Sokol Ngresi, gjyqtari që mohoi shtëpinë në Vlorë për t’i shpëtuar Vetting-ut

Nga ato historitë e padëgjuara më parë: Gjyqtari Sokol Ngresi në 2014 firmos me mikun e tij biznesmen Flamur Kadëna një kontratë për të blerë shtëpi në Lungomare me 600 euro metrin katror. Por këtë pasuri nuk e deklaron në vetting. Kur shtëpia i zbulohet, ai mohon gjithçka madje akuzon mikun e vet biznesmen se i ka falsifikuar firmën duke i dhënë shtëpi me zor. Këtu nis një kalvar i pafundëm përplasjesh, miqësish, deri tek anëtarët e Kolegjit të Posaçëm të Apelimit që i japin të drejtë Ngresit dhe e lënë gjyqtar. Por hetimet vazhdojnë…

Me atë nënqeshjen e zakonshme në fytyrë, mori çantën dhe u nis të ndante lajmin që priste me miqtë e vet. Komisioni i Pavarur i Kualifikimit nuk do t’ia prishte terezinë duke e konfirmuar në detyrë. Sokol Ngresi i Vlorës e dinte mirë se do t’ia hidhte, edhe pse nuk kishte menduar atë që do t’i vinte më vonë. Mendonte se kishte eksperiencën e duhur të përballonte çdo stuhi në shtetin shqiptar, por jo atë që do t’i rezervonte biznesmeni Flamur Kadëna.