Një bebe merr SIDA në spital, prindërit tentuan vetëvrasjen

Kanë 16 muaj me lot në sy që dy prindër të rinj, ajo 28 vjeç dhe ai 34 vjeç u bënë prindër të një djali në maternitetin e Tiranës. Por vetëm 5 muaj pas lindjes së djalit, dhe ecejakeve në Tiranë për shkak se i vogli lindi “i brishtë”, prindërit zbuluan se fëmija ka virusin HIV/AIDS. Iu përmbys bota, donin të vrisnin veten. Pas ‘shok”-ut të parë të tronditjes, filluan të kërkonin arsyet se pse kishte ndodhur një gjë e tillë. Kërkonin arsye, raporte… institucionet heshtnin. Iu drejtuan prokurorisë por kjo e fundit u tha se nuk kishin prova. E ç’prova të paraqisnin? A kishte provë më të madhe sesa fëmija e tyre sëmurë me AIDS ndërkohë që ata si prindër ishin të shëndetshëm? Derisa në nëntor, një gjyqtare me zemër në dorë, filloi nisjen e hetimeve. Të gjitha këto, janë të shkruara në një dosje voluminoze me dokumente e mjekime e analiza që presin drejtësi. I kujt është faji?

Ishte një mëngjes mbushur me re ai i 8 dhjetorit 2021 që Franci dhe Alberta u bënë prindër për herë të parë në maternitetin “Mbretëresha Geraldinë” në Tiranë. Gëzimi i madh i dy prindërve 34 dhe 28 vjeçarë që nuk u lanë kohë mjekëve të vendosnin ndonjë numër në dorën e fëmijës. Siç ata e kishin vendosur dhe imagjinuar më parë, e quajtën Eden si Kopshti i Edenit, që përdoret shpesh si sinonim për fjalën Parajsë. Që fillimisht i referohet një kopshti të bukur e të përhapur në Bibël, një vendi të pastër e shumë natyror.