PD-ja e vulës, degradimi i fundit i demokratëve pa elektorat

Mbledhja e kryesisë së formacionit zyrtar të PD-së që njihet me ligj e në gjykatë, ishte akti i fundi i lavdisë së kësaj partie, pasi u pa qartë se më shumë se sa shfaqja, fasada e përbetimi për parime euroatlantike, aty, ka rëndësi vula dhe kush merr postin e kryetarit. Dhe në këtë fushatë, si gjithnjë, nuk mungon as fyerja, kërcënimi, damkosja, linçimi, dhuna apo përjashtimi, i atyre që mendojnë ndryshe. PD zyrtare nuk ka tanimë as vlera, pasi zgjedhjet e 14 majit treguan se nuk ka as elektorat

E marta e 6 qershorit nuk ishte shumë e shenjtë për politikën në Tiranë. Orët e pasdites u dominuan nga lajmi i arrestimit të Vangjush Dakos, një prej aktorëve më të rëndësishëm të politikës në vend, edhe pse me profil të ulët në publik. Kryebashkiak i Durrësit për 3 mandate, një prej miqve të afërt të Ramës, përfundoi në qeli. Atë ditë, pakkush mund të mendonte se kjo ngjarje do të konkurohej me një tjetër më të madhe, e që tërheq më shumë vemendjen. Po ja që pikërisht në minutat kur gjithë ekranet dhe sytë e konsumatorëve të lajmeve ishin drejtuar nga drejtoria e Policisë së Tiranës për të marrë vesh detaje nga këto pranga të bujshme, në një godinë përballë kryesisë së Kuvendit, nisi mbledhja e kryesisë së PD zyrtare, ose e vulës, siç njihet në zhargonin mediatik, nga ku më tej doli më shumë tym se sa prej paraburgimit vip.