Qeveria 4.0

Një fitore e madhe, pa shumë sforco e plot zhurmë. Me 83 mandate dhe një brez të ri deputetësh që hyjnë në skenë, Partia Socialiste nis mandatin e katërt më e sigurtë se kurrë. Por, pas qetësisë së këtij rezultati fshihet një pyetje e zakonshme: çfarë e pret qeverisjen, kur nuk ka më as justifikime dhe as kundërshtarë të fortë përballë?

Nga malet e Kuçit në rrugën drejt një mazhorance absolute, Edi Rama nuk i dha thjeshtë Partisë Socialiste një fitore, por një dominim të plotë. Në një klimë të mirëmenaxhuar elektorale, me një opozitë të përçarë dhe një fushatë që ngjante më shumë me administrim të fitores sesa me përpjekje për bindje, PS-ja u ngjit në majën e saj historike: 83 mandate, një shifër që i jep jo vetëm pushtet, por edhe luksin e pavarësisë.

Nga larg, zgjedhjet e 11 majit ngjanin si një garë tjetër politike në Shqipëri. Një përballje mes Partisë Socialiste dhe Partisë Demokratike, mes një mazhorance që kërkonte mandatin e tretë të plotë dhe një opozite që përpiqej të ringrihej nga rrënojat e viteve të fundit. Por, më afër, kjo nuk ishte garë. U shndërrua në një konfirmim të një realiteti politik që ka marrë formën e një monokulture.