Myfarete Laze, rrëfim për një kohë të ndaluar

Myfarete Laze është shkodrania që i ka përjetuar të gjitha, nga zbritja nga autobuzi në kohën e diktaturës për të mos u lejuar të udhëtojë jashtë vendit, tek suksesi në skenë dhe në vende të hapura mes publikut që e admiron për zërin e saj karakteristik. Miqtë dhe familja e kanë mbështetur pafund në rrugëtimin e saj që ka pasur jo pak ulje-ngritje. Por ajo që nuk ka ndryshuar asnjëherë tek kjo zonjë e skenës, ka qenë zëri dhe pasioni i saj për këngën. Të cilën e këndon dhe sot si të ishte në të 20-at e veta.

“T’tana i dinë për mua. Kur jam martuar, si jam martuar, sa fëmijë kam, t’tana i dinë”, më tha Myfarete Laze sa u ulëm në tavolinë për intervistën që kishim lënë, duke qeshur. Me Myfarete Lazen ndodh diçka e bukur. Sa herë e takon, apo edhe dëgjon në TV nuk mund të mos ndalesh gjatë për ta çuar çdo fjalë të saj me ëndje deri në fund. Transmeton përherë një energji të bukur, sens humori për çdo situatë, forcë, sidomos vërtetësi, të gjitha këto të përcjella përmes ëmbëlsisë tipike shkodrane, atij sharmi që ngjyros çdo fjalë duke lënë gjithmonë shijen e mirë të bisedës, të komunikimit. Në intervistën për NewsBomb, Myfarete na rrëfen jetën e saj të momentit, aktivitetet që nuk ka ndërmend t’i lërë pavarësisht viteve, dashurinë dhe krenarinë që ka për mbesën e saj, së cilës nuk ia kursen kurrë përkushtimin, kohën për ta shijuar jetën me bashkëshortin, ndjesinë e mirë që ka nga karriera e saj përgjatë gjithë këtyre viteve dhe një tregim për sfidat e kaluara. Ka një veçanti Myfarete, edhe gjërat më të vështira i tregon me sportivitet, madje edhe me nota humori, siç është rrëfimi për kohën kur jo pak është privuar si artiste për shkak të biografisë së gjyshit. Megjithatë në çdo fjalë të saj ka shumë dashuri dhe sigurinë e një njeriu që ka jetuar një jetë të mirë, apo siç thotë Myfarete “kam bërë jetën që kam dashur”.