Vodhën arin e shqiptarëve për të bërë dhëmbë floriri

21 majin e vitit 1994 zhvillohej gjyqi i Ramiz Alisë. Jo vetëm i Ramiz Alisë, por edhe procese të tjera, që sot i njohin si gjyqet e nomenklaturës. Si u dënua Ramiz Alia për shpërdorim detyre, sa u dënua dhe si i shpëtoi burgut për një kohë të shkurtër. Vendimet që u zbardhën pas 3 dekadash

Pranverën e vitit 1994 dhjetë të pandehur që për disa dekada mbanin postet më të larta të qeverisjes së vendit dolën në gjyq. Mes tyre edhe Ramiz Alia, ai që ishte trashëgimtari i nënkuptuar i diktatorit gjatë perëndimit të këtij të fundit. Gjakftohtë dhe me një zë tejet të të qetë, Ramiz Alia që nuk pranoi asnjëherë që dikush t’ia shkruante fjalimet, u bë jo rastësisht një nga njerëzit më me pushtet në Shqipëri. Ramiz Alia ishte ndër të rrallët politikanë që jetoi tre epoka në Shqipëri: atë të Luftës Antifashiste si partizan, atë të Sistemit komunist ku mbajti disa role politike e deri në udhëheqës, si dhe atë të demokracisë, si President i parë pluralist i vendit. Por, ndërsa rolet i tij si partizan në luftë dhe si presidenti i parë i Shqipërisë zgjatën pak, nuk mund ta themi këtë për lidhjen e tij me komunizmin dhe diktatorin Hoxha, sepse për 40 vite me radhë, Ramiz Alia do të ishte në krah të Enver Hoxhës. Të tjerë para tij e provuan të ishin në krah të diktatorit, por fatet e tyre nuk ishin të njëjtat. Ai ishte ndër të paktët bashkëpunëtorë që nuk u dënua nga vetë diktatori. Alia, jo vetëm ishte më i besuari dhe i mbijetoi intrigave të kupolës, por për gjashtë vite ishte dhe pasuesi i Hoxhës. Pas vdekjes së Enver Hoxhës, më 11 prill 1985, Ramiz Alia u betua se do e mbante sistemin komunist përjetë. Në fakt, ai e udhëhoqi komunizmin vetëm për 5 vite 11 muaj e 22 ditë, deri në dorëheqjen e tij, më 3 prill të vitit 1991. Ajo që ndodhi pas 3 prillit të vitit 1991 është një histori po aq intriguese, një histori që fillon me rënien e bustit të diktatorit. Gjyqi ndaj tij tanimë është një ndër ato të ngjarje që pas tre dekadash mundet edhe ta bëjmë publike pa frikën, që dikur kaplonte shqiptarët në diktaturë.