SARANDA, Parajsa mbi supet e Shqipërisë

Eh kush nuk e do Sarandën tek e sheh nga deti, apo kur i zbret tejposhtë për tu futur në rrugicat e saj, mes lules së qytetit, Bungoviles, e tek kalldrëmet e shkallaret që po rindërtohen. Sarandën e duan të gjithë ta shohin në dimër, e duan në verë…sarandiotët e preferojnë në pranverë, atëherë kur ngrenë qepenat, lyejnë me gëlqere pemët, ata që kanë shtëpi private pastrojnë avllitë, ndërsa ata që kanë apartamente fillojnë të rregullojnë ambientet përreth. Për të pritur turistët që këtë vit do të vërshojnë si një lum pa dredha për tu derdhur të gjithë në ujrat e Jonit, ku si kryefjalë do të jetë plazhi i Pasqyrave, ai që mori edhe kurorën e artë të ujrave më të kaltër në botë. Është Saranda e çudive dhe mrekullive, dhe do të vijë në këtë reportazh rrëfyer nga kryebashkiaku, por edhe nga tur operatorët, e gazetarët e vet, që tregojnë nga ato ngjarjet e besueshme, tek ato më të pabesueshmet. Me dashurinë për të bukurën dhe magjinë që të përshfaq në orët që jeton me të. Në këtë qytet, asgjë nuk është aparencë, shpirti i njeriut jeton me qytetin dhe me vlerat shpirtërore të tij. Një spektakël që ngjall kënaqësi, një qytet që qëndron mbi njerëzit, si një Zot dhe një fuqi që njerëzit i nënshtrohen me dëshirë.

Saranda është një ndër destinacionet më të bukura të Rivierës Shqiptare, e cila vitet e fundit po kryeson statistikat me një numër gjithnjë e në rritje të fluksit të vizitorëve dhe turistëve vendas dhe të huaj. Në Sarandë çdo gjë është mrekullore. Porta e parë prej nga ka hyrë turizmi modern në Shqipëri. Nga Kalaja e Lëkursit, ajo ngjan si një amfiteatër gjigand buzë Jonit. Qëndron hijerëndë aty larg, fare në Jug. Larg dhe afër. Afër dhe larg. Aq larg duket, sidomos sa herë nuk gjen akomodim për të pushuar dy javë aty. Aq afër sa mund të kapësh me dorë valët e Jonit, velat e jahteve dhe lulet me ngjyra lejlaje të bugonvilave unike që kacavjeren fasadave të saj.