëton profetin ka gjithmonë një fund me pendesë.

SHAKOHOXHA, presidenti DUKA e futi në botën e sportit

Kishte mbërritur me sforco deri në atë stad të jetës dhe fati e donte që në rrugëtimin e tij, djali ambicioz të njihej me biznesmenin e suksesshëm. Ishte pikërisht ai, Armand Duka që askush s’e njihte fillimisht për pasionin e tij të madh për futbollin. Por, më vonë do të zgjidhej në krye të Federatës Shqiptare të Futbollit. Me njohjet e veta e përkrahu Shakon t’i përkushtohej gazetarisë sportive. Talentin e kishte në të folur. Megjithatë me këmbënguljen e presidentit, arriti të futej në linjën e sportit shqiptar. Asesi, Duka s’e kishte menduar që nëse do t’i jepte “krahun”, një ditë do të tentonte t’ia merrte. Jeta e kishte sprovuar shumë herë, por asesi s’e kishte menduar se një ditë personi për të cilin kishte investuar më shumë se kushdo tjetër, t’i dilte kundër.