RITA PETRO, shkrimtarja që e beson ZOTIN si një POETE

Njerëzit e lirë kanë një aftësi të jashtëzakonshme për ta shpjeguar jetën thjeshtë, për ta përçuar thelbin e saj me fjalë që nuk e humbin kuptimin e tyre, fjalë që as nuk tjetërsohen dhe as nuk keqkuptohen. Sigurisht kjo nga ata që duan të dëgjojnë, të kuptojnë dhe që duan të zbulojnë dimensionet e fshehta që jeta, ekzistenca jonë tokësore rezervon. Dëshira për të kuptuar, ndoshta është themeli i çdo lirie, i çdo mendje të hapur. Rita Petro është një nga gratë e guximshme në letra, një guxim i refelektuar nga pasioni për të jetuar jetën e saj, ashtu siç ajo ka dashur. Një sfidë e cila, pavarësisht kohës, zhvillimit, mbetet sërish sfida më e madhe jo vetëm për shumë gra shqiptare sot, por në tërësi për individin e shoqërisë shqiptare. Një shoqëri, e cila vuan keqkuptime të mëdha për lirinë, për dashurinë, për mirënjohjen, madje edhe për ata që mes të gjithave sfidave ia kanë dalë mbanë, që kanë arritur të jenë të suksesshëm. Rita, në diskursin publik shpesh ka qenë një Sizif për guximin e mbajtur mbi shpinë, ama ka qenë barra, që pas kaq vitesh ndoshta ka çliruar jo atë personalisht, por shumë të tjerë dhe të tjera. Me të nuk ka biseda të ndaluara, ka vetëm kërkim për të arritur më të mirën, për ta jetuar dashurinë, sidomos atë për veten dhe për ta ushqyer atë tek çdokush që ka uri.