Zëri që s’plaket, Irma Libohova rrëfen jetën si një këngë

E dashur për publikun, me një energji që duket se merr tjetër fuqi sa herë ajo ngjitet në skenë, shumë këngë hite dhe 60 vite në skenë, ose më shumë se një jetë. Këngëtarja imcake me buzëqeshjen e madhe dhe një stil të pangatërrueshëm me të tjerat.  Irma Libohova, e cila ashtu siç këndonte dikur “Zgjodha Njerinë” ka zgjedhur me vetëdije të plotë që karrierën e saj ta vijonte në vendin e vet.

“Nuk e kam me duar kurrë emigrimin, sepse sa herë kthehesha nga jashtë, ndjesia e vendit tim, e kthimit në shtëpi ishte shumë e fortë”, shprehet ajo në intervistën për Newsbomb. Irma rrëfen me një qetësi e butësi, që e fiton vetëm kush ka jetuar çdo etapë të jetës me dashuri për artin, për familjen, për njerëzit. Sot, Irma është në një stad që e quan të shenjtë, nënë, gjyshe, artiste që vijon të ngjitet në skenë me të njëjtën energji si dikur, me bindjen se “derisa të ketë kthjelltësinë e mendjes dhe zërin që nuk ma merr dot njeri, do të jem aty për publikun tim”.