Një minoritet i braktisur rreth Buretos në Përmet

Tre fshatra, Psiotera, Vllaho dhe Biovizhda gjenden në thellësi të qytetit të bukur të Përmetit. Por ndërsa mbajnë statusin minoritar që nga koha e regjimit komunist, këtë e kanë vec në dokumenta, por jo në trajtim. Në zonë, vetëm në disa prej shtëpive frymojnë njerëz dhe këto shtëpi numërohen me gishtat e dorës. Pleqtë e mbetur në zonë, edhe pse kanë vitet e moshës në kurriz, janë të aftë të përballojnë ato pak punë të përditshme. Por ankohen shumë. Nuk kanë rrugë. Nuk kanë as sinjal televizori. Duan të marrin informacione se c’ndodh rreth tyre por është krejt e pamundur. Mandej bëhen nostalgjik. Thonë se në kohën e qoftëlargut, kishin shkollë ku mësohej në tre gjuhë, në shqip, greqisht e italisht. Sot s’u ka mbetur këmbë robi të shkëmbejnë qoftë edhe dy llafe. Thonë se më parë i vizitonte edhe ndonjë konsull grek. Nxirrte bllokun e mbante shënime. Por i vetmi që ka kontribuar për ta me lekët e xhepit është ish-deputeti socialist Vladimir Kosta. Askush tjetër nuk kujtohet për ta. Shtëpitë i kanë shumë të bukura, dy a tri katëshe. Por vuajnë për pak jetë. Për zëra bebesh e fëmijësh që zor se mund të dëgjohen edhe për shumë vite të tjera në vazhdim.